من هو عامر حسين.. تاجر خشب ورئيس منطقة الإسكندرية ورئيس لجنة المسابقات، ومشرف على كرة القدم بنادي سبورتنج وعضو رابطة الأندية وعضو اتحاد الكرة، ده جزء من مناصب الحج عامر حسين اللي محير الدنيا كلها.. ومدوخ المسئولين عن الكرة في مصر.. لدرجة أن واحد من نشطاء فيسبوك قال: “الحاج عامر حسين لا يعمل بالقول المأثور، لا تؤجل عمل اليوم إلى الغد، وبيفضل أمثال أخرى زي (يا مستعجل عطّلك الله)، و(كل تأخيرة وفيها خيرة) و(في التأني السلامة وفي العجلة الندامة).
ده منهج الحج عامر في الحياة.. عموما.. وده اللي خلى كل الناس بتسأل بيعمل أيه الحج عامر؟.. ومين هو أصلا؟.. وإزي دخل نشاط كرة القدم وسيطر على اتحاد الكرة وبقي واحد من اللي بيخططوا لأقدم دوري في الشرق الأوسط؟.. وثروته قد أيه؟.. وأيه علاقته بالنادي الأهلي؟.. ده اللي هنعرفه مع بعض في “عرب 22”.
مجدي عبدالغني بعد الفضائح اللي عملها عامر حسين قال: “هو مش عنترة ابن شداد ولا شمشون الجبار ويكون في 5 مناصب مع بعض إزاي.. بجد هيقدر يعمل كل ده ازاي؟”.. ده كل منصب من دول ليه شغله ولازم يكون ناس تحته، إحنا لحد دلوقتي منعرفش مين معاه في لجنة المسابقات”.
عامر حسين من عيلة بركات المشهورة في إسكندرية.. وعنده 10 أخوات أشهرهم عصام.. وحسن ده اللي يعتبر عميد العيلة.. ويعتبروا من أهم تجار الخسب في مصر.. وليهم جماهيرية كبيرة في إسكندرية وخصوصا في نادي سبورتينج.
عامر وأخواته ورثوا شركة كبيرة اسمها: “الاسكندرية للمقاولات والتوريدات”.. كانت بتصنع تخت المدارس وبتوردها لوزارة التربية والتعليم في الستينيات.. ومن سنة 1981 بدأوا يستوردوا كل أنواع الأخشاب.. وبقوا ملوك تجارة الخسب في الاسكندرية.. لكن الحج عامر اتجه لكرة القدم خصوصا أنهم عيلة بتعشق الكرة من الصغر.
عامر حسين لعب كرة القدم في نادي سبورتنج السكندري، وهو عنده 20 سنة انتقل لنادي الكروم، ومرضيش يلعب في الاتحاد لأن أخواته كانوا هناك وبعدها تولى الإشراف على تأسيس الفريق الأول في نادي سبورتنج.
الحج عامر بيروح اسكندرية يقعد ويمخمخ ويطلع لينا جدول الدوري زي ما قال قبل كدا.. وبعدها الاندية تقعد تتخانق.
هو بيحب لقب الحج عامر خصوصا أنه أدى فريضة الحج فى سن الـ25 عامًا… وبدأ مسيرته مع اتحاد الكرة لما استعان به طلعت فواز، عضو مجلس إدارة اتحاد الكرة ورئيس منطقة الإسكندرية، عشان يكون في عضوية لجنة المسابقات وتولي سكرتير اللجنة ثم النائب وبعدها رئيس اللجنة والمنطقة من 12 سنة.
عامر حسين بيعمل كل حاجة في المسابقة وده اللي أكده جمال سالم مراقب المباريات لما قال: “اختيار جائزة رجل المباراة في الدوري المصري بيكون عن طريق مراقب المباراة وعامر حسين هو اللي بيحدد قبل نهاية الماتش بـ5 دقائق.. وبيكتب التقرير ويعدل فيه حسب وجهة نظره”.
أحمد سالم المتحدث باسم نادي الزمالك قال: “عامر حسين عنده مشكلة ولازم يراجع نفسه فيها، هو رئيس منطقة الإسكندرية ومشرف على الكرة في سبورتينج وعضو الرابطة وعضو الاتحاد ورئيس المسابقات، ومكنش لاعب كرة دولي كبير مثلًا.. هل عامر حسين يستطيع استخدام الكمبيوتر؟ أعتقد لا، أنا عضو في نادي سبورتينج وعندنا مشاكل في الدورات الرمضانية وعامر حسين هو الذي يضع جداول الدورة”.
عامر حسين عامل خناقات ومشاكل مع معظم الأندية زي نادي إنبي اللي قال رئيسه أيمن الشريعي أنه كان عايز يقيد عنده لاعب ولما مرضيش بدأ يحارب ناديه.
لكن فيه كلام أن النادي الأهلي هو اللي بيدعم عامر حسين وعايزه موجود في لجنة المسابقات عشان بيظبط ليه جدول الدوري.. وده اللي خلى الكابتن سيد عبدالحفيظ يشكره أكتر من مرة.. لكن إحنا مقدرناش نوثق الكلام ده.
