“رجوع أحمد عبدالقادر وديانج.. وتوقيع 3 مهاجمين سوبر منهم نجم الزمالك”.. كواليس اجتماع الخطيب وكولر بعد خسارة السوبر.. إزي الفريق هيأكل الأخضر واليابس؟
خسارة السوبر الأفريقي من الزمالك عملت زلزال في القلعة الحمراء.. وخلى المسئولين في النادي الأهلي بيعيدوا الحسابات من تاني.. ويعيدوا تقييم الأمور في فريق الكرة.. وعشان كدا إدارة الأهلي خدت قرارات ثورية وحاسمة هترجع الفريق لطريق البطولات من تاني زي اللي حصل بعد الخسارة التاريخية من فريق صن داونز الجنوب أفريقي واللي بعدها الأهلي سيطر على كل البطولات وعمل أرقام تاريخية وفاز بدوري أبطال أفريقيا أكتر من مرة.
لكن أيه هي القرارات اللي خدها الخطيب؟.. ومين صاحب اقترح رجوع ثنائي الأهلي أحمد عبدالقادر وديانج؟.. ومين المهاجمين التلاتة اللي وقعوا للأهلي؟.. وأيه تفاصيل اجتماع الخطيب وكولر؟.. ده اللي هنعرفه مع بعض في “قشة لفة بلس”.
لجنة التخطيط وإدارة الأهلي برئاسة الكابتن محمود الخطيب المشرف على فريق الكرة عملوا اجتماع مع المدرب السويسري مارسيل كولر قبل ما يسافر سويسرا واتكلموا على خسارة السوبر والاستعداد لباقي مباريات الموسم وناقشوا ملف الصفقات الجديدة.
وفي الاجتماع اتكلموا على دعم الفريق بصفقة من الدوري المصري في مركز الجناح واستقروا على مصطفى زيكو أو عبدالرحمن البانوبي لعيبة زد اللي عرضتهم لجنة التخطيط على كولر عشان يتعاقدوا معاه في الصيف لكن كولر لسه محسمش قراره.
مصادر قالت إن إدارة النادي اتفاوضت مع 3 مهاجمين سوبر وحصلوا على توقيعهم واتفقوا مع أنديتهم على كل حاجة لكن كولر رفض اللعيبة دي وقال مش عاجبني ومنهم لاعب نادي الزمالك الحالي الفلسطيني عمر فرج.. لكن لجنة التخطيط عرضت تاني ابن الزمالك أسامة فيصل لاعب البنك الأهلي عشان يضموه في الصيف ومنتظرين قرار كولر.
والمفاجأة المدوية هي: “النادي الأهلي عايز يرجع النجم المالي أليو ديانج لاعب خط الوسط المعار لفريق الخلود السعودي والجناح أحمد عبدالقادر المعار لفريق قطر القطري في الشتاء.. وده هيكون حسب مجريات الأحداث في الفترة الجاية.. وإدارة النادي الاهلي بتقول إحنا مش هنهد المعبد.. عندنا بطولتين مهمتين هما السوبر المصري وانتر كونتيننتال.. ودي هتكون قبل انطلاق الدوري المصري”.
المصادر أكدت إن لجنة التخطيط في الأهلي معترضة على قرارات المدرب السويسري اللي رافض يضيف لعيبة جديدة في القائمة وقالهم أنا عايز لعيبة سوبر تقدر تشيل معايا الفريق في الموسم الاستثنائي.
لجنة التخطيط قالت: “إن قائمة الفريق والأسامي اللي هنضمها دي من اختصاص الإدارة.. لكن التشكيل واللعيبة اللي هتشارك في المباريات ده من صلاحية وقرار المدير الفني لوحده.. ولازم نجيب لعيبة تعمل عمق في الاسكواد”.
الإعلامي في قناة الأهلي محمد فارس اتكلم عن صفقة ديانج بعد خسارة السوبر وقال: “والله حاجة لا ليها علاقة بالماتش ولا وجوده معناه إن كنا هنكسب بس بصراحة دي حاجة من أغرب الحاجات اللي شوفتها في الكورة في حياتي وكل ما بفتكرها ببقى هتجنن.
في عز ما كنا بنكسب وبناخد بطولات كتبت إن السلبية الوحيدة للبطولات دي… إن ده خلى كولر يصدق أكتر أن الفريق مش محتاج ديانج وبيتعامل معاه كلاعب مش مهم.
نفسي أفهم ازاي ممكن يكون في قناعة إن ديانج لاعب مش مهم لفريق الأهلي.. محترف معداش على الأهلي لاعب في التزامه لا بيسهر ولا بيخرج ولا بتاع سوشيال ولا بيعمل اي حاجة خلقها ربنا غير انه يتدرب كورة وباقي حياته مع مراته.
وعلى المستوى الفني فهو لاعب خيالي قدرات فنية وبدنية سوبر.. لكن عنده مشاكل في بعض الأدوار الهجومية.. واللي بسببها بيلعب مع الأهلي.. لو هو لعيب متكامل كان لعب في أوروبا.
ديانج مشي من الأهلي وقيمته وصلت لـ4 مليون دولار كأعلى لاعب في الفريق.. ديانج قيمته في الماتشات اللي زي كأس العالم للأندية وإنتر كونتننتال.
