الاختبار الأول لحسام حسن نجح فيه رقميا.. وخد التلات نقط اللي عايزهم من مباراة بوركينا فاسو.. لكن اللي حصل في الماتش ميبشرش بالخير.. ويخوف عشان الفراعنة ظهروا بشكل وحش في الملعب.. ليه أداء منتخب مصر ظهر بالشكل ده؟.. وأيه حكاية المعلمين في المنتخب؟.. وإزي حسام حسن ورط كولر؟.. ومين ثلاثي الأهلي اللي اصطدم بيهم العميد؟.. ده اللي هنعرفه مع بعض في “قشة لفة بلس”.
حسام حسن بدأ أول ماتش رسمي ليه بأكتر من مفاجأة للجماهير أول حاجة هي تغيير طريقة اللعب وبدأ بطريقة 3/4/3 وتاني مفاجأة هي وجود محمد الشناوي في حراسة المرمى على حساب مصطفى شوبير اللي كان متألق مع الأهلي في بطولة دوري أبطال أفريقيا وقاد الفريق لحصد اللقب من الترجي التونسي.
وكمان استبعد عمر كمال عبدالواحد من تشكيل المنتخب الأساسي، وقدر اللعيبة في الشوط الأول يضغطوا على منتخب بوركينا ويسجلوا هدفين في أول 10 دقائق جابهم محمود حسن تريزيجيه.
المفاجأة كانت في الشوط الثاني اللي اتغير أداء المنتخب وحصل تراجع وانكماش للخلف غير مبرر.. وبقي منتخب بوركينا فاسو هو المسيطر وقدر يعمل هجمات منظمة ويسجل هدف في الدقيقة 56.
وحسام حسن عمل تبديلات دفاعية بس.. وظهرت الأخطاء الفنية في المباراة والمساحات كانت كبيرة بين اللعيبة.. واللعيبة مش عارفة تتمركز صح.. ولازم يصلح المشاكل دي قبل ماتش غينبا بيساو اللي هيتلعب يوم الاتنين عشان نضمن الصعود لكأس العالم 2026.
أداء بعض اللعيبة في المنتخب وخصوصا الكبار عليه علامات استفهام كبيرة ولازم تدخل من الجهاز الفني عشان نقدر نكون منتخب قوي قادر على المنافسة واللعب مع الكبار.
لكن اللي عمله حسام حسن ده واضح فيه المجاملات والمحايلة مع اللعبية خصوصا محمد صلاح نجم ليفربول اللي مقدمش الأداء المقنع للجماهير.. والعميد كان مديلة الحرية الكاملة.. بيحرك براحته ومش بيرجع يدافع مع زمايله.. واتحول لشبح في المباراة.
واحد تاني من اللعيبة اللي اتجاملوا هو محمد الشناوي حارس المرمى اللي لعب على حساب مصطفى شوبير اللي لما عرف أنه مش هيلعب مرضيش يحضر المحاضرة الفنية اللي بتكون قبل المباراة.
وده اللي قاله الإعلامي إسلام صادق، إن شوبير غاب عن المحاضرة الأخيرة لما عرفه أن ترتيبه هيكون التالت بعد الشناوي ومحمد عواد.
ولما ظهر الشناوي مهزوز في الماتش ودخل فيه جول، رضا عبدالعال قال إن شوبير معاه حق والشناوي ميستحقش اللعب أساسي.
مشاركة الشناوي على حساب شوبير ورطت الجهاز الفني للأهلي بقيادة مارسيل كولر وهتجبره على أنه يلعب الشناوي ويقعد شوبير على الدكة ومش هيقدر يقول للشناوي اقعد احتياطي تاني.. وده هيزعل شوبير.
من المشاكل اللي ظهرت في منتخب مصر اللي عمله إمام عاشور وقت التغيير ورفضه مصافحة الجهاز الفني.. ورغم أن حسام حسن وأخوه إبراهيم معروف عنهم الصرامة في المواقف اللي زي دي.. لكن إبراهيم حسن طلع برر لإمام عاشور اللي عمله وقال هو وشه عامل زي القطط كدا وهو زعلان عشان الإصابة اللي اتعرض ليها.
وخلينا متفقين إن اللي عمله إمام وشوبير غلط ولازم يتعاقبوا عليه عشان يعرفوا يسيطروا على المنتخب وميحصلش أزمات تاني.. رغم أهمية اللاعبين بس مصلحة المنتخب أهم من أي لاعب.. عشان نقدر نشوف من تاني جيل حسن شحاته من تاني.. وتبقي اللعيبة على قلب رجل واحد.. زي ما عمل المعلم واستبعد ميدو وشيكابالا في عز نجوميتهم.
العميد لازم يشارك كل لاعب في مركزه الأساسي ويرجع يعتمد على عمر كمال عبدالواحد خصوصا بعد غياب أحمد فتوح عن المنتخب.
