الأهلي بيعيش حالة من الغليان والغضب في النادي بعد فشل أهم صفقة في الميركاتو الصيفي.. وده اللي خلى الكابتن محمود الخطيب ينقلب على إدارة التعاقدات ولجنة التخطيط وطالبهم بتنفيذ رغبات المدير الفني اللي زعلان.
لكن إزي الزمالك فجر الأزمة؟.. وأيه حكاية السمسرة اللي ضيعت أهم صفقة في الميركاتو؟.. والخطيب هيعمل أيه؟.. ده اللي هنعرفه مع بعض في “قشة لفة بلس”.
المسئولين في النادي الأهلي برئاسة محمود الخطيب تلقوا صدمة قوية في الساعات اللي فاتت بعد فشل لجنة التخطيط وإدارة الكرة في التعاقد مع الصفقة اللي طلبها السويسري مارسيل كولر، المدير الفني للمارد الأحمر.
الصفقة اللي بتكلم عليها هي المدافع الجزائري زين الدين بلعيد اللي كان الأهلي شبه خلص معاه بنسبة 90% بعد ما اتفق مع اللاعب ووكيله على كل حاجة المرتب ومدة العقد وباقي رتوش صغيرة واللاعب يبقي أهلاوي رسمي.. لكن فوجئوا بالصفقة اللي طلبها كولر بتضيع وبتروح نادي أوروبي.
الصحفي حامد وجدي كشف مفاجآت وقال إن أزمة الوكلاء ونصيحة مدرب الجزائر هددت انتقال بلعيد للأهلي.. وأنه تواصل مع علي كرماني الوكيل الرسمي للاعب الجزائري اللي قال فيه سببين لفشل المفاوضات مع النادي الأهلي هما: دخول أكثر من وكيل من جانب أمير توفيق مدير التعاقدات في الأهلي.
والسبب التاني هو نصيحة فلاديمير بيتكوفيتش المدير الفني لمنتخب الجزائر للاعب بالانتقال للدوريات الأوروبية أفضل
وكيل اللاعب قال إن عرض الأهلي مغري من الناحية المالية وأعلى بكثير من اللي هيدفعه النادي البلجيكي لاتحاد العاصمة وكذلك مرتب اللاعب.
كولر كان شدد على المسئولين بضرورة التعاقد مع زين الدين بلعيد مدافع اتحاد العاصمة الجزائري عشان يعويض المدافعين اللي هيمشوا في الصيف خصوصا محمود متولي ومحمد عبدالمنعم اللي عايز يحترف برة مصر.
مصادر في النادي الأهلي قالت إن محمود الخطيب غضبان جدا من لجنة التخطيط وإدارة التعاقدات بعد فشل التعاقد مع زين الدين بلعيد.. وانتقاله للدوري البلجيكي بعد الأهلي ما كان خلص معاه..
وطلب منهم بسرعة البحث عن بديل قوي ومناسب يقدر يشيل الفريق في بطولة كاس العالم للأندية اللي هيشارك فيها المارد الأحمر.. وكمان يحققوا رغبات السويسري مارسيل كولر اللي شايف إن كل الصفقات اللي بيطلبها أمير توفيق مش بيعرف يخلصها.. خصوصا أن اللاعب كان معروض على الزمالك بمبلغ أقل من اللي عرضه الأهلي.
الإعلامي أحمد شوبير المقرب من مجلس إدارة الأهلي قال إن إدارة القلعة الحمراء حسمت صفقة النجم الجزائري زين الدين بلعيد، مقابل 750 ألف يورو، هياخدها اتحاد العاصمة واللاعب وقع على عقد انضمامه للفريق لمدة 4 مواسم مع راتب سنوي يعدي نصف مليون يورو في موسم الأول وهيزيد بعد كده.
وكان الزمالك دخل في الصفقة لكنه انسحب منها حسب مصدر داخل القلعة البيضاء اللي قال: “الزمالك اتعرض عليه اللاعب لكنه مدخلش في المفاوضات وجمدها خصوصا بعد طلب اللاعب الحصول على راتب سنوي بيوصل لـ 400 ألف دولار في الموسم وده اللي رفضه الزمالك بسبب الأزمة المالية للنادي خصوصا أن ناديه الجزائري هياخد مقابل مادي نظير حسم الصفقة”.
زين الدين بلعيد، مدافع اتحاد العاصمة من مواليد 25 مارس 1999 وعرف التألق بألوان اتحاد العاصمة ولفت الأنظار بشكل خاص خلال منافسة بطولة كأس الكونفدرالية اللي توج بيها فريقه سنة 2023 وسجل عدد من الأهداف الحاسمة وبقي مطلب لمدرب الأهلي كولر من وقت تألقه في مباراة السوبر الإفريقي اللي لعبه الأهلي واتحاد العاصمة في السعودية وخسره الأهلي بهدف بلعيد.
