قبل ما ندخل في الموضوع ادعوا للشاب المحترم “أحمد رفعت” هو محتاج الدعاء دلوقتي ربنا يرحمه ويرحم موتانا جميعا.. وكمان التصريحات الوارد في الفيديو هي مسئولية أصحابها اللي كاتبها.. وإحنا مجرد ناقل للكلام المتداول على السوشيال ميديا.
اللاعب الراحل اتكلم عن المشكلة اللي سببت ليه أزمة صحية قبل رحيله وقال: “اللي حصلي بسبب ضغوطات وأزمة نفسية من أشخاص في الكورة، مش هقدر أقول لانها حاجة صعبة وأثرت في نفسي وهبقي أقول في الوقت المناسب”.
ومن بعد رحيله يوم السبت 6 يوليو 2024 والغضب سيطر على الجماهير المصرية اللي طالبت بالكشف عن المتورطين في رحيل لاعب مودرن فيوتشر أحمد.. وبدأت التسريبات تطلع والناس تتكلم… وباقي نعرف مين هما المتورطين في الأزمة؟.. وأيه علاقة مرتضى منصور؟.. ومين السبب في أنه ميلعبش في الأهلي؟.. ده اللي هنعرفه مع بعض في “عرب 22”.
الجماهير عايزة تجيب حق اللاعب الشاب وطالبوا وكيل أعماله نادر شوقي وهيثم عرابي مدير التعاقدات في نادي مودرن والإعلامي إبراهيم فايق يطلعوا يقولوا للناس السر اللي خباه رفعت ومقدرش يقوله وهو عايش..
لحد ما مدير التسويق الرياضي السابق في الإسماعيلي ونادي أسوان مصطفى محمود عويس.. كتب بوست على صفحته بفيسبوك وقال: “قصة أحمد رفعت مع الشخص من الشخصين اللي تسببوا في وفاته وهددوه بأنهم هيمنعوه من ممارسة الكرة طول حياته.. في وقت أحمد دياب كان رئيس نادي فيوتشر وكان في منصب كبير في إدارة الكرة المصرية يقصد رئيس رابطة الأندية المحترفة.
كان فريق فيوتشر عنده ماتش بره مصر.. وأحمد رفعت كان على قوة التجنيد وقتها.. لكن أحمد دياب طلب من أحمد رفعت إنه يسافر مع الفريق وقاله متقلقش أنا هظبط الدنيا مع المسؤولين وفعلا أحمد رفعت سافر مع الفريق ولعب الماتش لكن وهو راجع اتمسك في المطار واتعاقب 6 شهور بتهمة التهرب من أداء الخدمة.. ودي الفترة اللي أحمد رفعت قال لإبراهيم فايق عليها في البرنامج وقاله بس مش هينفع اقولك كنت فين ويعمل ايه.
بعد ما أحمد رفعت قضى المدة بتاعته وخرج طلب من أحمد دياب مستحقاته خلال الفترة دي خصوصا أنه الحبس بسبب احمد دياب لأنه هو اللي طلب منه يسافر وهيحل المشكلة لو حصلت حاجة لكنه ورطه.. لكن أحمد دياب رفض وحصلت مشادة وتهديد واضح منه لرفعت وقاله بالنص: “لو اتكلمت في القصة دي تاني هبطلك كورة”.
لكن إحنا مش متأكدين من التصريحات دي وهل هي حقيقة ولا لأ.. ونادر شوقي رد وقال: “حقك جاي جاي يا أحمد”
مرتضى منصور رئيس الزمالك السابق دخل على خط الأزمة وقال: “اصبروا حقه إن شاء الله مش هيضيع لازم يبقي فيه حد لبلطجة الوسط والإعلام الرياضي.. أحمد رفعت الله يرحمه مش أول الضحايا ولا آخرهم”.
أحمد رفعت كان قريب من الانتقال للنادي الأهلي وقال: “كنت مخلص مع الأهلي السنة اللي فاتت.. وأمور قانونية هي اللي منعت إتمام الصفقة”.
لكن أحمد لعب بقميص الأهلي وقت ما كان لاعب في الزمالك وده حصل سنة 2017.. لما الأهلي استعان بنجوم كتير في مباراة خيرية ضد فريق أتلتيكو مدريد بطل إسبانيا وقتها.. وخلصت بخسارة الأهلي 3-2.
الراحل في الليلة الأخيرة أحمد رفعت اتفرج على ماتشات اليورو مع أصحابه وبعدها كلم هيثم عرابي علشان يحجز ليه مكان على البحر علشان نفسيته وحشة.. ورجع بيته صلي العشاء وقاعد مع مامته وكان بياكل تفاح وطلب منها مياه دخلت المطبخ علشان تجيبله مياه.. ولما رجعت لقيته واقع على الأرض.
