الموسم ده بيراميدز عارف عايز أيه كويس من الدوري وماشي في طريقه.. ومفيش حد واقف قدامه غير الأهلي اللي عايز يطيره من المنافسة بأي شكل.. وعشان كدا ممدوح عيد رئيس بيراميدز بدأ يستغل الأزمات ويخطط ليها عشان يورط الأهلي.. إزي رئيس بيراميدز استغل أزمة انسحاب الزمالك من ماتش الأهلي؟.. وخلاف كولر مع المنتخب الأولميبي؟.. والكابتن الخطيب هيعمل أيه؟.. وأيه موقف وزير الرياضة؟.. والزمالك هيعمل أيه؟.. وأيه دور رمضان صبحي؟.. ده اللي هنعرفه مع بعض في “قشة لفة بلس”.
أزمة كبيرة حصلت في الدوري المصري بعد عيد الأضحى المبارك.. الأولى هي اعتذار الزمالك عن اللاعب قدام الأهلي في ماتش القمة وبعدها بأيام في الدوري المصري اتلغت مباراة بيراميدز و سموحة عشان أزمة كهرباء في ستاد الإسكندرية لما حصل حريق في لوحة محول كهرباء وبعدها الحكم مرضيش يكمل الماتش ولغى المباراة.
أزمة الأهلي مع المنتخب الأوليمبي.. بيراميدز بيحاول يستغلها لمصلحته ومصادر قالت: “إدارة الفريق السماوي رافضة تبعت أي لاعيب من كبار السن سواء مصطفى فتحي أو إبراهيم عادل أو أي لاعب تاني للمنتخب عشان يشارك في أولمبياد باريس”.
المصادر اتكلمت على الاتصالات اللي حصلت بين أشرف صبحي وزير الرياضة ومحمود الخطيب رئيس الأهلي عشان ينضم إمام عاشور ومحمد عبدالمنعم لقائمة الفراعنة خلال خوض أولمبياد باريس.
لكن الأهلي رافض عشان بينافس بيراميدز على لقب الدوري وكولر مش عايز يسيب حد منهم.. خصوصا أن الثنائي بيمثل قوة ضاربة للأهلي في بطولة الدوري وهيأثر على أداء الفريق.
وعشان كدا بيراميدز مش هسيب لاعب من عنده غير لما يضمن الأهلي يوافق على انضمام لعيب من عنده.
وكمان ممدوح عيد رئيس بيراميدز بدأ يخطط ويستغل الأزمتين لمصلحته.. خصوصا بعد كلام أحمد دياب رئيس رابطة الأندية اللي قال إن ماتش سموحة وبيراميدز في الدوري هيتعاد عشان دي ظروف قهرية.. وسموحة ملوش علاقة وده حريق مش انقطاع كهرباء وهنطبق اللائحة.
لكن المسئولين في بيراميدز عايزين الماتش يتحسب ليهم.. هاني سعيد المدير الرياضي قال: “أنا عايز تطبيق اللائحة سواء كانت ليا أو عليا أنا مش طالب حاجة زيادة أو حاجة مش من حقي أنا عايز فقط تطبيق اللائحة”.
مندهش من تصريحات لرئيس الرابطة بيقول المباراة تم إلغاؤها نظرًا لظروف قهرية وعدم احتساب النتيجة لصالح بيراميدز.. فين الظروف القهرية اللى كانت في المباراة تم السيطرة على الحريق والحكم كان يريد استكمال المباراة”.
مش شايف اللي حصل في المباراة ظرف قهري، كان فيه حريقة وسيطروا عليها.. منتظرين قرار رسمي من رابطة الأندية عشان نشوف هنصعد ولا نعمل أيه.
الأزمة التانية اللي استغلها بيراميدز هي خلاف الزمالك مع اتحاد الكرة ورابطة الأندية ومرضيوش ينضموا للزمالك في المشكلة عكس باقي الأندية.. بل طالبوا الزمالك ينحسب من ماتش بيراميدز زي ما عمل قدام الأهلي.
المسئولين في بيراميدز قالوا إحنا ملناش علاقة طالما بنكسب الماتش.. وده بيدينا ثقة ويقربنا من درع الدوري خصوصا بعد اعتلاء صدارة جدول ترتيب الدوري وفرق بينه وبين الأهلي نقطة واحدة لصالح القلعة الحمراء لو فاز كل الماتشات المؤجلة.
وكمان بيراميدز رفض رحيل أي لاعب من الأعمدة الأساسية للفريق عشان عايزين يفرضوا حالة من التركيز على اللعيبة ومحدش منهم يلتف لأي عروض سواء داخلية أو خارجية… ويجددوا عقود اللعيبة اللي قربت تخلص وأهم طبعا رمضان صبحي المطلوب في نادي الزمالك.
ووعدت إدارة بيراميدز اللاعبين والجهاز الفني بصرف مكافآت مالية كبيرة في حالة التتويج بلقب الدوري خصوصا أن الكل حاسس أنه يقدر يحقق أول لقب وبطولة في تاريخه.
