كولر قال للمسئولين في الأهلي.. مش عايز اللي يقلب وشه.. اللي هيعمل مشاكل يشوف مصلحته.. عايز اللي يساعد الفريق مش اللي كل شوية يتقمص ويسبب أزمة.. بس ده معجبش اللعيبة اللي منهم اشتكي وطلب ياخد فرصة.. لكن المسئولين قالوا المدير الفني هو اللي المسئول عن قائمة الفريق وهنعمل اللي عايزه.. الصدمة جت من ابن النادي اللي قالهم هعمل زي ناصر ماهر واروح الزمالك وهتندوا عليا.. مين اللي قال كدا؟.. ومين هم اللعيبة اللي هتمشي؟.. ده اللي هنعرفه مع بعض.
بعد التتويج بالأميرة السمراء رقم 12 في تاريخ الأهلي.. بدأ مارسيل كولر يفكر في اللعيبة اللي هتمشي واللي هتقعد معاه في الموسم الجديد.. وخد القرار اللي هيزعل كتير من لعيبة المارد الأحمر.. لكن ده حال الدنيا.. وقال للجنة التخطيط إن الفريق فيه لعيبة مش عايزهم.. والأفضل ليهم يمشوا بدل وجودهم اللي ملوش لازمة.
التقرير اللي قدمه كولر للإدارة عن اللعيبة اللي هتمشي طلب من المسئولين يمشوا بيع نهائي مش إعارة عشان ليهم بدايل كتير في الفريق.. وأولهم الرباعي المعار مصطفى البدري ومحمد مغربي اللي موجودين مع فريق سموحة ومصطفى سعد ميسي اللي معار لفريق زد.
المفاجأة هي طلب كولر عدم رجوع عمار حمدي المعار للمقاولون العرب.. لكن اللاعب قال إنه لو مشي هيروح الزمالك ويعمل زي ناصر ماهر لاعب الأهلي السابق اللي متألق مع القلعة البيضاء وبيقدم أداء كويس من وقت انتقاله من فيوتشر للزمالك.
عمار قال طالما مش عايزني سبوني أشوف مستقبلي براحتي واختار النادي اللي هلعب ليه.. وزعل لاعب الاتحاد عشان مش أول مرة يطلبوه منه يطلع إعارة.
نجم الأهلي قال إن بداية الموسم أمير توفيق مدير التعاقدات اتكلم معاه.. وحس أنهم مش عايزينه في الفريق وعشان كدا طلبت أمشي.. وباقي في عقدي 4 مواسم مع النادي الأهلي.. وأنا بعمل اللي عليا عشان أرجع لكن لو مشيت وارد اروح الزمالك إحنا في عصر الاحتراف.
كولر برر في قراره اللي خد دلوقتي رغم أن الموسم لسه مخلصش.. وقال إن هدفه الأساسي اللعيبة تكون مرضية عشان ملهمش مكان في الفريق الفترة الجاية.. لو رجعوا مش هيلاقوا أي عائد عليهم.. وعايز يضم عناصر جديدة تقدم أداء متميز.. ويكون ليهم دور مؤثر في الفريق.. بدل من الجلوس على دكة البدلاء من غير مقابل.
كمان المدرب السويسري خد قرار رحيل أنتوني موديست المهاجم الفرنسي.. ووجه الشكر ليه على الفترة اللي قضاها في صفوف الأهلي خاصة بسبب عدم التجانس التام في الأداء مع اللاعبين الموجودين في الأهلي.
وكمان اللعيب المفاجأة هو بديل علي معلول الباك الشمال المصاب والمفروض ياخد فرصته لكن كولر قرر يمشيه وهو كريم الدبيس اللي مش بيشارك رغم أن مكانه فاضي لكنه مستغلش الفرصة اللي جت ليه.
المدير الفني للقلعة الحمراء بيدور على بدائل قوية في الفريق في الجانب الشمال عشان تسد الفراغ اللي سابه علي معلول اللي اتصاب في ماتش الترجي التونسي بدوري أبطال أفريقيا وهيغيب لمدة 9 شهور.. ده غير الأزمة الموجودة في تجديد عقده مع الأهلي واللي لسه المفاوضات مخلصتش
إدارة الأهلي عايزة تجدد لمعلول لكن لسه مختلفين على المقابل المادي وعدد السنين اللي هيقضيها في الأهلي كلاعب.. هو عايز سنتين والأهلي قال سنة واحدة.. قولنا أيه رأيك في قرار كولر برحيل اللعيبة؟
