
كولر قال مش عايزه ويشوف مصلحته.. لكن اللاعب قدر يقنعه بإمكانياته وقدراته الفنية وخلى كل اللي بينقدوه قالوا عليه الجوكر ورفضوا رحيله في الصيف خصوصا أن اللاعب معندوش مشكلة يلعب مع نادي الزمالك وقال: “شرف ليا اللعب في القلعة البيضاء”.. مين اللاعب ده؟.. وليه كولر رفض رحيل اللاعب المغضوب عليه؟.. وقال أيه مع أحمد شوبير؟.. ده اللي هنعرفه مع بعض في “قشة لفة بلس”.
في شهر سبتمبر مفيش صوت يعلو فوق صوت الراحلين والصفقات الجديدة وخطة الموسم الجديد داخل النادي الأهلي.. ورغبة السويسري مارسيل كولر، المدير الفني في دعم الفريق بصفقات قوية تقدر تعوض الراحلين.
كولر قدم تقرير فني لإدارة الكرة ولجنة التخطيط حدد فيه أسامي اللعيبة الراحلين والصفقات الجديدة اللي هيتعاقد معاه.. ومنهم نجم الأهلي خالد عبدالفتاح اللي كولر قال مش عايزه وبعدين غير رأيه لما شاف اللاعب في ماتشات الدوري الأخيرة وقدر يسد ويعوض النقص العددي وغيابات اللاعبين الأساسيين اللي خدوا راحة.
مصادر قالت: “خالد عبدالفتاح.. وصل ليه عروض محلية عشان يتعاقدوا معاه من الأهلي الفترة الجاية بعد ابتعاده عن المشاركة بشكل أساسي مع السويسري مارسيل كولر.. والاعتماد على عمر كمال عبدالواحد ومحمد هاني في مركز الظهير الأيمن.
موقع “أهلي نيوز” نقل عن مصادر من داخل النادي الأهلي اللي أكدت أن كولر رفض رحيل خالد عبدالفتاح، وتمسك بتواجده داخل الفريق الأحمر.. بسبب الاحتياج لخدماته.. خصوصا أن اللاعب يعتبر جوكر ومتحرك.. وبيجيد اللعب في أكثر من مركز.. ويقدر يعوض غياب عمر كمال أو محمد هاني.
المصادر قالت: “خالد عبدالفتاح جاله 3 عروض من أندية سموحة وسيراميكا كليوباترا وزد للرحيل عن النادي الأهلي سواء عن طريق البيع النهائي أو الإعارة.
لكن كولر تمسك ببقاءه بعد إصابة كريم فؤاد بقطع في وتر أكيلس وغيابه لمدة 9 شهور.. وكمان رحيل محمد عبدالمنعم لنادي نيس الفرنسي.. وكولر شايف أنه هيقدر يلعب في مركز قلب الدفاع أفضل من محمد هاني وعمر كمال عبدالواحد”.
مصدر قال إن نادي الاتحاد السكندري دخل في مفاوضات جادة مع الأهلي واللاعب عشان يضمه لكن مجلس الإدارة هيناقش العرض مع كولر.
الموسم اللي فات خالد عبدالفتاح عمل مشكلة مع كولر عشان قعد على دكة الاحتياطي خصوصا أنه كان متألق مع فريق سموحة والمهندس فرج عامر رئيس النادي مرضيش يسيب اللاعب لنادي الزمالك وباعه لصاحبه وحبيبه محمود الخطيب رئيس الاهلي.
اللاعب قعد مع كولر وقاله عايز فرصتي لكن المدرب صدمه وقاله اتدرب كويس.. بعدها اجتمع مع الكابتن خالد بيبو مدير الكرة السابق.. وقاله: “عايز أمشي لو مش هلعب.. وهروح الزمالك.. وده نفس الكلام اللي أكده أحمد شوبير الإعلامي المقرب من مجلس إدارة الأهلي.
خالد عبدالفتاح قال في تصريحات تلفزيونية معنديش مشكلة اروح الزمالك وشرف لأي لعيب أنه يلعب في الزمالك.. وده الرد اللي فاجئ أحمد شوبير وقاله: “أول واحد يتكلم بصراحة كده.. وأنا شايف إن مفهاش أي أزمة إنك تنتقل نادي الزمالك”.
خالد عبدالفتاح اتكلم عن علاقته بكولر وقال: “كويسة وأنا استغليت الفرصة خصوصا في ماتش الزمالك في الدوري اللي فزنا بيه.. وكولر قالي معنديش قلوب دفاع وعايزك تلعب في المركز ده.. رديت عليه وقولتله: أنا لعبته قبل كدا مع سموحة.. وقدر أواجه مهاجم الزمالك الصعب سيف الدين الجزيري.. والكابتن محمد الشناوي قالي دي بداية حلوة وهتكمل معانا في النادي وبعدها مضيت عقد لمدة 4 سنين”
وجالي عرض من بيراميدز وقت مفاوضات الأهلي.. لكن كنت اديت كلمة للمسئولين في الأهلي ومروحتش.. والكابتن الخطيب قالي إن هكون ضمن مستقبل النادي.