“الأهلي ملعبش كورة بـ3 جنيه كورة.. ومعرفش الترجي وصل لنهائي أفريقيا إزاي.. وإمام عاشور عليه ضربة جزاء.. وأنا مش من الكونغو”.. ده اللي قاله الكابتن رضا عبدالعال نجم الأهلي والزمالك السابق بعد تتويج الأهلي ببطولة دوري أبطال أفريقيا على حساب الترجي التونسي.. وفتح النار على مدرب ولعيبة الأهلي والأداء اللي كان في الماتش.. أيه اللي حصل؟.. وليه رضا عبدالعال أنا مش كونغولي؟.. وإمام عاشور عمل أيه عشان ينتقده؟.. ده اللي هنعرفه مع بعض في “قشة لفة بلس”.
الأهلي خد الأميرة السمراء للمرة الـ12 في تاريخه بعد أداء مش قد كدا في الملعب.. وبعدها الإعلامي محمد الليثي جاب الكابتن رضا عبدالعال في مداخلة على راديو “أون سبورت” وسأله عن رأيه في الماتش وأداء المارد الأحمر.
رضا عبدالعال قال مبروك لمصر الأهلي والزمالك قدروا يسيطروا على أفريقيا.. وخدوا دوري الأبطال والكونفدرالية.. لكن أنا لأ أومن بمقولة “النهائيات تكسب ولا تلعب”.. أومال إحنا بنتدرب طول السنة ليه.. مش عشان نقدم أداء وكورة كويسة في الملعب.
في مباراة الأهلي والترجي.. الجماهير قاعدة من بعد 3 دقائق حاطة أيدها على قلبها خايفة تلبس جون.. فرقة الترجي دي ضعيفة جدا ومعرفش وصلت نهائي إزي.. وأنا قولت قبل كدا: “لو فيه فرقة قوية الأهلي هيعاني ومش هياخد البطولة.. زي صن داونز.. لكن لو صن داونز خرج مبروك على الأهلي البطولة”.
رضا عبدالعال قال فوز الأهلي ده من عند ربنا اللي مرضيش يزعل جماهير الأهلي والزمالك.. الأهلي ملعبش كورة بـ3 جنيه.. وفيه علامات استفهام كتيرة على مارسيل كولر.
إزي واحد زي آليو ديانج مبيلعبش بقاله فترة وفجأة لعب ماتش النهائي.. وكمان طاهر محمد طاهر.. فين رضا سليم.. وفين محمد مجدي أفشة اللي فايق وبيلعب كويس.. ليه مش موجود.. ده يقدر يكسبنا ويمسك كورة أحسن من الموجودين مكانه.
مش عايزين نضحك على نفسنا ولا على الجماهير اللي مش بيفرق معاها غير المكسب بس.. لو اتحسبت ضربة الجزاء على إمام عاشور كان الوضع اتغير لكن الحكم مرضيش يرجع للفار.
محمد الليثي قال فين ده.. الحاجات دي مش بيشوفها غير رضا عبدالعال.. فرد عليه وقاله: “الحاجات دي بيشوفها رضا الحقاني.. وزي ما حصل في ماتش مازيمبي.. الكورة مشوفنهاش غير لما المخرج قعد يعيد فيها”.
وكمان الحكم كان المفروض يطرد لاعب الترجي اللي دخل على رجل مروان عطية لكن مرضيش عشان كدا محسبش ضربة جزاء.
رضا عبدالعال قال الإعلاميين عايزيني أبان ضد النادي الأهلي.. أنا مع الحق.. ومش بجامل حد.. هو إحنا عمي عشان مش بنشوف اللي بتشوفوه.
وقال للإعلامي محمد الليثي: “أنت مبتشوفش كده.. لا مؤاخذة بقي البس نضارة.. وبعدين أقولك على حاجة محدش هينزل معاك القبر.. قول الحق.. عيب مينفعش كده الضلال كده.. أنتوا مبتحبوش الحق.. أنت متقوليش اتفرج على الماتش تاني عشان عيب متقوليش الكلام ده.. إحنا مش عمي.. أقولك على حاجة الضلال حلو والحرام أحلى.. أنت كنت بتتفرج على ماتش تاني ولا ايه”
واتكلم على مبارة السوبر بين الأهلي والزمالك وقال: ماتش السوبر الأفريقي مش فارق معايا أي حد ياخده.. اللي يلعب أحسن ويتعب في الملعب هو اللي يستحق يشيل الكاس.. المهم إن الأهلي والزمالك يلعبوا مع بعض ومحدش من برة مصر ياخده”.
الأهلي خد دوري أبطال أفريقيا للمرة رقم 12 في تاريخه، والزمالك خد الكونفيدرالية للمرة الثانية في تاريخه وهيتقابلوا في السعودية في ماتش السوبر.
