خد قرار إيقاف بسبب تناول مواد ممنوعة على الرياضيين.. واستبعد من قايمة منتخب مصر اللي هتشارك في تصفيات كاس العالم.. مش بس ده جالته صدمة جديدة في مستقبله.. عرفتوا طبعا إحنا بنتكلم عن مين.. هو رمضان صبحي نجم فريق بيراميدز أهم موهبة في مصر خلال الفترة.. وللاسف اتدمرت بالقصد.. من بعد ما ساب الأهلي والدنيا معاه ملطشة خاصة في الكورة.. لكن فيه صدمة جديدة اتعرض ليها رمضان صبحي بعد قرار إيقافه.. أيه اللي حصل ده اللي هنعرفه مع بعض في “عرب 22”.
للمرة التانية الإعلامي أحمد شوبير يقول كلمتين والدنيا تتقلب رأسا على عقب ونعرف بعد حوار رمضان صبحي.. شوبير كتب على فيسبوك “إيقاف لاعب مهم”.. وبعدها عرفنا أنه طلع قرار من الوكالة المصرية لمكافحة المواد الممنوعة بإيقاف رمضان صبحي عن ممارسة كرة القدم لفترة مؤقتة.. والكابتن حسام حسن المدير الفني للفراعنة استبعده من قايمة منتخب مصر اللي هتلعب في التصفيات.
نادي بيراميدز طلع واتكلم عن الأزمة وقال جالنا خطاب من إحدى لجان اتحاد بإيقاف رمضان صبحي بشكل مؤقت.. لحد ما تعقد جلسة استماع معاه وده هيكون على أقصى تقدير 6 يونيو الجاي.. وإحنا معانا مستندات تثبت عدم تورط اللاعب في تعاطي المواد الممنوعة.. ورمضان صبحي جاهز للمثول قدام لجنة الاستماع في لجنة المكافحة اللي هتاخد قرار بعد يوم 6 يونيو.
لكن المفاجأة اللي فجرها الصحفي أحمد عبدالباسط اللي اتكلم عن إيقاف رمضان صبحي وقال إنه لاعب بيراميدز خد إيقاف مؤقت.. بس بعيد عن رمضان صبحي أو أي لاعب يتوقف في تساؤل مهم: ️”لاعب أرسل رده على موضوع إيقافه للمنظمة المصرية في ٩ إبريل الماضي.. ليه يطلع القرار بعد كل المدة دي.. واللاعب موجود في قائمة المنتخب استعدادا لتصفيات لكأس العالم؟.. وجهة نظري موضوع رمضان صبحي بالذات عليه علامات استفهام كتير”.
عشان يفتح التكهنات على علاقة اللاعب بالنادي الأهلي.. والتلميحات تيجي على المسئولين الأهلاوية في لجان اتحاد الكرة اللي بيتعمدوا يعطلوا مسيرة اللاعب ويفشلوه وكل ما يبقي جاهر وبيقدم أداء كويس مع فريقه.. ويكون أول انضمام ليه مع حسام حسن في المنتخب بعد غيابه عن المشاركة مع المدربين السابقين يقوموا يخترعوا ليه مشكلة ويعطلوه.. وكان الأهلي بيعاقب على أنه ساب النادي وراح بيراميدز.
مش بس دي المشكلة اللي بيواجها رمضان صبحي.. ده المسئولين في نادي الزمالك صدموا اللاعب وبيفكروا يلغوا فكرة التعاقد معاه عشان المشاكل الكتيرة اللي بيقع فيها ده غير شايفين أنه فيه مماطلة من اللاعب ومش محدد هو عايز أيه.
المسئولين في الزمالك شايفين أنه يقدروا يوفروا الحماية للاعب.. وجماهير الزمالك هتقف معاه وتساعده يعدي المرحلة دي.. لكن اللاعب لسه مش حاسم موقفه عشان تيجي الأزمة الأخيرة وتبعده عن القلعة البيضاء.
رمضان صبحي باقي سنة واحدة في عقده مع فريق بيراميدز ومش راضي لحد دلوقتي يجدده رغم المفاوضات والمغريات الكتيرة اللي قدمتها ليه إدارة بيراميدز عشان يكمل معاهم.
الكابتن إكرامي الشحات، نجم الأهلي السابق وحما رمضان صبحي اتكلم عن النادي الجديد اللي هيروح ليه.. وقال: “كل واحد ليه وجهة نظر، وأنا عند رأيي أن رمضان صبحي من أفضل اللعيبة في الوقت الحالي، ومستقبله يعلمه ربنا وحده، وكل شيء وارد في كرة القدم”.
لكن لما رمضان صبحي لما اتسأل عن الاعتذار للأهلي عشان يرجع قال إن مش بيرد على الكلام اللي بيتقال ولا بيشغل باله بالحاجات دي.. واللي عايز يقول حاجة يقولها ما هو قال حاجات قبل كدا ومطلعتش صح فعشان كدا مش هرد عليه
