عصام عبدالفتاح مش ناسي اللي عمله معاه الكابتن محمود الخطيب.. وكل ما يطلع في التلفزيون يلقح على الأهلي ويقول إنه بيتجامل من التحكيم.. لكن اللي قاله على كلاتينبرج فاجئ الجميع وخصوصا الأهلاوية وأثار حالة من الجدل بين المشجعين سواء الأهلاوية أو الزملكاوية.. ليه عصام عبدالفتاح قال الكلام ده؟.. وأيه حكاية الدوري اللي ضيعه على الأهلي؟.. ومين الحكم اللي اتقال ليه براحة شوية على الأهلي؟.. ده اللي هنعرفه مع بعض في “عرب 22”.
الكابتن عصام عبدالفتاح رئيس لجنة الحكام السابق كان ضيف الإعلامي إبراهيم فايق وفجر مفاجأة في الوسط الرياضي لما قال: “الأهلي أقوى من كل اللي موجود في المنظومة الرياضية في مصر.. ويعتبر رقم 1 وبعد كده الرابطة ثم الزمالك وأخيرًا الإتحاد”.
وفجر مفاجأة لما قال: “كلاتنبرج الخبير الأجنبي اللي كان ماسك لجنة الحكام في اتحاد الكرة.. حاول التلاعب في خطوط تقنية الفيديو علشان يحسب صحة هدف لفريق الأهلي في الوقت اللي لغاه محمود عاشور حكم الفيديو وكان قرار عاشور صح”.
الأهلي كان احتج على الهدف ده.. وأحمد شوبير الإعلامي المقرب من مجلس الكابتن محمود الخطيب قال: إن كلاتنبرج اجتمع مع الحكم محمود عاشور وقاله أنت غلطت في تحديد نقطة التسلل والهدف صحيح”.
لكن الأهلاوية مش ناسيين لـ”عصام عبدالفتاح” الدوري اللي ضاع منهم وخده الزمالك في موسم 2020 بعد إلغاء هدف للأهلي في فريق البنك الأهلي بداعي التسلل.
عصام عبدالفتاح وقتها كان رئيس لجنة الحكام وقال: “هدف الأهلي في البنك الأهلي غير صحيح مليون في المية حتى من دون الاستعانة بتقنية الفيديو والقانون بيقول: الكرة الحرة يجب أن تكون ثابتة عند لعبها”.
رئيس لجنة الحكام الأسبق هاجم بيريرا وبيقول إنه مبيعرفش يدير لإنه عين الحكام اللي كان عندهم أزمة في ماتش الزمالك والمصري وأداهم ماتشات بعدها بأيام.. وكان قبلها بدقائق بيتفاخر أنه دعم محمود لعاشور بعد الخطأ اللي ضيع دوري من الأهلي في تسلل على بيرسي تاو في ماتش فاركو.
وقال: “لما الأهلي اشتكى كان مصمم انه يخلي محمود عاشور يلعب الأسبوع اللي بعده رغم إن اتحاد الكرة قاله ده غلط”.
الأهلاوية مش بيحبوا عصام عبدالفتاح وشايفين أنه السبب في ضياع 2 دوري اللي خدهم نادي الزمالك سنة 2021 و2022.
لكن الخلافات بين الأهلي وعصام عبدالفتاح قديمة لدرجة أن مجلس محمود الخطيب طلع بيان وطلب بإقالة لجنة الحكام وقالوا عليها إنها فقدت نزاهتها ومصداقيتها.
وده الكلام اللي أغضب عصام عبدالفتاح رئيس اللجنة اللي قال إن بيانات النادي الأهلى ديما بيطلعها ضد التحكيم وممكن نرفع عليهم قضية لكن أحنا شرفاء ومش هنعمل ده… بس إزي يتهموا الحكام بعدم وجود نزاهة وشفافية… ده اتهام خطير.
تراجعنا عن القضية عشان خدنا حقنا وردينا على تصريحات الأعلي في البرامج.. وقال التشكيك في الحكام شيء محدش يقبله.. والنادي الأهلي أكبر بكتير من التصريحات اللي بيقولها المسئولين عنه.
وبعدها اتحاد الكرة أقال لجنة الحكام برئاسة عصام عبدالفتاح وجاب بدل منه الخبير الإنجليزي مارك كلاتنبيرج.. ومن وقتها وعصام عبدالفتاح بينتقد الأهلي.
الحكم السابق جهاد جريشة اتكلم عن مجاملة الحكام للأهلي والزمالك وقال: “في مرة اتقالي من رئيس لجنة حكام أنت عامل زي القطر على الأهلي.. ما ينفعش ده.. لازم تبقى أهدى شوية على الأهلي والزمالك.. الفرق الكبيرة لازم نراعيها”.
لكن أنا قولت مينفعش تقولي كدا مش فارق معايا أهلى ولا زمالك أنا بعمل اللي شايفه صح.
