رمضان صبحي أهم موهبة في مصر آخر 10 سنين بتنتهي بسرعة الصاروخ.. ليه نجم الأهلي قال ادعوله يطلع منها على خير؟.. وليه قعد في التحقيق لمدة 9 ساعات كاملة؟.. ومين اللي كان معاه؟.. ليه الإعلامي مهيب عبدالهادي قال الموضوع مريب وفيه حاجة مش مفهومة؟.. وأيه حكاية العينة اللي قلبت الدنيا عليه؟.. ده اللي هنعرفه مع بعض في “عرب 22”.
يوم الأحد 9 مايو 2024 رمضان صبحي نجم فريق بيراميدز خضع لجلسة استماع في الوكالة المصرية لمكافحة المنشطات “النادو” بعد صدور قرار من المنظمة الدولية “وادا”.. بسبب التلاعب في عينة التحاليل الخاصة بيه في ماتش ببطولة دوري أبطال أفريقيا مع بيراميدز.
الجلسة دي كشف تفاصيلها الإعلامي مهيب عبدالهادي المقرب من أسرة رمضان صبحي… وقال إن الموضوع يقلق شوية.. والجلسة اللي حضرها رمضان صبحي وصلت لمدة 9 ساعات كاملة.. ومش عارف ليه السبب.
رمضان حضر معاه نسيبه شريف إكرامي لاعب فريق بيراميدز.. والمحامي هاني زهران.. واللجنة القانونية في بيراميدز.. والموضوع مش مبشر.. وفيه حاجة مش مفهومة.
وفي لجنة الاستماع سألوه هل أخدت أي أدوية في الفترة دي.. وقعد يستفسروا منه على العينات.. وفيه حاجة محدش عارفها.. بيقولوا فيه عينة مريبة ومش عارفين أيه اللي حصل فيها.. والموضوع مريب شوية.. وربنا يستر.. وهيبقي فيه جلسة استماع تاني هتبقي قريب.
لكن الإعلامي أحمد شوبير، نجم الأهلي السابق قال: “أتمنى جلسة الاستماع اللي حصلت مع رمضان صبحي تكون نتيجتها جيدة وتوقعاتي إن فيه جلسة ثانية.. والوادا هستفسر من النادو لمعرفة نتيجة جلسة الاستماع مع اللاعب”
بصوا يا جماعة فيه شوية حاجات مهمة في الموضوع ده أولهم الخبر اللي قولته من البداية وطلع صح والناس اللي هاجمتني محدش قال إحنا متأسفين عموما مش مهم.. المهم دلوقتي إن رمضان صبحي يعدي منها على خير.. أنا مبحبش الندية والفجر في الخصومة أصل ده مستقبل وبيت مفتوح وشاب مسؤول عن أسرة خصوصا إن العينة مفيهاش حاجة محظورة ولكن فيها خطأ تقني.
“أيه اللي هيحصل دلوقتي مع رمضان صبحي.. فيه 3 حاجات لا رابع لهم، أولًا هيتم الاقتناع بدفوع رمضان صبحي والموضوع خلص واتمنى ده يارب ويبقى اتوقف الأسبوعين ثلاثة دول وخلاص.
الحاجة الثانية يقولوا إن اللاعب كان عنده نوع من أنواع الإهمال وياخد له إيقاف 3 أو 4 شهور وتعدي برضه..
أما الحاجة الثالثة ودي اللي ما اتمنهاش إن يبقى فيه عقوبة غليظة ويتم إيقاف رمضان صبحي لفترة طويلة.
بس فيه مفاجأة سارة بشأن رمضان صبحي وهي أنا تواصلت مع أحد أهم المسئولين في نادي بيراميدز فقال ليا رمضان مش هيتوقف يوم قلت له أنت قولت ليا الجملة دي قبل كده، فقالي أنا واثق المرة دي”.
قلبي مع رمضان وأتمنى الموضوع يعدي على خير بأمر الله وينتهي على خير، وحاسس جدا بقلقه وبمعاناته وبحزنه، لإنه كان ضمن المختارين في منتخب مصر، فجأة الإيقاف في وقت صعب شوية شهد استعادته لمستواه وخطورته، لكنه اختبار ويعدي منه على خير.
ورغم كدا فيه تقارير صحفية قالت إن بيراميدز قرر تجميد مفاوضات تجديد عقد رمضان صبحي لبعد الأزمة.. والنادي هينتظر لما يطلع قرار رسمي يحسم مستقبله خصوصا أن حازم خميس رئيس المنظمة المصرية لمكافحة المنشطات قال إن مدة إيقاف اللاعب هتوصل لـ4 سنين.
