اللعيبة والأندية مش هتشارك في كأس العالم للأندية 2025.. مباراة ريال مدريد الواحدة بتساوي 20 مليون يورو.. والفيفا عايز يدينا المبلغ ده في البطولة كلها”… دول الكلمتين اللي قالهم كارلو أنشيلوتي ومن بعدها الدنيا قامت ومقعدتش.
الناس بتسأل على موقف النادي الأهلي من البطولة الجديدة.. وهل كأس العالم بنظام الجديد هيكمل ولا هيتلغي؟.. وأيه حكاية نحس الزمالك اللي بيطارد الأهلي؟.. وأيه مصير الصفقات القوية اللي عملها الأهلي لو المونديال اتلغي؟.. ده اللي هنعرفه مع بعض في “عرب 22”.
زلزال هز الاتحاد الدولي لكرة القدم “فيفا” بعد تصريحات أنشيلوتي المدير الفني لريال مدريد.. اللي قال فيها إن الملكي مش هيشارك في بطولة كأس العالم للأندية 2025 بنظامها الجديد اللي هتتلعب في أمريكا.
الكلام ده قلق الأهلاوية اللي هيشاركوا في بطولة كاس العالم للأندية وبيجهز ليها الكابتن محمود الخطيب من دلوقتي الصفقات واللعيبة اللي هتشارك معاه في البطولة.
البطولة اتلغت قبل كدا في سنة 2001 لما الزمالك شارك في أول نسخة موسعة ليها واللي كانت المفروض تتلعب في إسبانيا بس شركة “ISL” اللي كانت مديرة للبطولة أعلنت إفلاسها بسبب الديون.. واتأجلت لسنة 2003 وبعدين اتلغت.
ورجعت لوضعها القديم في سنة 2005.. وبسببها الزمالك مشاركش في كاس العالم للأندية وأول مرة يتأهل للبطولة اتلغت فهل ده هيكون مصير الأهلي في البطولة الجديدة واللي الأهلي بيعول عليها الكتير عشان العوائد المالية الكبيرة المنتظرة.
رغم كلام أنشيلوتي فيه مؤشرات تاني بتأكد تعطيل أو إلغاء البطولة.. وآخرها الأنباء اللي بتتكلم عن تداخل في توقيت بطولة كأس العالم للأندية 2025 مع الكأس الذهبية اللي تُعتبر البطولة القارية لدول أمريكا الشمالية والكاريبي.. وفيه اتفاق بأن المونديال يتلعب في ولايات الساحل الشرقي لأمريكا.. ومباريات الكاس الذهبية تتلعب في ولايات الساحل الغربي.
مش بس دي البطولة الوحيدة اللي هيحصل تداخل في الوقت مع مونديال الأندية.. كمان فيه كلام على تأجيل كأس الأمم الأفريقية 2025 اللي هتتلعب في الصيف الجاي في المغرب للشتاء في 2026.. لكن المغرب رفض وقال هنلعب البطولة في الصيف عشان نستفيد منها.
كمان الريال مش عاجبه الشكل الجديد لكاس العالم للأندية.. عشان هتأثر على اللاعبين في الملكي اللي مش هيرتاحوا لمدة 11 شهر بسبب بداية كاس السوبر الأوروبية بدري في 14 أغسطس الجاي.
رابطة اللاعبين المحترفين (FIFPro) انتقدت توقيت البطولة وقالت إن فيفا مش بيهتم براحة اللعيبة ولا يفرق معاهم ضغط المباريات.
ده غير الأرباح اللي الريال شايف إنها مش مغرية خصوصا أن البث التلفزيوني محدش عرض يشتريه غير شركة آبل واللي عرضت مليار دولار.. في الوقت اللي فيفا قال أنه متوقع يوصل سعر بيع البث لـ4 مليار دولار.. ومفيش رعاة كأس العالم للأندية 2025 لحد دلوقتي.
ريال مدريد طلع في بيان وقال إنه هيشارك في المسابقة العالمية زي ما كان مخطط قبل كدا.. وهيسعد عشاقه في العالم.. وهيحاول يتوج بلقب كأس العالم للأندية 2025… والمدير الفني للفريق قال إن التصريحات اتفهمت غلط.
البطولة بنظامها الجديد هيشارك فيها 32 نادي منهم الريال اللي ضمن المشاركة في البطولة من القارة الأفريقية هيشارك الأهلي والوداد المغربى والترجى التونسى وصن داونز الجنوب أفريقى.
وفيه تقارير انتشرت الفترة اللي فاتت عن المقابل المادى اللي هياخده كل نادي وصحيفة إسبانية قالت إن كل شريك هياخد 50 مليون يورو.. و100 مليون للبطل.. عشان يبقي إجمالي المكافآت للبطولة 2.5 مليار يورو.
