الخطيب لما اتعرض عليه العروض رفض وقال: “هنلاقي زيكم فين.. مينفعش تسيبوا الفريق وإحنا داخلين على كأس إنتركونتيننتال وبعدها كاس العالم”.. مين هم اللعيبة اللي رفض الخطيب يمشوا؟.. وأيه حكاية العروض التاريخية اللي وصلت ليهم؟.. ومين اللعيبة اللي قالهم لو عايزين تمشوا هاتوا عروض؟.. ده اللي هنعرفه مع بعض في “قشة لفة بلس”.
الأهلي خلص أفريقيا وخد النجمة الـ12 من هنا.. والعروض نزلت ترف على دماغ مجلس الإدارة من هنا.. وفي الأيام الأخيرة وصل للعيبة الأهلي عروض تاريخية متترفضش لو اتحسبت بالعقل والمنطق.. لكن إدارة النادي ليها رأي تاني وعندها شروط عشان تفرط في النجوم وخاصة لو من التشكيل الأساسي في الفريق.
واحد من اللعيبة اللي جالهم عرض هو النجم المثير للمشاكل والجدل إمام عاشور اللي اسمه كل يوم بيتردد في الإعلام وعلى السوشيال ميديا..ومصادر قالت إن اللاعب جاله عرض من نادي من أندية القمة في الدوري السعودي وعايزين يتعاقدوا معاه.
النادي السعودي عايز إمام في الموسم الجاي والعرض بقيمة 240 مليون جنيه.. لكن الأهلي رفض مسألة رحيل نجم خط النص مهما كانت المغريات.. والكابتن محمود الخطيب قاله: أنت لسه معملتش حاجة مع الفريق.. مكملتش سنة وعايز تمشي.. لما نستفيد منك وتقعد معانا كام سنة تحقق بطولات للفريق نبقي نشوف الموضوع ده.. إحنا مش نادي استثماري عشان نشتريك ونبيع.. الأهلي نادي بطولات.
الخطيب قال لإمام عاشور أنت خدت بطولة أفريقيا مع الفريق وده أول المشوار مش نهايته والفريق محتاجك في البطولات الجاية ودي مهمة بالنسبة لينا.. وعايزين ناخد تصنيف عالي بين الأندية العالمية اللي هتشارك في كاس إنتركونتيننتال.
وفيه مصادر في النادي الأهلي نفت الموضوع من الأساس وقالت إن النادي موصلوش أي عروض نهائية لضم إمام عاشور وهو بيعيش أسعد فتراته في القلعة الحمراء وحقق 3 ألقاب في أقل من 10 شهور.. وعايز يكتب التاريخ بقميص النادي الأهلي.
اللاعب التاني اللي رفض الخطيب أنه يمشي هو الحارس الشاب مصطفى شوبير واللي القدر خلاه حارس مرمى الأهلي في فترة صعبة بعد إصابة محمد الشناوي مع منتخب مصر.. وقدر يتألق مع الفريق وبقي عنصر أساسي في تتويج القلعة الحمراء بدوري أبطال إفريقيا للمرة الـ12 وعمل أرقام قياسية في البطولة.
وجاله عرض مغري من نادي في الدوري السعودي خاصة بعد التألق في بطولة أفريقيا.. لكن الكابتن الخطيب رفض بشكل نهائي وقاله أنت مستقبل النادي وكمل في الفريق واعمل زي محمد الشناوي.
مصطفى شوبير اتكلم عن الرحيل من الأهلي وقال: “فكرت كتير أني أخرج للإعارة عشان أشارك في المباريات.. وكانت كل مرة اترفض من جهات مختلفة سواء المدير الفني أو لجنة التخطيط.. ورغم أني كنت شايف نفسي في حاجة للمشاركة.
والكابتن محمود الخطيب كان من أكتر الناس اللي رافضة الإعارة وكان شايف أني هكون حارس مميز.. واتكلمت مع أمير توفيق مدير التعاقدات.. لكنه قالي إن الخطيب رافض الإعارة أو الرحيل”.
لكن اللعيبة اللي الخطيب وافق علي رحيلها من الأهلي هم محمود كهربا اللي جاله عرض من السعودية ولسه الأمر متحسمش وإدارة التخطيط عايزة تمشيه ومارسيل كولر وافق على رحيله.. ومعاه النجم المالي آليو ديانج اللي وصل الأهلي عرض رسمي من السعودية وكولر قال للإدارة إنه معندوش مشكلة أنه يمشي.
وأخيرا الحارس محمد الشناوي اللي الأهلي معندوش مشكلة أنه يحترف في الخليج لو جاله عرض مالي مغري تقديرا لدوره مع الفريق.
