بعد ما وقعت في الزمالك المسئولين في الأهلي قالوا إحنا عايزينك.. وصدقتهم.. ووقعت على العقود وتاني يوم لقيتهم عارضيني للبيع.. ليه تعملوا معايا كدا وتخلوا شكلي وحش قدام الجماهير.. ده الكلام اللي قاله عبدالله السعيد على واقعة توقيعه للزمالك أول مرة.. أيه اللي حصل معاه؟.. وإزي الكابتن محمود الخطيب انتقم منه؟.. وأيه علاقة رمضان صبحي بالموضوع؟.. وليه قال أحسن فترة عشتها في الأهلي؟.. ده اللي هنعرفه مع بعض في “قشة لفة بلس”.
عبدالله السعيد نجم نادي الزمالك حكى لأول مرة عن أسرار توقيعه للقلعة البيضاء وقت ما كان بيلعب في الأهلي.. وإزي اتدخل المستشار تركي آل الشيخ في الصفقة عشان يحلها؟
عبدالله قال في سنة 2018 كنت لاعب حر ومن حقي التوقيع لأي نادي، وده السبب اللي خلاني اسمع كل العروض المقدمة ليا.. عرضت على إدارة الأهلي الرقم اللي عايزة، وكان الرد أن ده صعب جدًا ولو عندك عرض أعلى من الرقم ده شوف مصلحتك.
أنا شوفت مصلحتي والفرق كان كبير بين عرض الأهلي للتجديد وعرض الزمالك المقدم ليا، وكان فيه عرض تاني من الخليج بالدولار قريب من عرض الزمالك.. لكن في النهاية اخترت الانضمام لنادي الزمالك في الفترة دي.
بعد ما مضيت الزمالك كلموني في الأهلي وقعدت مع المستشار تركي آل الشيخ ومحمود الخطيب وحسام البدري وعدلي القيعي وقالوا ليا أنت مضيت في الزمالك قولت ليهم: “شوفت مصلحتي”..
تركي آل الشيخ قالهم: أنتوا عاوزين عبدالله ولا لأ؟.. الخطيب قاله: أه.. فالرجل عرض خدمة منه أنه هيخلص الموضوع مع المستشار مرتضى منصور رئيس الزمالك وقتها.. ومضيت معاهم.
لكن تاني يوم كنت في البيت وقرأت في المواقع والصحف أنهم عرضوني للبيع.. وهما كانوا في وشي فيه حب إني أرجع والكلام معايا منهم كان كتير.. لكن في ضهري حصل العكس.
الأندية الكبيرة معروفه أنها بتحافظ علي اللعيبه الكبيرة عندها.. بعد توقيعي للزمالك قالولي إحنا عايزينك.. فصدقتهم وخدعوني.
مصلحتي وقتها كانت مع نادي الزمالك.. والمسئولين هناك رحبوا بضمي وأنا كنت حابب الانضمام للزمالك ووقعت ومضيت علي كل عقودي مع الزمالك.. خلصت عقدي مع الأهلي روحت الزمالك لكن مكنش في تقدير ولا احترافيه زي أي نادي في العالم.
وقت المفاوضات قالوا ليا إن النادي مش عايز يجدد برقم كبير عشان ميحصلش ضرر في سقف رواتب الفريق.. وبعد رحيلي فيه لعيبة جت وخدت رواتب كبيرة والسقف اتضرب.
استحملت غضب جمهور الأهلي بعد رحيلي لأن هما مش عارفين اللي بيحصل.. ومحدش فاهم حاجه وأنا عموما بحترم أي حد.. احترام الناس واجب علينا كلنا.
عبدالله اتكلم عن أصعب بطولة ليه وعلاقته برمضان صبحي وقال: “دوري أبطال أفريقيا 2012 مع الأهلي كانت أصعب بطولة حققتها في مسيرتي.. وأتمنى وجود رمضان صبحي في الزمالك، ولو رجع بيا الزمن كنت هوقع للزمالك وقت وجودي في الأهلي”.
أنا عايز اعتزل بقميص نادي الزمالك وحسيت أن روحي رجعت تاني لما لعبت معاهم.. وأفضل تجربة ليا في الأهلي عشان حققت بطولات.. وكنت رقم 1 عند مانويل جوزيه وكان بيحبيني جداً”.
في انتقالي لأي نادي كنت بعمل لمصلحة أسرتي إلا انتقالي الأخير لنادي الزمالك كان فيه العاطفة.
أول ما مضيت كان عندي شغف البس تيشرت الزمالك واشوف الجمهور داخل الملعب.. أنا بحب جمهور الزمالك.. ونفسي العب كل يوم ماتش عشان أكون شايف الجمهور في المدرج.
عضو مجلس إدارة الأهلي مهند مجدي رد على تصريحات عبدالله السعيد وقال إحنا مش زعلانين على عبدالله ربنا يوفقكم.. والأهم بالنسبة ليا هو الأهلي.. وبقول لجماهير الأهلي بلاش تعبدوا اللعيبة.
