لو ملعبتش هروح الزمالك.. أنا مش جاي عشان أدخل في صفقات تبادلية.. يا أخد فرصتي يا تسبوني أمشي.. ده اللي قاله نجم الأهلي للمسئولين في الفريق اللي طلبوا أنه ينتظر لحد ما يشوفوا الصفقات اللي عايزينها ويروح في الفريق اللي هييجي منها لعيبة للقلعة الحمراء.. لكن هو طلب يلعب وياخد فرصة زي باقي زمايله وحاسس بالظلم.. مين هو النجم اللي هدد المسئولين في الأهلي بالزمالك؟.. وليه بيتحدى كولر؟.. وإزي صدم الخطيب اللي قال عليه هيكون نجم المستقبل؟.. ده اللي هنعرفه مع بعض في “قشة لفة بلس”.
الأهلي مليان بالنجوم وفيه وبدل التشكيل 2 و3 لكن الأزمة اللي بتواجه مارسيل كولر المدير الفني للفريق هو اللعيبة اللي عايزة تاخد فرصتها.. وهو مش عارف يلاعب مين ولا مين.. ومهما عمل تدوير بين اللعيبة فيه برضو نجوم مظلومة ومش عارفين ياخدوا فرصتهم.. ولما جم للأهلي من فرقهم كانوا مكسرين الدنيا وفجأة لقيوا نفسهم قاعدين على الدكة أو حتى برة قائمة الماتشات خالص.
ده اللي حصل مع خالد عبدالفتاح الباك اليمين في الأهلي اللي جه من سموحة وكان متألق مع النادي السكندري.. والمهندس فرج عامر مرضيش يخليه يروح الزمالك.. واداه لصاحبه الكابتن محمود الخطيب.. إعارة بنية البيع.. ولما نجح في الفترة اللي قعدها مع الأهلي اتحول عقد الإعارة لبيع نهائي.
خالد عبدالفتاح دلوقتي مش بيلعب مع الأهلي وقعد مع مارسيل كولر وقاله إنه عايز ياخد فرصة ويجربه تاني.. لكن كولر قاله اتدرب كويس.. طبعا عدا وقت كتير وبرضو مفيش حاجة حصلت.
بعدها قعد مع الكابتن خالد بيبو مدير الكورة في الفريق وقاله إنه عايز أمشي في آخر السنة لو مش هلعب.. وهروح الزمالك.. وده نفس الكلام اللي قاله للإعلامي المقرب من مجلس إدارة الأهلي أحمد شوبير.
خالد عبدالفتاح قال إنه معندوش مشكلة يروح الزمالك وشرف لأي لعيب أنه يلعب معاهم ومش شايف أي أزمة في الأمر ده.. وده الأمر اللي فاجئ أحمد شوبير وقاله: “أول واحد يتكلم بصراحة كده.. وأنا شايف إن مفهاش أي أزمة”.
خالد عبدالفتاح اتكلم عن علاقته بمارسيل كولر وقال إنها كويسة لكن منتظر ياخد الفرصة.. خاصة أنها لما جت ليه قبل كدا نجح في استغلالها.. وده حصل في ماتش الزمالك في الدوري اللي فاز بيه الأهلي.. كولر قالي أنا معنديش قلوب دفاع وعايزك تلعب في المركز ده.. رديت عليه وقولتله لعبته قبل كدا مع سموحة.
وأنا تحديت نفسي وكنت حاسس بالقلق عشان الغيابات الكتيرة ولعيت قدام سيف الجزيزي والجول الأول اللي جبناه ريحنا كتير وخدت الثقة وبعدها احتفلت مع محمد الشناوي كابتن الفريق اللي قالي: “دي بداية كويسة بالنسبة ليك وهتكمل مع النادي.. ومضيت عقد انضمامي للأهلي نهائي لمدة 4 سنين”.
كان جالي عرض من نادي بيراميدز وقت مفاوضات الأهلي.. لكن كنت اديت كلمة للمسئولين في الأهلي ومروحتش.. والكابتن الخطيب قالي إن هكون ضمن مستقبل النادي.
خالد عبدالفتاح انضم لفريق الأهلي من سموحة في شهر يوليو سنة 2023، وقدر يحقق معاهم بطولات زي الدوري المصري، وكأس مصر، ودوري أبطال أفريقيا والسوبر المصري مرتين.
وبسبب اللعيبة الكتيرة اللي في مركزه زي محمد هاني الباك الشمال الأساسي للفريق ومعاه عمر كمال عبدالواحد وأكرم توفيق خرج من حسابات مارسيل كولر اللي بيعتمد على هاني أو عمر كمال في الماتشات المحلية.. ومرضيش يروح لفريق فيوتشر ضمن الصفقة التبادلية اللي جه فيها عمر كمال للأهلي.
