السوبرين الأفريقي والمصري حلم كل فريق بيتمنى يحققه.. النادي الأهلي عايز يثبت تفوقه ويفوز باللقب للمرة التاسعة في تاريخه العريق.. وكمان الزمالك بيستعد للبطولة وعايزه ياخد الكاس معاه في ميت عقبة عشان يعوض الخسائر الكبيرة اللي حصلت الموسم اللي فات.. وعشان كدا الخطيب أشعلها في الأهلي قبل مواجهة الزمالك في الرياض.. وعمل ورطة كبيرة لمجلس الإدارة بقيادة الكابتن حسين لبيب.. الخطيب خد 4 قرارات نارية في القلعة الحمراء هتحسم التفوق لأبناء التتش.. أيه هي قرارات الخطيب؟.. وحسين لبيب رد بأيه؟.. وأيه مفاجأة المستشار تركي آل الشيخ؟.. ده اللي هنعرفه مع بعض في “قشة لفة بلس”.
رغم التفوق التاريخي للنادي الاهلي على الزمالك في البطولات المحلية والقارية.. لكن الزمالك قدر يغلب الأهلي في بطولة السوبر الأفريقي.. والأهلي عايز ياخد بتاره من الزمالك في البطولة دي تحديدا خصوصا أن الغريم التقليدي سبق ليه التفوق في المواجهة الوحيدة اللي أقيمت بين الطرفين في نفس البطولة واللي اتلعبت في جنوب أفريقيا وتحديدا في جوهانسبرج واللي حسمها أيمن منصور بهدف في مرمى أحمد شوبير حارس الأهلي السابق في نسخة 1994.
وعشان كدا مجلس إدارة الأهلي برئاسة محمود الخطيب استقر على مجموعة من القرارات المهمة بهدف تحفيز اللاعبين قبل الفترة الصعبة الجاية واللي هتشهد تحديات قوية في السوبر الأفريقي ضد الزمالك في السعودية وبعديها السوبر المصري في الإمارات.
وأول قرار خده مجلس الأهلي هو صرف مقدمات عقود اللاعبين للموسم الجديد ومعاها مكافأة لقب الدوري الـ44 اللي حققه الموسم اللي فات ده غير باقي مستحقات اللاعبين عن الموسم الماضي عشان يحفز اللاعبين قبل مواجهة الزمالك.. ويلعبوا بروح معنوية مرتفعة”.
والقرار التاني خاص بالمدير الفني السويسري مارسيل كولر اللي مجلس الأهلي حب يظهر للمدرب الأجنبي أنه بيقدره وعايزه يكمل معاه.. وكمان بيحميه من العروض المغرية اللي اتقدمت ليه الفترة اللي فاتت لكنه رفضها وفضل يكمل مع النادي الأهلي.. والخطيب اتفق معاه على زيادة مرتبه عشان يبقي أعلى مرتب لمدير فني في مصر والنادي على مر تاريخه ووصل راتبه لـ250 ألف دولار في الشهر.. ده غير ترضية باقي عناصر الجهاز الفني ورفع مرتباتهم عشان يحفزهم قبل الموسم التاريخي.
لكن القرار التالت اللي خده الأهلي وهو خاص بالسفر للسعوديه وده جه بالتنسيق مع الجهاز الفني بقيادة كولر.. اللي طالب بتوفير طائرة خاصة عشان تتحرك للعاصمة الرياض يوم 24 سبتمبر يعني قبل المباراة بـ3 أيام للتأقلم على الأجواء الخاصة بالمواجهة القارية الصعبة ضد الزمالك في بطولة السوبر الأفريقي.. وكمان يقدروا يتدربوا بشكل كويس على كل سيناريوهات المباراة.. وفرض السرية التامة على التدريبات وحذر اللاعبين من استخدام السوشيال ميديا الأيام الجاية قبل المباراة.
وكمان كولر طلب من طاقمه المعاون ليه وخصوصا محلل الأداء بمشاهدة فيديوهات صفقات نادي الزمالك الجديدة اللي تعاقد معاها في فترة الانتقالات الصيفية خصوصا الجناح السريع لاعب أحد السعودي كونراد ميشالاك اللي ممكن يكون مصدر خطوة.. ويجهزوا تقرير وافي عنه عشان يحدد نقاط ضعف وقوة اللعيبية ويعمل الخطة المناسبة للتعامل معاه.
كولر عايز يعرف على كل كبيرة وصغيرة في الزمالك.. وكمان أفكار جوزيه جوميز المدير الفني للزمالك خصوصا في تعامله مع الصفقات الجديدة محمد حمدي ومحمود بن تايج وسيدي نداي وميشالاك وحسام أشرف وأحمد محمود.
لكن جماهير الزمالك قلقانة من تصرفات المستشار تركي آل الشيخ الرئيس الشرفي السابق للأهلي خصوصا أنه قابل باتريس موتسيبي، رئيس الاتحاد الإفريقي لكرة القدم عشان يشوفوا آخر الاستعدادات للسوبر الأفريقي اللي هيتلعب يوم 27 سبتمبر في الرياض.
