“الرجل بتاعي مش هيمشي.. وأنا عايزه يكمل معايا.. حلوا أنتوا المشاكل اللي عندكم وبلغوني”.. ده الكلام المدير الفني للأهلي السويسري مارسيل كولر بعد إبلاغه من إدارة النادي أنهم عايز يمشوا واحد من عناصر الجهاز الفني.
وقالوا عليه هو الجاسوس اللي بيسرب الأخبار للإعلام والصفحات على السوشيال ميديا.. مين هو الجاسوس؟.. وأيه علاقته بصفقات الأهلي؟.. وأيه حكاية الشكوى اللي قدمها 4 لعيبة ضده؟.. ده اللي هنعرفه مع بعض في “قشة لفة بلس”.
كولر قال تصريحه الشهير: “غير راضي عن ملف الصفقات.. والإدارة بتبلغني كل فترة عن الملف ده.. وما زلت أبحث عن مهاجم جديد مع وسام أبو علي”.. ومن بعدها الدنيا اتقلبت سواء بين الجماهير أو الإدارة.
جمهور الأهلي محبط بسبب طريقة تعامل إدارة النادي مع الملفات الحساسة خصوصا ملف التعاقدات.. لكن مصادر قالت: “الكابتن محمود الخطيب زعلان جدا من تصريحات كولر.. وإدارة النادي الأهلي بتحب الكلام يكون جوة الغرف المغلقة ومبيحبوش حد يسمع اللي اتقال”.
الخطيب كان منتظر من كولر يدخل يتكلم معاه بشكل مباشر وميتكلمش في الإعلام على الملأ.. قدام الجماهير وحاسس إن المدير الفني سلم الإدارة للجماهير وده بيضغط على إدارة التعاقدات وبيضعف موقفها مع الصفقات اللي هيتعاقدوا معاها وهيشوفوا أن الأهلي مضطر يوافق على شروطهم.
والإعلامي سيف زاهر قال: “فيه جلسة هتجمع الخطيب وكولر، بسبب تصريحات الأخير اللي قالها في مؤتمر صحفي، بسبب موقف إدارة النادي حول الصفقات.. دستور الأهلي بينص على إن النقد بيكون في (أوضة مغلقة)، وإن النقد لا يصح أن يكون في العلن، لأن إدارة النادي مش عايزة ترد على النقد في العلن”.
والمشكلة التانية اللي وصلت لطريق شبه مسدود واللي بسببها كولر هدد أنه يمشي من النادي سببها المترجم خصوصا أن فيه شكاوي من 4 لعيبة ضد خالد الجوادي.. اللي قالوا إن المدرب بيحضر الجلسات بصفته مترجم كولر لكن هما بيتفاجئوا بالأخبار بتتسرب في الإعلام والصحفيين بيعرفوا كل حاجة ويلاقوا الصفحات نشرت نص المحادثات اللي بتدور في الغرف المغلقة.
وده أغضب اللعيبة والمسئولين وشاكين إنه بيسرب أخبار عن الفريق للغريم التقليدي نادي الزمالك زي اللي حصل في تسريب تشكيل ماتش القمة في الدوري اللي فاز فيه الزمالك.
لجنة التخطيط بلغت كولر أننا عايزين نغير المترجم الخاص بالفريق.. واللي يعتبر عضو من الجهاز الفني حسب العقد اللي عمله ليه كولر وبقي مساعد في الجهاز.. لكن المدرب السويسري رفض وقال: “مقدرش استغنى عنه وعايزه يكمل معايا”.
مصادر قالت: “المسئولين في لجنة التخطيط انقلبوا على خالد الجوادي بعد ترجمته لحديث كولر عن فشل اللجنة في العمل على ملف الصفقات، وعدم رضاه على التعاقدات اللي حصلت في الفترة الأخيرة”.
وبدأت لجنة التخطيط برئاسة محسن صالح في اتخاذ العديد من القرارات وعلى رأسها رحيل خالد الجوادي، خصوصا بعد غضب الجماهير ضد اللجنة بعد كلام كولر.
لكن مصادر مسئولة قالت كولر هدد بالرحيل عن الفريق الأحمر لو مشي خالد الجوادي وبلغهم أنه رافض تصرفات لجنة التخطيط”.
وعشان كدا جماهير الأهلي عملت هاشتاج على تويتر بعنوان طلبات كولر يا خطيب وطالبوه ينفذ اللي عايزة المدير الفني… وواحد من الجمهور قال: “يا ريت حد يسمع من الاداره ونجيب صفقات قويه لان اللي الاهلي داخل عليه مش هينفع معاه اسكواد الاهلي اللي موجود وكفايه شغل الهواه.. كولر والجوادي خايفين على النادى أكتر من مجلس الإدارة”
