اتفق مع شركة تسويق عشان يمشي من الأهلي.. وقعد مع محمود الخطيب وقاله نفذ وعدك ليا يا كابتن.. أنا عايز أأمن مستقبلي.. وعملت اللي عليا ومقصرتش ولا بخلت بنقطة عرق على الفريق.
وبأخد أقل عقد في النادي.. الكلام ده قاله مدافع النادي الأهلي محمد عبدالمنعم في مقابلة عابرة مع الكابتن محمود الخطيب رئيس النادي.. أيه اللي حصل؟.. وإزي عبدالمنعم فاجئ إدارة الأهلي بعرض ضخم؟.. وهياخد كام في السنة؟.. وليه الخطيب قال للإدارة عاملوه زي أحمد فتحي وشريف إكرامي؟.. ده اللي هنعرفه مع بعض في “قشة لفة بلس”.
محمد عبدالمنعم مدافع منتخب مصر والأهلي الأساسي مرتبط بعقد مع النادي الأهلي لمدة سنتين لسه يعني هيخلص في موسم 2026 وميقدرش يمشي غير بمواقفة إدارة النادي.. لكن نجم الأهلي أعلن التمرد والعصيان على الفريق وعايز يمشي في الميركاتو الصيفي.
وبسبب إصراره إدارة الأهلي وافقت على الرحيل لكن قالت ليه هتمشي روح أوروبا.. بس اللاعب مصر على الاحتراف في أي مكان.. وآخر عرض للاعب جايله من السعودية.. وده اللي أكده الإعلامي مدحت شلبي المذيع في قناة MBC مصر السعودية.
واللي عنده مصادر في الدوري السعودي وقريب من أندية دوري روشن.. وقال إن عبدالمنعم قريب من الانتقال لأحد أندية الدوري السعودي في فترة الانتقالات الصيفية.. وبنسبة كبيرة الموسم الحالي هيكون الأخير لمحمد عبدالمنعم مع النادي.
الأهلي أعطى الضوء الأخضر لمحمد عبدالمنعم عشان يمشي ويخرج للاحتراف بشرط يجيب عرض رسمي قوي وبمبلغ كبير يليق باسم اللاعب والنادي.
وشركة التسويق اللي شغال معاها اللاعب جابت ليه 3 عروض من الدوريات السعودي، والقطري، وعرض من بطولة الدوري الفرنسي.. لكن العرض الفرنسي أقل في الناحية المادية من العرضيين السعودي والقطري.
مدحت شلبي قال إن العرض السعودي المقدم للاعب يعتبر الأعلى من بين كل العروض المقدمة ليه.. النادي السعودي عرض على اللاعب راتب بيوصل لـ5 مليون دولار في الـ3 مواسم، يعني 240 مليون جنيه بالمصري.. يعني هياخد كل سنة 80 مليون جنيه كل موسم.. وده قدر مرتبه في الأهلي 11 مرة.
وفيه جلسة هتجمع المسئولين في الأهلي وعبدالمنعم بعد معسكر منتخب مصر اللي خلصت وفازت فيه مصر بمباراة بوركينا فاسو واتعادلت مع غينيا بيساو.. عشان يناقشوا العروض ويشوفوا امكانية الرحيل في الصيف.
لجنة التخطيط في الأهلي برئاسة محسن صالح وزكريا ناصف، بتدرس العروض قبل ما تقدمها لمجلس إدارة النادي الأهلي برئاسة محمود الخطيب.. وبكدا اللاعب بنسبة كبيرة برة.
مصادر قالت إن الكابتن محمود الخطيب غضبان من موقف عبدالمنعم بالرحيل وقرر يعلمه الأدب.. وقال للمسئولين عن الكرة إن عقده لسه باقي فيه سنتين مع الفريق ولو العرض مش مناسب ومغري ويليق بقيمة النادي اللاعب يكمل عقده مع الفريق ويبقي يمشي لما عقده يخلص.. زي ما حصل قبل كدا مع اللعيبة الكبار اللي راحوا بيراميدز أحمد فتحي وشريف إكرامي.. والأهلي مش هيقف على حد.
الأهلي قدم عرض للاعب عشان يجدد عقده ويعدل المقابل اللي هياخده في السنة.. اللي هو 6 مليون جنيه دلوقتي.. وأمير توفيق مدير التعاقدات عرض عليه 30 مليون جنيه في السنة.. بس بشرط أن العقد بتاع محمد عبدالمنعم يتمد موسمين أو 3 مواسم تاني.
يعني بدل ما عقده يخلص في 2026 هيخلص في 2029.. الكلام ده معجبش عبدالمنعم اللي قالهم.. تمام الرقم حلو.. ونعدل العقد.. بس نتكلم في موضوع تجديد التعاقد في آخر الموسم اللي جاي.. وهكمل الموسم ده بالفلوس الجديدة.
المسئولين في الأهلي.. قالوا لأ.. تعديل العقد والتجديد هيكونوا مع بعض.. إحنا هنديك مرتب كبير ولازم نضمن إن عقدك مستمر معانا لحد 2029.. والأمور وقفت عند النقطة دي.
