“ده هجاص وبتاع تريند.. ولو معملش كدا مش هيكمل في الأهلي.. وهيمشي.. عمرك شوفت عمرو السولية أو محمد الشناوي بيعمل كدا أو بيطلع في برنامج”.. دول لعيبة كبار وكباتن الأهلي ومعملوش اللي عمله كهربا.. ده الكلام اللي قاله نجم الأهلي بعد تصريحات كهربا ضد شيكابالا بسبب كلامه على إمام عاشور.. مين اللي قال كدا؟.. وليه هاجم كهربا؟.. وأيه موقف الكابتن محمود الخطيب؟.
محمود عبدالمنعم كهربا لاعب النادي الأهلي طلع في التلفزيون مع الإعلامي سيف زاهر وانتقد شيكابالا كابتن نادي الزمالك بعد تصريحاته عن إمام عاشور وقال: “أحد اللاعبين طلع في أحد البرامج قال إن إمام طلب التيشيرت بتاعه. إمام قالي أرد بالنيابة عنه هو في المنتخب ومش هيعرف يرد”.
إمام طلب مني أقول إن ده محصلش بالعكس اللاعب ده 3 مرات يقوله في الملعب “لازم ترجع الزمالك.. لازم ترجع الزمالك”.. بس إمام راعى كبر سن اللاعب ده ومحبش يحرجه عشان سنه الكبير.. إمام قالي: “أنا بلعب في أكبر نادي إزاي ابص لحتة تانية”.
كهربا هنا بيرد على كلام شيكابالا اللي قال فيه: “مقدرش أقول على اللي دار بيني وبين إمام عاشور فى مباراة نهائي بطولة كأس مصر اللي اتلعبت في السعودية.. لكن كل اللي اقدر أقوله إنه طلب القميص بتاعي بعد المباراة”.
تصريحات كهربا زعلت الكابتن سيد معوض نجم النادي الأهلي السابق اللي قال مينفعش اللي عمله كهربا.. وطالما خلصت الـ90 في الملعب مينفعش أي كلمة تتقال.. طبيعي اللي بيحصل في الملعب ميطلعش برة.. اللعيبة اللي موجودة محدش بيحكي عن اللي بيحصل”.
“أي إن كان اللي حصل”.. بنطلع بعدها ونقول محصلش.. والكورة مليانة أسرار والملعب زي أوضة اللبس مينفعش الحاجات اللي فيه تطلع برة.
اللي بيحصل دلوقتي بين كهربا وإمام عاشور وشيكابا.. ده جو مبروك يا جماعة.. جمهور الأهلي مبسوط منك يا كهربا.. واللي عملته ده كلام سوشيال مش أي حاجة تانية.. أنا عايز أشوفك في الملعب وريني هتعمل أيه.. كل ماتشات الديربي بيحصل فيها كلام.
أنا لو هاجمت شيكابالا هطلع بطل قدام جمهور الأهلي.. والعكس هيحصل لو قولت كلام كويس عليه.. فيه لعيبة أساتذة برة الملعب.. والبرامج بتدور على اللعيبة اللي بتحب الترند.. ليه محمد الشناوي وعمرو السولية مش بيطلعوا في البرامج ولا في برامج شهر رمضان.. البرامج دي بتدفع فلوس كتير عشان تجيب اللعيب اللي بيعمل ترند والجمهور ينبسط.. الناس بتستمتع بالكلام ده وشغل قصف الجبهات.
ده نفس كلام الناقد الرياضي أحمد الخضري اللي قال: “إحنا مش ورانا حاجة غير نتتابع الهيافات دي.. فيه لعيبة مش وراها حاجة غير بتهجص.. وده نفس اللي عمله كهربا”.
هو كهربا ولي أمر إمام عاشور عشان يرد مكانه.. إمام مش بيعمل حاجة غير لما ياخد الأذن منه.. حتى لو هيطلع يتكلم أو يتصور مع حد لازم يستأذن منه وده حصل في السعودية.. إمام عاشور عنده صفحة وسوشيال كان يقدر يرد على تصريح شيكابالا بنفسه ويقول الكلام ده محصلش.
الكابتن محمود الخطيب رئيس النادي الأهلي كان موقفه صارم من اللي حصل.. وبلغ الكابتن خالد بيبو يحذر كهربا من اللي بيقوله ومعجبوش كلام كهربا وطلب أن ميتكملش تاني في الموضوع ده ويركز في مستقبله.. وبلغه أن موافق على احترافه في الصيف بس بشرط يجيب عقد كويس.
الكابتن حسين لبيب اتدخل في الأزمة وطلب من شيكابالا ميردش على تصريحات كهربا ويقفل على الموضوع ده.
