في 2019 الأهلي كان في أزمة.. وخارج من فضيحة صن داونز لما خسر بنتيجة 5 صفر ودي أكبر هزيمة قارية لنادي القرن الإفريقي.. الخطيب خد قراره وقال هبني فريق يأكل الأخضر واليابس.. وفعلا رجع ابن النادي وقتها رمضان صبحي من فريق هيدرسفيلد الإنجليزي وخده إعارة وبعدين لما اتألق كان هيشتريه.. بس كلنا عارفين اللي حصل.
ونفس الأمر بيحصل دلوقتي لكن الأهلي المرة دي بيجهز لفريق هيأكل الأخضر واليابس بجد.. وعايز يجيب نجم منتخب مصر المظلوم في الإعلام على طريقة رمضان صبحي.. اللي بيلعب في نفس مركز تريزيجيه.. مين هو؟.. وليه كولر طلبه بالاسم.. وإزي هيغير شكل الأهلي؟.. ده اللي هنعرفه مع بعض في “عرب 22”.
خطة صفقات الأهلي في بطولة كأس العالم للأندية اللي هيشارك فيها الأهلي مع كبار الكورة في العالم سنة 2026 في أمريكا.. هنشوف فيها أسماء كبيرة بيتفاوض معاها النادي الأهلي.. جودة اللعيبة اللي هتيجي الفريق هتبقي عالية جدا.. وأحسن من الموجودين في الدوري المصري.
مارسيل كولر المدير الفني للأهلي.. اتفرج على منتخب مصر وعجبه أداء محمود حسن تريزيجيه ولما عرف أنه من أبناء الأهلي طلب من لجنة الكرة في النادي أنه يجيبوه وقال هو اللي هيغير شكل خط الهجوم في الأهلي.. وهينقل الفريق في حتة تانية.
مصادر قالت إن المفاوضات بين الأهلي وفريق طرابزون التركي بتدور حاليا على استعارة اللاعب عشان يعزز الهجوم في كأس العالم للأندية 2025 اللي هيتلعب في الولايات المتحدة الأمريكية.
كولر شايف إن تريزيجيه عنده إمكانيات هائلة وقدرة على التسجيل في أي وقت.. ووجوده في الفريق هيكون إضافة قوية في البطولة العالمية… وهيكون بمثابة سلاح سري للفريق في المونديال.. وخبرته وتاريخه المميز مع منتخب مصر هيديه ثقة كبيرة في البطولة.
المصادر في النادي الأهلي قالت إن تريزيجيه وافق على رجوعه للأهلي وباقي خطوة واحدة بس هي اللي بتفصله عن اللعب في الأهلي.. وهي موافقة النادي التركي على إعارة اللاعب لنادي القرن.
تريزيجيه لما اتسأل عن رجوعه للأهلي قال: “أنا في فريق كبير وعقدي مستمر لـ3 سنين.. الأهلي مش محتاج لحد.. ولما أحب أرجع هتصل بالنادي.. وأقولهم: أنا عملت كل شيء في أوروبا وعايز أرجع عشان أصنع تاريخ جديد.. مش عشان الاعتزال والتكريم. مش هرجع غير لما أكون قادر على إفادة النادي.. هحاول لأخر نفس في أوروبا.. وعايز لما أشوف نفسي في المراية أقول لنفسي عملت كل حاجة.. ومش هلعب في مصر غير للأهلي”.
تريزيجيه لعب قبل كدا مع النادي الأهلي وحقق مع الفريق 8 بطولات.. توج ببطولة دورى أبطال أفريقيا في 2012 و2013 وبطولة الدورى المصرى مرة واحدة.. والسوبر الأفريقى مرتين.. والسوبر المصرى مرتين.. وكأس الكونفدرالية سنة 2014.. ده غير مشاركته مع الأهلي في كأس العالم للأندية مرتين.. ولو جه هتبقي المرة التالتة اللي هيشارك فيها”.
كاس العالم للأندية 2026 بنظامها الجديد هتتلعب في أمريكا.. وهيشارك فيها 32 فريق.. والأهلي مطالب أنه يحقق إنجاز ميقلش عن حصوله على الميدالية البرونزية.. واللي كان بيحققها في البطولة بشكلها القديم.
تريزيجيه تألق مع منتخب مصر في التصفيات المؤهلة لبطوله كأس العالم.. وقدر يسجل هدفين في أقل من 10 دقائق وقاد الفراعنة لتصدر المجموعة على حساب فريق بوركينا فاسو.
الأهلي حسم أول صفقة في الموسم الجديد بالتعاقد مع المدافع الجزائري زين الدين بلعيد.. عشان يكون أول لاعب في تشكيلة كأس العالم للأندية 2026.
