قالوله ادفع اللي عليك قبل ما تمشي.. كفاية المشاكل اللي عملتها وإحنا دفعنا ليك الغرامة.. وصاحبه فجر مفاجأة عن سبب خناقته مع كولر بعد ماتش الزمالك.. وحكى تفاصيل اللي دار في التتش.. أكيد عرفتوا بنتكلم عن مين.. أيوة هو محمود كهربا.
صاحب أكتر عدد من الخناقات في الأهلي خلال الفترة الأخيرة.. أيه اللي حصل؟.. وأيه المفاجأة اللي كشفها صاحبه؟.. وهل إدارة الأهلي قالوا ليه فعلا ادفع اللي عليك قبل ما تمشي؟.. وهيروح فين؟.. وأيه موقف الكابتن محمود الخطيب؟.. ده اللي هنعرفه مع بعض في “قشة لفة بلس”.
محمود عبدالمنعم “كهربا” اتخانق مع مارسيل كولر المدير الفني للأهلي للمرة التالتة في أقل من سنة بعد أزمته بسبب فرح أخته اللي مرضيش يسافر مع الفريق في ماتش مهم في بطولة دوري أبطال أفريقيا.
لكن الأزمة الجديدة حصلت بسبب الغيرة من مشاركة الفرنسي أنتوني موديست مهاجم النادي الأهلي بدل منه في الماتشات رغم أنه مشي من الفريق.
محمد أبو علي الإعلامي في قناة الأهلي وواحد من المقربين لكهربا وصاحبه.. حكى سبب الأزمة اللي حصلت بين كهربا وكولر وقال: “في ماتش الأهلي وفاركو.. مارسيل كولر نزل موديست بدل منه.. وهو حس بالظلم.. وشايف أنه أحق من المهاجم الفرنسي بالفرصة دي”.
كهربا أفصل من موديست.. لكن النادي الأهلي عنده ثوابته يعني الكابتن محمود خطيب قعد إحتياطي.. كهربا كان شايف أنه بيتمرن كويس.. لكن كولر مش بيديه الفرصة وبيلاعب عليه موديست في أغلب الماتشات.
وجزء تاني من مشكلة كهربا مع كولر هي أن المدير الفنى بيلاعبه كمهاجم لكن هو في الأصل جناح شمال ومش مركزه رأس الحربة.
والفترة اللي فاتت كلها بيلعب رأس حربة.. ومقدرش يصبر خصوصا أن موديست مشي وكان آخر ماتش ليه.. ومبقاش فيه غيره هو ووسام أبو علي.. فكان منتظر ياخد وقت ويلعب عشان يبقي جاهز للماتشات في الدوري.
ودلوقتي فيه محاولات من الكابتن سامي قمصان وبعض الناس في الجهاز المعاون لمارسيل كولر لحل الأمر.. وبيرتبوا عشان يقعدوا مع كولر ويعتذر كهربا والمشكلة تخلص.
وبعد الأزمة ترتيب كهربا تراجع من المركز التالت وبقي الرابع رغم أن موديست مشي.. وبقي الترتيب وسام أبو علي رقم 1 وطاهر محمد طاهر رقم 2 وبيرسي تاو رقم 3 وأخيرا كهربا رقم 4 في ترتيب المهاجمين.
فيه أخبار تداولت أن النادي الأهلي طلب من كهربا يدفع باقي غرامة الزمالك اللي عليه خصوصا أن الأهلي دفع ليه عقده بالكامل مقدم عشان يساعدوه يسدد الغرامة اللي عليه بعد هروبه من نادي الزمالك للبرتغال.
وكمان المصادر قالت إن الكابتن محمود الخطيب زهق وأعلن عن غضبه للمسئولين عن الفريق بسبب تصرفات كهربا الطائشة والمشاكل الكتيرة اللي بيعملها جوة وبرة الملعب.. وطلب منهم يشوفوا ليه عرض احتراف في الخليج وخصوصا في السعودية…
وده اللي خلى الإعلامي الزملكاوي عمرو الدريري يسخر من كهربا .. وكتب بوست على موقع فيسبوك ويقول فيه: “الأهلي يبلغ كهربا قبل الرحيل.. ادفع اللي عليك للنادي.. أنت واخد سنة مقدم عشان غرامة الزمالك”.
كهربا اتخانق مع كل المدربين في الأهلي بداية من رينيه فايلر.. لحد بيتسو موسيماني اللي كان بيستبعد كهربا من حساباته وكان هينهي مسيرته مع الأهلي تماما.
ومفيش مدرب في الأهلي دعم كهربا واحتواه نفسياً وأدى ليه فرص زي كولر.. لكنه زهق من تصرفات كهربا.. وقالهم يمشي في الصيف مش عايزه معايا.. والخطيب وافقه في الرأي وقال للمسئولين عن الفريق يجيب أي عرض ويمشي.
