محمد عبدالمنعم عايز 100 مليون جنيه في عقده.. وكتب بوست على إنستجرام علشان يضغط على إدارة الأهلي ويستغل الجماهير وياخد اللي عايزه.. ولما قعدوا يتفاوضوا فاجئهم بشروطه.. أيه هي الشروط دي؟ وليه الكابتن محمود الخطيب لجأ لرئيس نادي الزمالك في أزمة محمد عبدالمنعم؟.. وإزي الأهلي هيحل المشكلة؟.. وهيروح فين؟.. ده اللي هنعرفه مع بعض في “قشة لفة بلس”.
مدافع النادي الأهلي محمد عبدالمنعم لسه عقده مكمل مع الفريق لمدة سنتين لكنه كتب بوست على إنستجرام بيتكلم أنه بيحيي الجماهير.. اللي دعمته وساندته في الفترة اللي فاتت والناس قالت خلاص محمد عبدالمنعم ماشي.. لكن فيه مفاجأة بين السطور ناس كتير متعرفهاش.. وهي أن محمد عبدالمنعم وهو بيعدل عقده اللي كان 4 مليون جنيه.. وبقى 6 مليون جنيه في الموسم.
إدارة الأهلي وعددته شفهيا أنه لو جاله عرض مناسب في أي وقت هيوافق على رحيله.. وتحديدا في نهاية الموسم.. فالكلام عجب محمد عبدالمنعم وجه على هواه.. خصوصا أن عقده مكمل لحد نهاية 2026.. يعني فاضل ليه موسمين مع النادي الأهلي.
ولحد دلوقتي اللاعب موصلوش أي عرض رسمي ونفس الأمر بالنسبة للنادي الأهلي ماجالوش عرض لمحمد عبدالمنعم.. وكل الكلام شفهي من وكلاء أندية.
بس الأهلي اتكلم مع محمد عبدالمنعم على تعديل المقابل اللي هياخده في السنة.. اللي هو دلوقتي 6 مليون جنيه .. وأمير توفيق مدير التعاقدات عرض عليه 30 مليون جنيه في الموسم الواحد.. بس بشرط أن العقد بتاع محمد عبدالمنعم يتمد موسمين أو 3 مواسم تاني.
يعني بدل ما عقده يخلص في 2026 هيخلص في 2029.. الكلام ده معجبش عبدالمنعم اللي قالهم.. تمام الرقم حلو.. ونعدل العقد.. بس نتكلم في موضوع تجديد التعاقد في آخر الموسم اللي جاي.. وهكمل الموسم ده بالفلوس الجديدة.
المسئولين في الأهلي.. قالوا لأ.. تعديل العقد والتجديد هيكونوا مع بعض.. إحنا هنديك مرتب كبير ولازم نضمن إن عقدك مستمر معانا لحد 2029.. والأمور وقفت عند النقطة دي.
والمفاوضات لسه معلقة.. وعبدالمنعم راح كتب الكلمتين على إنستجرام كأنه بيقولهم أنا مش راضي عن اللي بيحصل.. وبيضغط على الإدارة.
لو محمد عبدالمنعم مقبلش شروط الأهلي وركب دماغه هيعملوا زي اللي عمله الكابتن حسين لبيب رئيس نادي الزمالك وقت تجديد التعاقد مع أحمد فتوح اللي كان رافض يجدد عقده.. فهم قرروا تجميد اللاعب وفي الآخر وافق على شروط الزمالك.. وده اللي هيحصل مع عبدالمنعم.
الأهلي عنده مبرر قوي في العرض اللي قدمه لمحمد عبدالمنعم واللي بيوصل لـ100 ألف جنيه إجمالي عقده.. ومبرر الأهلي هو لو قلنا 30 مليون جنيه في السنة يعني تقريبا 600 ألف دولار.. ومقارنة باللعيبة الأجانب اللي زي بيرسي تاو أو علي معلول فالواحد فيهم بياخد مليون و200 ألف دولار أو مليون ونص
يعني بحسبه بسيطة محمد عبدالمنعم هياخد 600 ألف دولار وهو من أهم الركائز الأساسيه في الفريق.. فالرقم مقبول مقارنة باللي بيحصل حواليه.
لكن لو موصلوش لاتفاق .. فالنادي الأهلي هينتظر عرض رسمي يوصل لمحمد عبدالمنعم ويكون قوي وهيفيد النادي ووقتها هيبيعه ويستفيد منه.. ولو مجاش هيكمل الموسمين بالعقد القديم اللي هو 4 مليون جنيه في الموسم.
الإعلامي أحمد شوبير قال: “اللاعب عقده قليل مع الأهلي وباقي ليه موسمين، ولسه سنه صغير.. والفريق قرر تعديل عقده للفئة الأولى ويمدوا لمدة موسمين بس هو وافق على التعديل ورفض التمديد.. عشان عايز يمشي”
لكن المفاجأة أن اللاعب معندوش أي عروض أوروبية في الوقت الحالي.
