أنا الكابتن وعايز 50 مليون واسألوا الزمالك.. محمد الشناوي يصدم إدارة الأهلي بالصفقة التاريخية.. والخطيب يلجأ لتركي آل الشيخ
مش هاخد أقل من 50 مليون جنيه في الموسم.. أنا كابتن الفريق ومينفعش أخد أقل من اللعيبة اللي معايا.. إزي لعيب لسه جاي ياخد المبلغ ده وأنا لأ.. ده اللي قاله محمد الشناوي حارس مرمى القلعة الحمراء لإدارة الفريق لما بدأوا يتفاوضوه معاه عشان يجدد عقده.. اللي فوجئوا بطلبات وشروط مبالغ فيها.. وعشان الكابتن محمود الخطيب يرضى كابتن الفريق لجأ لعاشق النادي الأهلي المستشار تركي آل الشيخ رئيس هيئة الترفيه السعودية.. أيه اللي حصل في المفاوضات؟.. وأيه هي شروط الشناوي؟.. وليه اتكلم على الزمالك؟.. ده اللي هنعرفه مع بعض في “عرب 22”.
النادي الأهلي بدأ في مفاوضات تجديد عقد محمد الشناوي حارس مرمى الفريق اللي هيخلص آخر موسم 2024- 2025 من بدري عشان من حقه يوقع لأي نادي في يناير 2025 وهم مش عايزينه يمشي ببلاش.. وأول ما بدأوا يتكلموا معاه عشان يعرفوا طلباته المادية فاجئهم بالمبلغ اللي طالبه..
الشناوي قال للمسئولين في الأهلي عايز 50 مليون جنيه في الموسم الواحد عشان أجدد عقدي.. ردوا عليه وقالوا ليه.. 50 مليون أيه؟.. إحنا عندنا سقف مرتبات مينفعش نعديه وإلا هنعمل فتنة في أوضة اللبس.. لكن مسئول في إدارة التعاقدات قاله أنت هتمضي عقد بـ16 مليون جنيه في الموسم وهتاخد ترضيات ونعملك حملة إعلانات مع الشركات الراعية وهتوصل لـ25 مليون جنيه.
لكن الكلام ده معجبش الشناوي اللي قال للمسئولين في الأهلي أن الـ50 مليون جنيه اللي طالبها مش مبلغ كبير خصوصا اللعيبة الأجانب بياخدوا مرتب أكتر من مليون دولار زي علي معلول وبيرسي تاو.. وأنا الكابتن.. وكمان اسألوا إدارة الزمالك بتدفع كام.. فيه لعيبة وحراس مرمى أقل مني في الزمالك وبيراميدز وعقودهم أكتر من كدا.
الإعلامي مدحت شلبي اتكلم عن مفاوضات الشناوي مع الأهلي وقال: “بالتأكيد النادي الأهلي مش هيدفع للشناوي مبلغ الـ50 مليون جنيه، عشان كدا بيفكروا في تسويق اللاعب في الخليج.. يطلع إعارة لمدة موسم واحد.. وهناك ياخد 2 مليون دولار ولا أكتر شوية.. وبعد الأمور ما تتظبط ويأمن مستقبله يرجع تاني على النادي الأهلي ويختم مسيرته في القلعة الحمراء”.
المسئولين في الأهلي مش فارق معاهم الشناوي أوي خصوصا أن إدارة الكرة برئاسة الكابتن محمود الخطيب متطمنة على مركز حراسة المرمى بعد تألق مصطفى شوبير في الفترة اللي غاب فيها الشناوي بسبب الإصابة.. وقدر يقود المارد الأحمر للفوز ببطولة دوري أبطال أفريقيا للمرة الـ12 في تاريخه.
مصادر مقربة من النادي الأهلي قالت إن الكابتن محمود الخطيب لجأ للمستشار تركي آل الشيخ رئيس هيئة الترفيه السعودي عشان يجيب عرض من أي نادي سعودي يلعب هناك موسم أحسن ما يخطفه الزمالك ويستفيد منه.. خصوصا أنه يعتبر حارس مصر الأول في الوقت الحالي.
مصادر قالت إن محمد الشناوي وصله عرض شفوي من نادي الوحدة السعودي عشان يتعاقدوا معاه في الصيف مقابل 2.5 مليون دولار في الموسم الواحد.. وحصل تواصل بين المسؤولين في نادي الوحدة السعودي ومحمد الشناوي وإدارة الأهلي.
المسئولين في النادي السعودي طلبوا من الأهلي ميبعوش الشناوي لأي نادي تاني لحد ما يحلوا الأزمة الإدارية اللي بتعطل النادي عن التعاقد مع أي صفقات في الصيف.
نادي الوحدة عليه 6 قضايا في الاتحاد الدولي لكرة القدم “فيفا” وبتهدده بالحرمان من تسجيل اللاعبين في الصيف عشان مستحقات اللعيبة الأجانب.. لكن إدارة النادي عايزة تغير كل اللعيبة الأجانب في الفريق.. والشناوي هيكون بديل الحارس منير المحمدي اللي النادي مش هيجدد عقده.
