هيكتسح الدوري المصري ويوصل لنصف النهائي.. توقعات مثيرة من ليلى عبداللطيف عن مشوار الأهلي ومنتخب مصر في كأس العالم

ليلى عبداللطيف طلعت مع الإعلامي عمرو أديب في برنامج الحكاية واتكلمت بشكل كويس عن نادي القرن الأفريقي.. وقالت: “أري فريق الأهلي في مصر سوف يكتسح الدوري المصري.. كما أري أن مصر ستكون حاضرة في مونديال 2026.. وقد تشكل أكبر المفاجات مع فريق عربي آخر.. وكل الأنظار ستتجه إلى الفريق المصري خلال المرحلة المقبلة”.

عمرو أديب قالها إحنا رايحين المونديال يعني.. وحسام حسن هيقدر يوصلنا لكاس العالم.. قالت أه.

فرد عليها وقالها وكمان الأهلي هيكسب الدوري المصري.. قالت ليه: “ابقوا حاسبوني لو محصلش”.

العرافة اللبنانية كملت كلامها وقالت: “شوارع مصر سوف تمتلى بالجماهير التي أرها تحتفل للمرة الثالثة والرابعة والخامسة بسبب إنجاز رياضي للنادي الأهلي.. وهذا الانجاز سيكون بارز وكبيرة خارج مصر”.

عمرو أديب رد عليها وقالها تقصدي بطولة الإنتركونتيننتال اللي بيقولوا عليها.. فردت: “هو المونديال.. أنا قولت قبل كدا المغرب هيوصل لنص نهائي كاس العالم وده اللي حصل.. نفس الأمر هيكون مع الأهلي.. هيوصل نص نهائي.. وهنزل احتفل في الشوارع في مصر.. والناس هتبقي موجودة زي ما حصل بعد فوز الأهلي بدوري أبطال أفريقيا على الترجي”.

منتخب مصر دلوقتي بيشارك في تصفيات كأس العالم 2026 وشبه حسم مشوار الصعود للمونديال.. ولو كسب ماتش غينيا بيساو هيكون بشكل رسمي في كأس العالم مع الكابتن حسام حسن المدير الفني للفراعنة اللي لعب ماتش واحد رسمي مع المنتخب قدام منتخب بوركينا فاسو وقدر يفوز بنتيجة 2-1.

وكمان الأهلي خلص بطولة دوري أبطال أفريقيا اللي كسبها للمرة الـ12 في تاريخه من الترجي واتفرغ دلوقتي لبطولة الدوري المصري اللي متأجل ليه ماتشات كتيرة.

لكن المشكلة اللي بتقابل الأهلي هو فريق بيراميدز اللي ماشي بشكل كويس في البطولة واستغل غياب الأهلي ومتصدر المسابقة.. بس الأهلي لو رجع وكسب كل الماتشات المؤجلة هيقدر يتصدر البطولة بفرق نقطة واحدة.

وده الكلام اللي بيجهزه المدير الفني السويسري مارسيل كولر اللي قال: “إذا لم يصبح الأهلي بطلا للدوري للمرة الـ44، ستشتعل النار وستحدث مشكلة، لأن الأهلي يمتلك الملايين من الجماهير ومحكوم عليه بالفوز دائما بجميع الألقاب، وإذا نجحت في تحقيق الفوز ببطولة الدوري كل شيء سيكون على ما يرام، وفي حالة الخسارة تتغير الرياح، ومن المستحيل استرضاء الجماهير”.

طبعا مش محتاجين نأكد أن توقعات العرافة اللبنانية والتنجيم ده مجرد كلام.. ومش لازم يأثر على حياتنا خالص ولا ناخد بيه.. مجرد كلام بيتقال والسلام.

هي قبل كدا كانت توقعت أن الأهلي هيخسر لكن لما الجماهير اتقلبت عليها وهاجمتها رجعت في كلامها وقالت أنا معرفش فريق اسمه الترجي من الأساس.. وأنا أهلاوية وبشجع النادي الأهلي.

مش بس الرياضة ليلى عبداللطيف اتكلمت عن مصر وقالت الأزمة الاقتصادية سحابة صيف وهتعدي والأسعار هتنزل.. وهيكون فيه دعم أمريكي أوروبي لمصر بمليارات الدولارات.. وأزمة انقطاع الكهرباء هتتحل في نهاية 2024، ومصر هتكتشف آبار بترول وكنوز دهب وثروات تاريخية في أسوان ومحافظات بالصعيد هتحل الأزمة.