إغراءات بالملايين وفلوس ملهاش أول من آخر.. وزي ما جابوا رونالدو وكريم بنزيما ونيمار عينهم دلوقتي على مدرب الأهلي مارسيل كولر اللي عايزينه بالمبلغ اللي يحدده هو والكابتن محمود الخطيب.. لكن المدرب السويسري رد بـ3 كلمات حسمت مستقبله وفاجئت الخطيب ومجلس إدارته.. أيه حكاية العرض السعودي الضخم المقدم لكولر؟.. وأيه اللي بيحصل بين تركي آل الشيخ والخطيب؟.. ده اللي هنعرفه مع بعض في “عرب 22”.
مارسيل كولر المدرب السويسري اللي بيكتب التاريخ مع الأهلي دلوقتي قدر يحقق 8 بطولات آخرها دوري أبطال إفريقيا اللي خده من الترجي وقبلها من الوداد المغربي ده غير كاس مصر اللي خده من الزمالك الغريم التقليدي.
سجل البطولات الكبيرة خلاه مطمع من الأندية السعودية اللي فتحت خزاينها عشان تجيب أهم لعيبة ومدربين في العالم بعد ما عملوا دوري محترف بجد.. وعايزينه يكون ضمن أفضل 5 دوريات على مستوى العالم.
خالد مرتجي أمين الصندوق في مجلس النادي الأهلي اتكلم عن عرض سعودي ضخم وصل لمارسيل كولر ورفضه عشان يكمل مع الأهلي، وقال: “كولر جه الاهلى بسبب كلامه مع الكابتن الخطيب وجاله عرض اضعاف اللى بياخده في الاهلى وهو ٨ مليون دولار”.
وبرغم كده رفض بسبب حبه للنادي وطريقه إدارة الخطيب.. الأهلى هو اللى بينجح أى مدرب.. وكولر عايز يعمل بطولات وإنجازات وفيه ناس مشيت من الأهلى مكملتش في السعودية ومشيت.. الأهلى اللى بينجح.. نجح كولر وقبل موسيمانى ومانويل جوزيه اللي معملوش حاجة بعد ما مشيوا”.
مارسيل كولر مدرب عنده إمكانيات كبيرة للغاية، والدليل إنجازته مع الفريق في الفترة اللي فاتت.. وده من وقت توليه مسئولية القيادة الفنية للفريق بعد المدرب البرتغالي ريكاردو سواريش.
ولسه جايب لينا بطولة دوري أبطال أفريقيا للمرة الـ12 على حساب الترجي الرياضي التونسي وهنوفر ليه كل اللي عايزه عشان ينجح في الفريق ويعمل أرقام كويسة في كاس العالم للأندية.
وصل عرضين لكولر واحد من الهلال والتاني من الشباب اللي عرض 8 مليون دولار.. وتواصل المسئولين في النادي السعودي مع وكيل كولر اللي قدم ليه عرض بـ8 مليون دولار ويدفعوا الشرط الجزائي الموجود في عقده مع النادي الأهلي..
وكمان يعوضوا كولر عن الباقي في عقده مع الأهلي لو حصل ليه إقالة قبل ما يخلص تعاقده.. ويدفعوا الشرط الجزائي الموجود في عقده مع الأهلي واللي بيوصل لـ3 شهور.
لكن كولر رفض عرض نادي الشباب وقال: “مش هسيب الأهلي”.. وده اللي فاجئ الكابتن الخطيب وقال إزي مدرب يرفض مبلغ زي ده ويكمل مع الفريق.. ومنحه كل الصلاحيات عشان يعمل اللي عايزه في الفريق ويحقق مشروعه مع الأهلي في أنه يكون مدرب أسطوري.
وده اللي أكده دينو لامبرتى، وكيل كولر اللي قال أنه رفض عرض خرافي وعلاقته مع الخطيب هي السبب فى تجديد التعاقد مع الأهلى لأنها نادر ما بيحصل أن رئيس النادي يمنح الحرية دي كلها لمدرب.. كولر كان هيكون من أعلى المدربين راتب في السعودية.. لكن هو سعيد في الأهلي
مصادر قالت إن أندية في الدوري السعودي عايز تاخد كولر و3 لعيبة من الأهلي هما الحارس محمد الشناوي وإمام عاشور نجم خط النص ومعاهم المالي آليو ديانج وعرضوا مبالغ كبيرة عشان يشتروهم من الأهلي وفي المقابل المستشار تركي آل الشيخ رئيس هيئة الترفيه هيدعم الأهلي بنجم النصر كريستيانو رونالدو والسنغالي ساديو ماني عشان يشاركوا في كاس العالم للاندية 2024 لكن كل ده كلام متداول على السوشيال ميديا وموصلش لعروض رسمية.
