شيكابالا طلع مع إبراهيم فايق فضفض بكلمتين ومن بعدها الدنيا قامت ومقعدتش في النادي الأهلي.. كهربا اتكلم وقال محصلش وده رجل كبير في السن.. وبعدها المهندس عدلي القيعي بنفسه طلع وكدب نجم الزمالك وقال إن اللي قاله شيكابالا ده مبيحصلش في الأهلي… هل ده كلام يعقل؟.. أية اللي يخلينا نوافق إنك تحتفل بفوز الزمالك على الأهلي؟.. أيه أصل الحكاية؟.. ده اللي هنعرفه مع بعض في “قشة لفة بلس”.
بعد ما محمود عبدالمنعم كهربا اتكلم على شيكابالا كابتن نادي الزمالم وقال إن الحوار اللي حصل بين إمام عاشور وشيكابالا محصلش وإن كابتن الزمالك هو اللي قال لإمام عاشور أنت هترجع الزمالك فإمام مردش عليه عشان كبير في السن وقاله أنا بلعب في نادي كبير أيه اللي يخليني أرجع.
طلع المهندس عدلي القيعي رئيس شركة الكرة في النادي الأهلي واتكلم عن واقعة توقيع شيكابالا للأهلي وهو صغير وقال: “شيكابالا لما رجع من اليونان اتكلم معايا عشان ييجي النادي الأهلي.. لكن أنا مكنش مصدق.. لعيب بحجم وقيمة شيكابالا أيه اللي يخليه عايز ييجي الأهلي ويسيب الزمالك”
فيه لعيبة مرتبطين بناديهم زي شيكابالا.. ده كان عايش جوة الزمالك.. وموقفه كان غريب بالنسبة ليا.. ولما كلمني عشان ييجي الأهلي.. مقاليش إن الزمالك مش عايزه.
وقتها كلمت حسن حمدي رئيس النادي الأهلي وقولت ليه أنا متابع مسيرة شيكابالا في باوك وهو لعيب كويس.. وبالفعل قعدنا شوية في المفاوضات.. ومضى على عقود انتقاله للأهلي وخد مقدم التعاقد.. في حضور مدير الشئون المالية والشئون القانونية في النادي عشان نضمن أن الفلوس متروحش علينا.
الفريق وقتها كان قوي وماشي كويس.. ولما شيكابالا مضي على العقد خدته ورحت للمدير الفني مانويل جوزيه وحسام البدري وكانوا عايزينه ينزل التمرين معاهم بعد ما مضى العقد.
عدلي القيعي قال أنا كلمت الكابتن حسن حمدي وقولت ليه شيكابالا ينزل ملعب التتش ويحيي جماهير الأهلي وتفرح بيه وهو يفرح بيهم.. بدل ما يروح يبات في الزمالك وهو ماضي معانا.
لكن الكابتن حسن حمدي رفض ينزل التمرين غير لما تيجي البطاقة الدولية.. هو كان عنده وجهة نظر إن أي صفقة جديدة متبقاش لاعب في الأهلي غير لما كل الورق يخلص ويبقي الكلام رسمي.
واللي كان بيفكر فيه الكابتن حسن حمدي حصل فعلا .. والنادي اليوناني مكنش عايز يسيب شيكابالا.. عشان رئيس باوك اتغير وجه شخص تاني مكانه.. وبدأ يساومنا عليه.. والاتفاق كان ان الاهلي يضمه مقابل 600 ألف يورو بس.
شيكابالا رفع قضية على نادي باوك اليوناني عشان ينضم للأهلي وفيه واحد اسمه محمد سويلم راح اليونان وقال لـ”شيكابالا” أنا خلصت كل حاجة للزمالك.. وارجع ناديك.. ووقتها حسن حمدي كلمني وقالي رجع ليه العقود، ومش عايزين شيكابالا.
ومحصلش كلام أنه قال ليا لو هلعب في الأهلي والزمالك جاب جول هفرح واتنطط.. أيه اللي يخلنا نقبل الكلام ده؟.. دي حاجات متحصلش.. لا الأهلي هيرضي بالكلام ده ولا الزمالك..
وكمان شيكابالا متدربش في استاد التتش لا في الليل ولا النهار.. ولا لبس فانلة بيضا ولا حمرا.. إلا لو الكلام ده حصل من ورايا.. وأنا محضرتش الواقعة دي عشان مظلمش شيكابالا.
شيكابالا قال الزمالك مكنش عايزني ومكنش قدامي حل غير اروح الأهلي.. وأنا وقعت ليهم بس قولت: “أنا عندي مشكلة لو في مباراة قمة وأنا على الدكة والزمالك جاب جول هحتفل على الدكة.. وبكدا هبطل كورة”.
لكن عدلي القيعي قالي: “لو جئت هتدخل في المنظومة وهتحب النادي.. بس أنا متقبلتش الفكرة.. وأنا تدربت في الأهلي في الليل بقميص أبيض.
