قهرتوني وموتوني بدري.. وهتقفوا إزي قدام ربنا.. وعامر حسين يفجر مفاجأة.. آخر ما قاله إيهاب جلال قبل وفاته؟.. وما علاقة الأهلي؟
معملش بنصيحة محمد صلاح.. وعامر حسين فجر مفاجأة مدوية.. ومات مقهور.. اللحظات الأخيرة في حياة إيهاب جلال
“ملحقش يعمل حاجة ولا يفتح شنطته حتى مع المنتخب.. ودفع الثمن ومحدش وقف جنبه وضحوا بيه وده أثر عليه نفسيًا من وقتها ومقدرش يتجاوز اللي حصل معاه”.. ده جزء من شهادة تاريخية قالها نجم الأهلي الكابتن محسن صالح عن الراحل إيهاب جلال اللي فارق الحياة يوم الأربعاء.. لكن أيه المفاجأة اللي اتكلم عنها عامر حسين؟.. وأيه حكاية تعرضه للقهر؟.. وأيه حكاية نصيحة محمد صلاح اللي معملش بيها؟.. ده اللي هنعرفه مع بعض في “قشة لفة بلس”.
في يوم الأربعاء 11 سبتمبر 2024 فوجئ الوسط الرياضي بخبر كان صدمة لكل جماهير الكرة في مصر زي صدمة رحيل أحمد رفعت.. وهو خبر رحيل الكابتن إيهاب جلال المدير الفني للإسماعيلي ومنتخب مصر السابق.. اللي دخل المستشفى من أول الشهر.. لكن توفاه الله بعد رحلة قصيرة مع المرض لكن الضغوط اللي كانت قبل دخول المستشفى كبيرة وتهد جبال.
إيهاب جلال تولى مهمة تدريب منتخب مصر سنة 2022، وقاد الفراعنة في 3 مباريات بس منها مباراة ودية وبعدها اتحاد الكرة أقاله من منصبه.. واتكلم عن الفترة اللي قعدها مع منتخب مصر وقال: “كان متفق على تطوير الكرة المصرية بعقد طويل الأجل.. ومكنش فيه حماية كافية من المسئولين في مصر.. ومحمد صلاح كابتن المنتخب قالي بعد الإقالة: “مش قولتلك خلي بالك أنهم هيضحوا بيك في اتحاد الكرة.. ولعيبة الكرة السابقين هيقطعوك في الإعلام”.
وده اللي اتكلم عنه كمان نجوم كرة القدم.. وكان أول واحد فيهم زميله ورفيق الكفاح معاه في معظم المحطات التدريبة الكابتن حمد إبراهيم اللي قال: “الموسم كان صعب جدًا علينا وكان بنحاول نفك الضغط من على إيهاب جلال.. منذ أزمة منتخب مصر وهي مؤثرة جدًا على إيهاب جلال والأمر كان صعب عليه.. وكنا نحاول إخراجه ولكن كان يوجد شيء بداخله غير منضبط”.
حمد إبراهيم قال: “الحالة النفسية لجلال كانت بتتأرجح بين الأمل والإحباط، خصوصًا بعد تجربته مع الإسماعيلي.. وكان عنده قلق مستمر بشأن مصير الفريق في دوري القسم الأول.. وكان خايف من الهبوط لدوري القسم التاني”.
والكابتن محسن صالح رئيس لجنة التخطيط في الأهلي اتكلم عن أزمة إيهاب جلال قال: “ملحقش يعمل حاجة ولا يفتح شنطته حتى مع المنتخب.. ودفع الثمن ومحدش وقف جنبه وضحوا بيه وده أثر عليه نفسيًا.. بعد رحيل إيهاب جلال عن منتخب مصر أنا تعرضت للقهر لأن ده نفس اللي حصل معايا سنة 1995 مع منتخب مصر وتمت إقالتي وأنا في الخارج دون أي أسباب وكنت وقتها حققت كل حاجة مع المنتخب”.
وكمان محمد مجدي قفشة نجم الأهلي نشر ستوري عبر حسابه بتطبيق «إنستجرام» وكتب فيها: «الله يرحم الكابتن إيهاب جلال مهما حكيت مش هوصف أبدا قد ايه كان أخلاق ومتربي وجميل.. شاطر وناجح ومحبوب.. قلبي حزين عليه يا جماعه مش مهم اللوايح ولا مهم العقود ولا مهم المستحقات ولا مهم السمعة ولا مهم السيرة ولا مهم لو كنت ضحكت عليه أو اتشطرت أو استقويت ووجعت له قلبه.. كل ده راح لأن صاحبه مات».
«بس السؤال عارف صاحبه هيشتكي عند أنهي قاضي؟ هتقدر تستحمل حكم ملك الملوك! حسبي الله ونعم الوكيل».
وكمان أحمد الشيخ لاعب المصري قال على إنستجرام: “حسبي الله ونعم الوكيل في اللي كان سبب في تدمير نفسيتك، حسبي الله ونعم الوكيل في اي حد شكك في ذمتك وشرفك، حسبي الله ونعم الوكيل في أي حد جرحك بكلمة، حسبي الله ونعم الوكيل في أي حد كان سبب في تعبك، حسبي الله ونعم الوكيل”.
وعامر حسين عضو الاتحاد بعد مرضه: “قال مكنتش أعرف إن إيهاب ليه فلوس عند اتحاد الكرة.. ولو ليه حاجة ييجي ياخدها”.
