حاطط رأسك برأس صلاح وهو اللي أنقذنا النهاردة.. ومعرفتش تعمل معاه حاجة.. وطلع شكلك وحش.. وكمان خايف من جماهير الأهلي.. أيه اللي بتعمله في الماتش.. ده كلام الكابتن رضا عبدالعال بعد تعادل منتخب مصر مع غينيا بيساو في التصفيات المؤهلة لكأس العالم.. واللي الفراعنة مقدموش أداء كويس في المباراة اللي اتلعب في غينيا.
ليه منتخب مصر ظهر بالأداء ده؟.. وليه رضا عبدالعال هاجم حسام حسن؟.. وإمام عاشور عمل أيه؟.. وأيه اللي عمله ناصر ماهر في 4 دقائق بتاريخ إمام عاشور؟.. وأيه اللي حصل لمصطفى شوبير بعد الماتش؟.. وإزي رد حسام حسن على رضا عبدالعال؟.. ده اللي هنعرفه مع بعض في “عرب 22”.
منتخب مصر في الماتش الرسمي التاني للعميد حسام حسن اتعادل مع منتخب مصر قدام غينيا بيساو 1-1 وكان قادر يفوز على المنتخب الضعيف لكن المباراة حصل فيها مشاهدة غريبة كعادة ماتشات المنتخب في الفترة الأخيرة.
والأداء السيئ في المباراة وفشل المنتخب المصري في الفوز على غينيا بيساو بيأكد أن فيه خلل عند اللاعبين والجهاز الفني خصوصا أن الكل كان بيتوقع فوز الفراعنة.. والظاهر كدا أن حسام حسن اتعامل باستسهال مع الماتش خصوصا أن مجموعة مصر في التصفيات ضعيفة جدا.
في الماتش محمد صلاح كابتن منتخب مصر.. رفض قرار حسام حسن بخروجه من الملعب في الدقائق الأخيرة.. وجهز العميد مصطفى فتحي عشان يشارك في المباراة لكن صلاح مرضيش يطلع بحجة أن الماتش مفتوح بعد ما جاب جول التعادل ويقدر يسجل هدف الفوز وده اللي قالته صحيفة المصري اليوم.
العميد طلع وانتقد اللي بيهاجموا أداء المنتخب وقال: “أي حد بيتكلم ويشكك فينا اعتقد دول خايفين المنتخب ينجح لكن أنا سعيد للشعب اللي عايز يفرح… أنا شغال علشانهم.. ليه في قلة قليلة عمالة توقع الناس وأي حد بيتكلم على السوشيال ميديا.. إحنا عملنا أفضل اداء لمنتخب مصر من فترة طويلة.. عمر المنتخب ما كان بيعمل الاستحواذ ده بره أرضه”.
أنا فخور بالنجوم بتوعنا بداية من القائد محمد صلاح وحتى أصغر لاعب، وبنلاعب منتخب قوي عندهم 26 محترف وأجساد غير طبيعية.. ضيعنا فرص كتير ومكناش بنلاعب نفسنا ولينا ضربة جزاء.. غيرت في التشكيلة وطريقة اللعب ودخول إمام عاشور غير الشكل بتاعنا”.
الكابتن رضا عبدالعال هاجم أداء منتخب مصر وقال مباراة تعتبر أقل من المتوسط.. والمفروض إحنا نكسب بكل المقاييس وكل الحسابات.. إحنا بنلاعب فرقة مش بيعرفوا يعملوا 3 أو 4 باصات على بعضيهم صح.. مش يجيبوا فينا جول.
“لما تجيب فينا جول تبقى في حاجة مش طبيعية.. إمام عاشور أنا من وجهة نظري كان يتعاقب وميسافرش ويتوقع عليه عقوبة بعد اللي حصل منه الماتش اللي فات.. لكن خوفه من جماهير الأهلي.. خدوهم معاهم.. فين الإصابة اللي قالوا عليها”.
هيبة المنتخب راحت أنا بكلمكم بجد.. وبعد كده أي لعيب ممكن يعمل أي حاجه ويقبلوها.. وهم شكلهم خلاص عايزين ياكلوا عيش بصراحة.. يعني مفروض أن حسام وإبراهيم اللي إحنا عارفينهم ميحصلش معاهم موقف زي ده.
ناصر ماهر نزل في الدقيقة 91 وعمل انفراد ولو وقع كان ممكن خد ضربة عمل 4 دقائق لعب بتاريخ إمام عاشور.
مصطفى فتحي هو اللي مكسب بيراميدز ومخليهم ماشيين في الدوري.. امتى هتلاعبه.. وأدي صلاح اللي أنت كنت بتقول أنا عندي 20 لاعب وراجل.. هو النهارده اللي أنقذك.. دي قيمة صلاح اللي أنت حاطط رأسك براسه ماعرفش ليه”.
“أنت كنت عايز تغيره النهارده ومرضيش لما بقى شكلك وحش قدام مصر كلها.. لان ده ميتغيريش حتى لو هو عضمه في قفة”.
