بتحبه من وهما عيال.. وبتطبخ ليه ملوخية وورق عنب وحمام.. وبيتكسف أكتر منها.. وقالوا أنه بيلعب في الأهلي بسببها.. ومفاجأة في اللي حصل لما شافها أول مرة ليلة الفرح.. مين هي زوجة محمد هاني؟.. وإزي حبوا بعض وهما عيال؟.. وليه جماهير الأهلي سخرت من اللاعب؟.. ده اللي هنعرفه مع بعض في “عرب 22”.
محمد هاني لاعب النادي الأهلي بيحتفل بزفافه على زوجته حبيبة أبو الفتوح، شقيقة زوجة حسام غالي، كابتن الفريق السابق وعضو مجلس الإدارة الحالي.. في الحفل اللي أقيم في أحد فنادق العاصمة الإدارية الجديدة.. والحفل حضره نجوم الأهلي.
محمد هاني كان مع منتخب مصر في غينيا ولعبوا مع منتخبها في تصفيات كاس العالم.. ورجع من السفر على الفرح.. وظهر هاني في ليلة الفرح وهو لابس بدلة بيضاء والعروسة لابسة فستان زفاف منفوش.
حسام غالي نشر استعداداته للفرح بصورة مع ابنه محمود وهما لابسين بدلة قبل الفرح على تطبيق “إنستجرام”.. وكمان لميس مراته احتفلت بزفاف أختها ونشرت صورة قديمة ليهم مع بعض وكتبت عليها: “بنتي عروسة.. حبيبة قلبي”.
زوجة محمد هاني اسمها حبيبة أبو الفتوح.. والأخت الصغيرة من وسط 3 أخوات هما: “منة ولميس وحبيبة”.. وأختها الكبيرة “لميس” زوجة الكابتن حسام غالي.. وهي شبه أمها وأختها في الملامح.. واتخرجت من الكلية سنة 2022
واتخطبت لمحمد هاني سنة 2020.. كتبوا الكتاب سنة 2022.. ومش بتتفاعل على وسائل التواصل الاجتماعي.. ومعندهاش غير 450 متابع على “انستجرام.
مرات محمد هاني اتكلمت عن خطيبها وقصة حبهم وقالت أن هاني عنده معجبين ومعجبات كتيرة بس أنا بتعامل معاه.. إحنا بنعرف بعض من زمان من 9 سنين تقريبا.. يعني من أيام الطفولة.
إسلام الشاطر جابها في مداخلة مع قناة الأهلي وقالها: “بتعملي أيه لما بتخرجي مع محمد وبتلاقي حواليه معجبات”.. ردت قالت مش بعمل حاجة بس لازم استحمل.. ما هو مينفعش أعمل حاجة.. بس هو بياخد باله بنظرة واحدة.. وبعدها بياخد باله.
هي قالت إن هاني أكيل وبيحب الأكل جدا وبياكل أي حاجة تيجي قدامه.. زي ورق العنب وأنا بعرف أعمله وكمان البلسة والحمام.. بس هو بيتكسف أكتر مني..
وانا بكلمه قبل الماتش بساعة وبعد ما يخلص بيكلمني ويوم الماتش خصوصا ومش بيكون متوتر ودي ميزة فيه الحمد لله.. بس بيدخل المباراة متحمس شوية.. وأنا واثقة فيه لأننا بنحب بعض.
المفاجأة أن جماهير النادي الأهلي ديما بتهاجم محمد هاني بسبب طريقة لعبه وأدائه اللي مش قد كدا مع الفريق.. وفي أكتر من مرة قالوا إن محمد هاني بيلعب في النادي عشان مراته أخت الكابتن حسام غالي عضو مجلس إدارة الأهلي اللي بيساعده وبيدعمه.. وطبعا الكلام ده مش صحيح.. وهو بيلعب عشان بيأدي بشكل كويس.. وكمان بيشارك مع منتخب مصر.
جماهير الأهلي سخرت من هاني بعد حفل الزفاف وواحد منهم علق وقال: “حتي دي مش عارف يرفعها من علي الارض”.. ويقصد ان اللاعب مش بيعرف يعمل عرضيات صح.
وواحد تاني قال: “محمد هاني اتجوز وهيخلف وعيالوا هيتجوزا ويخلفوا وهيفضل لسه لاعب ناشئ ”.. وواحد تالت قال: “محمد هاني بقي عديل حسام غالي.. كده محمد هاني مش حيمشي من الأهلي”.
محمد هاني بينافسه في نفس مركز اللاعب عمر كمال عبدالواحد اللي متألق مع الفريق من وقت ما جه من فيوتشر في صفقة كلفت الأهلي كتير.
