اللعيبة مريحة ومش هتلعب.. وأنت بتنتقم من ولادنا.. الخطيب يلقن حسام حسن درس قاسي بعد صدام منتخب مصر
“اللاعبين مريحين ومعظمهم خارج مصر.. وأنت بتنتقم من ولادنا.. وإحنا مش هنبعت اللعيبة لمعسكر المنتخب.. عشان اللي عمله حسام حسن مع كولر قبل كدا.. وولادنا عايزين يرتاحوا”.. ده اللي قاله مصدر في الأهلي لرئيس اتحاد الكرة جمال علام.. لكن المسئولين في الاتحاد وسطوا نجم أهلاوي عشان يحل المشكلة.. إزي هيحل الأزمة؟.. وليه الخطيب قال لحسام حسن بتنتقم من ولادنا؟.. ده اللي هنعرفه مع بعض يلا بينا.
خناقة جديدة حصلت بين حسام حسن المدير الفني لمنتخب مصر والمسئولين في الأهلي بسبب أسماء اللعيبة اللي هتنضم للمعسكر عشان العميد عايز ياخد اللعيبة قبل الأجندة الدولية لكن الأهلي مش عايز وقال هينضموا حسب قوانين الفيفا.
المشكلة دي اتكلم عليها الإعلامي محمد الليثي اللي قال: “فيه أزمة بين المنتخب والأهلي.. اللي لعيبته واخدة راحة لأول الشهر.. وأغلبهم مسافرين برة مصر.. إزي هينضموا؟.. ونفس الوقت حسام حسن مش هيلحق يجهز لعيبة مريحة بقالها أكتر 20 يوم لو انضموا قبل مباراة الرأس الأخضر بـ5 أيام بس”.
والكابتن محمود الخطيب مش ناسي اللي عمله اتحاد الكرة في أزمة كأس مصر وقرر يعاقبهم بطريقته وأكد على كلامه اللي قاله في بيان قبل كدا: “اللاعبين الذين يقع عليهم الاختيار للانضمام للمنتخب ضمن الأجندة الدولية سوف ينضمون للمعسكر في أول يوم للأجندة، والجهاز الفني للأهلي هيقوم بوضع برنامج تأهيلي للحفاظ على مستواهم البدني”.
لكن المسئولين في اتحاد الكرة تواصلوا مع الأهلي اللي رد عليهم وقال: “كولر قبل سفر للاجازة اتفق معانا إن اللاعبين إجازة حتى بداية معسكر المنتخب في 1 سبتمبر وفقا للأجندة الدولية”.
اتحاد الكرة طلب من النادي الأهلي الموافقة على انضمام الـ8 لاعبين اللي تم اختيارهم يوم ٢٨ أغسطس قبل بداية الأجندة الدولية بـ3 أيام.. والأهلي قال للاتحاد: “الموافقة مرتبطة بالبرامج التدريبية اللي وضعها كولر.. والموافقة مرتبطة بالتشاور مع المدرب وهنشوف مع كولر موقفه”.
لكن نائب رئيس الاتحاد خالد الدرندلي، عضو مجلس إدارة الأهلي السابق اتكلم مع الكابتن الخطيب واقعنه بانضمام اللعيبة في بداية المعسكر وقدر يحل الأزمة لكن ده في مقابل تسهيلات من الاتحاد للأهلي في ملف المباريات والدوري الجديد والحكام.
حسام حسن أعلن قايمة المنتخب المشاركة في مباريات التصفيات المؤهلة لكأس أمم إفريقيا 2025 واللي ضمت:
في مركز حراسة المرمى 3 حراس من الأهلي لأول مرة في تاريخ كرة القدم المصرية: محمد الشناوي – المهدي سليمان – مصطفى شوبير – حمزة علاء.
وفي خط الدفاع: أحمد حجازي – رامي ربيعة – محمد عبد المنعم – أحمد رمضان – خالد صبحي – محمد هاني – محمد حمدي – محمد شحاتة – أحمد نبيل كوكا.
وفي خط الوسط: محمد النني – حمدي فتحي – مروان عطية – إمام عاشور – ناصر ماهر – أحمد سيد زيزو – محمود حسن تريزيجيه – عمر مرموش – محمد صلاح – مصطفى فتحي – إبراهيم عادل.
وفي خط الهجوم اختار: مصطفى محمد – محمد الشامي- أسامة فيصل.
وبعدها حصلت أزمة من اللعيبة اللي مش موجودين في القايمة زي نجم نادي الزمالك المتألق في مركز الظهير الأيمن عمر جابر واللي عمل موسم كويس مع القلعة البيضاء وساهم بشكل مباشر في التتويج بالكونفدرالية.
وكمان الجوكر عمر كمال عبدالواحد اللي شارك مع الأهلي في الدور التاني من الدوري وأجاد في أكتر من مركز سواء الباك اليمين أو الشمال أو الجناح.. وعوض غياب علي معلول، لكن حسام رفضه عشان الخلافات القديمة بينهم.
ده غير نجم زي حسين الشحات لاعب الأهلي وأحمد سامي مدافع بيراميدز وأكرم توفيق اللي نشروا صور بيسخر من حسام حسن.
