أيه اللي يخلي رئيس دولة عربية يتدخل في الكورة ويقول رأيه وميخافش من اللي هيحصل بعد كدا؟.. الأهلي هو اللي عمل ده.. وفوزه المتكرر في الدوري المصري.. وبطولات اللي بيحققها خلت الرئيس العربي يتكلم قدام كل الزعماء والملوك ويقولهم.. الزمالك مظلوم من الحكام والمنظومة.. والأهلي مبيلعبش وبياخد الدوري.. مين اللي قال كدا؟.. وليه الزعيم العربي قال الكلام ده؟.. وهل الزمالك حقيقي مظلوم؟.. ده اللي هنعرفه مع بعض في “عرب 22”.
شهر يونيو 2024 مش بس حار في درجة حرارته.. لأ.. ده سخن في أحداث الرياضية خصوصا في الدوري المصري اللي حصل فيه مشكلة كبيرة والزمالك اعتذر عن لعب ماتش القمة قدام الأهلي واتخصم من 3 نقط واعتبروه مهزوم.. لكن الزمالك قال إن ده سببه غياب العدالة ومبدأ تكافؤ الفرص اللي بيحصل في ترتيب مباريات الدوري المصري.
لكن الماتش ده بأكتر من 20 سنة كان الزعيم الليبي الراحل معمر القذافي في اجتماع جوة جامعة الدول العربية كان بيحضر قمة من القمم العربية اللي بيحصل واتكلم بسخرية عن الوضع بتاع القادة والشعوب العربية وضرب مثل باللي بيحصل مع الأهلي.
معمر القذافي قال: “الأهلي المصري النادي الكبير في أفريقيا.. كل سنة يلعب في الدوري.. سواء يلعب أو ميلعبش بياخذ الدوري.. مين بيديه الدوري مبعرفش.. دي حقيقة. والزمالك دائما مظلوم أي والله.. مظلوم من الحكام والمنظومة الرياضية كلها.. وده زي القادة العرب نجتمع ناخد قرارات مهمة.. وقرارات مصيرية تفيد الشعوب والبلدان العربية.. لكن النتائج في الأخر معروفة.. لا حول ولا قوة إلا بالله”.
الزعيم الليبي كان معروف بانتقاده للقادة والرؤساء العرب خصوصا أن مش بياخدوا قرارات على قد الأحداث اللي بيحصل وده اللي بيحصل في الدوري المصري خصوصا في الأيام دي.
معمر القذافي يوم 20 أبريل سنة 1990 حضر ماتش لفريق الأهلى المصري اللي قدر يفوز على الاتحاد الليبي في طرابلس في دور الـ32 لمسابقة دوري أبطال أفريقيا… وحضر الماتش عشان يحتفل بالنادي الأهلي كونه أول فريق مصري يزور ليبيا بعد فترة من قطع العلاقات بين البلدين.
كتير من الأندية والمسئولين بيتهموا الأهلي بأنه بيتجامل من المنظومة الرياضية مش في مصر بس.. لكن حتى في أفريقيا.. وفيه أندية زي الترجي التونسي وصن داونز شايفين إن اتحاد الكرة المصري بيجامل الأهلي عشان يسيطر على البطولات الأفريقية وبيريحوه في الدوري المصري عشان كدا قدر ياخد 12 بطولة دوري أبطال أفريقيا ويعتبر هو النادي الوحيد صاحب الأرقام القياسية في القارة.
رولاني موكوينا المدير الفني لصن داونز اتكلم عن الأهلي وقال: “شوفوا ترتيب ونتائج الأهلي في الدوري المصري.. ده دليل على أن فريقي متفوق.. وقدرنا نحقق ألقاب متتالية في الدوري الجنوب إفريقي، وتأهلنا لنص نهائي دوري أبطال إفريقيا مرتين وراء بعض”.
مدرب صن داونز يقصد بكلامه عن الأهلي المباريات الكتيرة المتأجلة في الدوري المصري.. وإن اتحاد الكرة بيجامل الأهلي ويأجل ليه الماتشات عشان يترتاح في البطولة الأفريقية ويقدر يكسب.
وكمان وليد قرفالة المتحدث باسم نادي الترجي اتكلم وقال: “شوفوا الهياكل الرياضية في مصر بتتعامل إزي مع الأهلي.. بيحطوا ليه الجدول المناسب للفريق عشان ينجح في أفريقيا.. لكن الترجي استقبلته الرابطة والجامعة التونسبة بـ3 ماتشات في ظرف أسبوع واحد بعد تأهله لنهائي دوري الأبطال.. والأهلي في مصر ارتاح وخد وقت كافي بعد تأهله للنهائي”.
