الأهلي خد فلوس دوري أبطال أفريقيا وناوي يشبرق على مارسيل كولر.. وهيجيب ليه صفقات عالمية عشان يستعد ويجهز نفسه لبطولة كأس انتركونتيننتال اللي هيبقي الأهلي فيها هو أول نادي مصري وأفريقيا.. لكن مين هي الصفقات دي؟.. ومين الـ5 نجوم المستهدفين؟.. وأيه موقف رونالدو وساديو ماني؟.. ده اللي هنعرفه مع بعض يلا بينا.
مارسيل كولر المدير الفني للأهلي لما سأله إبراهيم فايق لو الكابتن الخطيب اداك ميزانية مفتوحة عشان تشتري اللعيب اللي عايزه هتجيب مين.. ضحك ورد عليه قال بس الخطيب مش هيعمل كدا.. لكن المهندس عدلي القيعي فجر مفاجأة عن استعدادات الأهلي لمونديال أمريكا 2025 وبطولة كاس انتركونتيننتال.
أول صفقة للأهلي شبه اتحسمت بشكل رسمي بعد ترشيح لجنة التخطيط هو الجزائري زين الدين بلعيد مدافع اتحاد العاصمة.. عشان يسد العجز اللي هيسيبه محمد عبدالمنعم اللي ناوي على الرحيل آخر السنة.
مصادر مقربة من النادي الأهلي قالت إن الصفقة شبه اتحسمت بعد ما توقيع النجم الجزائري للقلعة الحمراء عشان ينضمن في الصيف الجاي خاصة أن كولر مرحب بالصفقة وشايفه هيعوض غياب محمد عبدالمنعم.
أزمة بسيطة بتقابل الأهلي في الصفقة وهي رفض المسئولين في اتحاد العاصمة المبلغ المالي المعروض من الأهلي واللي بيوصل لـ700 ألف دولار.. وهما عايزين ياخدوا مليون و400 ألف دولار.
ويحطوا بند في العقد بينص على حصول النادي الجزائري على نسبة 20% من بيع اللاعب في المستقبل لأي نادي.. لكن أبوه زين بيضغط عشان يقلل المقابل اللي ممكن يوصل لـ800 ألف دولار أو مليون بكتيره.
المهندس عدلي القيعي مدير شركة الكورة قال إحنا بنستعد للخطوة الجاية وهى المشاركة في كأس العالم للأندية.. وجماهيرنا عايز ندعم صفوفنا بأفضل العناصر.. وهنعمل ده في الفترة المقبلة.
بس الأمر مش متعلق باللاعبين أصحاب الأسماء الكبيرة.. المهم في تحقيق البطولات هو التجانس بين اللاعبين وشعف اللاعب وهدفه مع الفريق.. وشوفوا الفرق الكبيرة اللي دعمت بلاعبين الأقوياء.
كريستيانو رونالدو ظاهرة لوحده.. عكس كريم بنزيما في اتحاد جدة ونيمار في الهلال، ورياض محرز في أهلي جدة معملوش حاجة في السعودية وملهمش تأثير.. لاعب زي رونالدو في النصر عنده سمات شخصية تخليه مش بيشبع من البطولات ولو قدرنا نتعاقد معاه هنجيبه فورا.
كلام عدلي القيعي جه بعد التقارير اللي قالت إن المستشار تركي آل الشيخ رئيس هيئة الترفيه السعودية عايز يدعم الأهلي بالنجم السنغالي ساديو ماني ويمكن نشوف لعيبة عالمية زيه في الأهلي.
كمان الأهلي ناوي يضم النجم المغربي يحيى عطية الله اللي بيحترف في روسيا.. وده بنسبة كبيرة هيكون موجود بدل التونسي علي معلول اللي الإصابة حرمته مع اللعب للأهلي لمدة 9 شهور على الأقل.. وبنسبة كبيرة الأهلي مش هيجدد ليه العقد.
وعايز يجهز بديل قوي يسد في خط الدفاع ويشارك في كاس العالم.
الصفقة الرابعة هو تيبوهو موكوينا، نجم خط النص في صن داونز الجنوب إفريقي اللي هيكون مكان أليو ديانج وعشان يبقي خط النص في الأهلي كله حريفة زي إمام عاشور ومروان عطية والدبابة موكوينا.
الأهلي عايز يضم مهاجم قوي عشان يعوض رحيل الفرنسي أنتوتي موديست اللي الأهلي قرر أنه مش هيجدد ليه في الصيف الجاي ولحد دلوقتي لسه مستقرش على لاعب معين ومرشح يكون موجود أحمد أمين قفة لاعب نادي إنبي أو أسامة فيصل نجم الزمالك السابق ولاعب البنك الأهلي اللي اتعرض على كولر ومرحب بوجوده.
