“إحنا بنعيش عصر الاحتراف.. وأنا هروح للنادي إللي عاوزني.. وأقدر أفيده وبياخد بطولات، يعني “هيصيطني” من الآخر وأبقي مشهور.. هروح للنادي الأكتر بطولات.. واللي بيراهن على الأهلي ديما كسبان.. الكلام ده قاله نجم الإسماعيلي عبدالرحمن مجدي.. والجماهير فهمت هو عايز يروح فين.. لكن المفاجأة في رد إدارة الأهلي على اللاعب.. قالت أيه؟.. وأيه موقف الزمالك من التعاقد مع اللاعب؟.. ده اللي هنعرفه مع بعض في “عرب 22”.
عبدالرحمن مجدي لاعب النادي الإسماعيلي طلع في برنامج مع أحمد شوبير واتكلم عن مستقبله وعايز يلعب مع مين الأهلي ولا الزمالك ولا بيراميدز.. لكن كلامه كان صريح ومفاجئ للكل.. حتى أحمد شوبير نفسه قاله عرفنا أنت عايز مين.
لاعب الإسماعيلي قال أنا دلوقتي في نادٍ كبير، ومينفعش أقعد مع نادي تاني وأنا على ذمة الدراويش.. قبل كدا قعدت مع الزمالك عشان عقدي كان اتفسخ مع الإسماعيلي، وقلت للإدارة أنا عايز اجدد للنادي عشان يستفيدوا من بيعي بدلا من الانتقال حر للزمالك.
وقعد مجلسين إدارة الزمالك والإسماعيلي في وقت المستشار مرتضى منصور مع بعض لكن المفاوضات مكملتش عشان الإسماعيلي طلب فلوس أكتر من اللي كنا متفقين عليه.. وبعدها جددوا العقد اللي كان معمول بفلوس كتيرة وقعدت لحد دلوقتي في النادي.
ومن فترة طلع نصر أبو الحسن رئيس الإسماعيلي وقال أنا مستعد لبيع عبدالرحمن مجدي للأهلي.. عشان كان فيه كلام من الأهلي أنه عايز يضمني، وأنا كان عندي مشكلة أثرت عليا في الانضمام للقلعة الحمراء.. وأخذوا فكرة عني أني مش ملتزم وهعمل مشاكل في الفريق.. لكن أنا دلوقتي عندي بنتين وعايش حياتي لأسرتي وأهلي بس.
والمشكلة اللي حصلت ليا في الأوليمبياد،.. لما قالوا إني تحرشت بواحدة كنت مظلوم فيها.. لأن لو حصلت بجد مكانش الموضوع في اليابان هيعدي.
الناس هنا في مصر بتدور عن الترند، وأنا اتحرمت من اللعب في الأوليمبياد… وبعدها لعبت مع الإسماعيلي واجتهدت مع الفريق.. وانضممت للمنتخب مرة تانية.
أنا بفضل اللعب للزمالك أو بيراميدز ومش الأهلي عشان جماهير الإسماعيلي.. مش عايزاني اروح الأهلي.. لكن إحنا بنعيش عصر الاحتراف وأنا هروح النادي الأكثر بطولات.
ومش هعمل أزمات في الإسماعيلي عشان أجبرهم على الموافقة على رحيلي.. وهمشي بالطريقة اللي تعجب الإدارة الجمهور.
مصادر قالت إدارة النادي الأهلي مش بتفكر في نجم الإسماعيلي ولجنة الأسكاوتينج مش حاطة عبدالرحمن ضمن قائمة اللعيبة المطلوبين في الأهلي دلوقتي.. لكن هيشوفوا السي في بتاع اللاعب وهيعرضوه على مارسيل كولر المدير الفني للفريق.. ولو عجبه واهتم بيه هنبدأ إجراءات التعاقد مع اللعيب وهنتفاوض مع الإسماعيلي خصوصا أن رئيسه مرحب ببيع اللاعب للأهلي.
وكمان مجلس إدارة نادي الزمالك اللي عايز يبني فريق جديد.. لما اتعرض عليه كلام اللاعب قالوا هو مقالش الأهلي ولا الزمالك.. هو عايز يلعب في نادي بطولات وإحنا نادي بطولات وأي حد يتمنى يلعب في الزمالك.. وهنشوف رغبة اللاعب لو عايز ييجي الزمالك أهلا بيه.. وهنعرضه على جوزيه جوميز هو المسئول عن الصفقات الجديدة وإحنا بنشتغل حسب طلبات المدير الفني.
إدارة النادي الإسماعيلي معندهاش مشكلة في بيع عبدالرحمن مجدي لأي نادي حتى لو الأهلي وده اللي أكده نصر أبو الحسن رئيس الإسماعيلي وقال: “الجمهور بيحكم بالعاطفة، لكن المسؤول عايز يحل مشاكل الفريق، وممكن نستغنى عن لاعب عشان احتياجنا المادية.. وإحنا في عصر الاحتراف، وانتقال اللاعبين إلى الأهلي أمر طبيعي”
