ياسين حافظ نشر صورته مع إمام عاشور في البحر على ستوري إنستجرام وعليها أغنية حراق.. وكأنه قاصد يغيط جماهير الزمالك اللي عايزاه الإدارة تطرده برة النادي.. لكن المفاجأة أن أخو مرات إمام عاشور هيعمل كوبري بنفسه عشان يرجع على الأهلي في السنة الجديدة.. أيه الجديد في موضوع شقيق زوجة إمام عاشور؟.. وليه بيعمل كدا مع جماهير الزمالك؟.. وأيه موقف الكابتن حسين لبيب ومحمود الخطيب؟.. ده اللي هنعرفه مع بعض في “عرب 22”.
إدارة الزمالك قالت إنها هتاخد القرار الصح في أزمة ياسين حافظ.. واللاعب اعتذر عن تهنئته لإمام عاشور بعد فوزه ببطولة دوري أبطال أفريقيا لأول مرة في تاريخه.. بس ناشئ الزمالك رجع ونشر بوست تاني على ستوري إنستجرام ومعاه أغنية الحراق.
وده اللي زعل واستفز جماهير الزمالك من تاني.. والجمهور مصمم على موقفه يغور من نادينا مش عايزينه لو كان هو مين.. عايز الأهلي يروح إحنا مش عايزين عيال معانا.
ياسين حافظ كابتن فريق 2005 قال: “تهنئتي لإمام عاشور طبيعية وفيه شخص في النادي بيدور على اللقطة.. والإسكرين اللي نشرها إمام عاشور بالرد على أحد الأشخاص مفبرك.. ومش حقيقي”.
لكن والده ناشئ الزمالك فجر مفاجأة عن مستقبل اللاعب وقال: أنا هاخده معايا الإمارات وهيلعب هناك ونشوف شغلنا.. ياسين هو كابتن فريقه في نادي الزمالك.. وهو أكثر لاعب في جيله خد بطولات، وتم استبعاده بفعل فاعل”.
“بعض المدربين في نادي الزمالك عايزين يركبوا الموجة عشان كدا استبعدوا ابني وهو اللاعب الوحيد اللي منضمنش للفريق الأول.. ياسين معندوش عقد في الزمالك.. وعنده عرض من نادي في الإمارات.. وهيروح الأسبوع الجاي عشان يلعب هناك”.
إحنا عيلة زملكاوية ومنقبلش التشكيك في انتمائنا لنادي الزمالك.. وبلغوا ياسين مع بداية الموسم أنه موقوف 5 ماتشات من غير سبب.. واستبعدوه من دورة زد بفعل فاعل.
لكن مصادر قالت إن إمام عاشور لاعب النادي الأهلي ظبط كل الأمور لأخوه مراته عشان يجيبه معاه في النادي.. ومنتظرين يشوفوه في النادي الإماراتي ويقيموه.. ولو أقنع المدرب السويسري مارسيل كولر الأهلي هيتعاقد معاه وده شرط الخطيب لازم ينسي اللي بيعمله في الزمالك ويلتزم بمبادئ النادي.
الكابتن محمود الخطيب مش عايز يدخل بشكل مباشر في الصفقة عشان العلاقات الكويسة بين الناديين ومش عايز يخاطر بالعلاقة مع الكابتن حسين لبيب عشان لاعب هو مش عارفه مستواه أيه.. وممكن يبقي لاعيب على قده.. وعارف ومتأكد أن مجلس الزمالك مش هيفرط في لاعب مبشر زي اللي حصل مع أحمد فتوح اللي تمرد على النادي لكن قدروا يتحكموا فيه ويقنعوه يجدد عقده حسب الشروط اللي حطها النادي.
محمد طارق عضو مجلس الزمالك رد على موقف ياسين حافظ وقال: “كمشجع شايف أن ياسين حافظ اختار التوقيت الغلط عشان يهنئ زوج شقيقته إمام عاشور.. وبالتالي اللي عمله استفزاز لجمهور الزمالك.. أما بصفتي عضو مجلس إدارة، فاللاعب تحدث بشكل عام وتقدم باعتذار، والملف بالكامل مع الكابتن حسين السيد عضو المجلس هو والمختص بقطاع الناشئين”.
المدرب البرتغالي جوزيه جوميز مطلبش تصعيد ياسين زي ما اتقال.. وكل اللي بيتردد أن اللاعب تم حرمانه من التصعيد للفريق الأول بسبب علاقة النسب بينه وإمام عاشور مش صحيح.. مجلس الزمالك معندوش خصومة مع اللاعب، لكنه تصرف بشكل خاطئ.. وفي نفس الوقت هو ابن من أبناء النادي”.
واحد من أعضاء مجلس الإدارة قال: “يا جماعة ده لاعب عادي ومش مؤثر أصلا في فريق مواليد 2005.. وفي رأيي خليه يمشي أو نشوف الجهاز الفني هيقول أيه لو عايزة.. يكمل عادي.. ولو مش شايفة.. مؤثر هنمشيه.. إحنا لازم ناخد موقف
في الموضوع ده علشان الجمهور جايب آخره”.
