أنا مش أهلاوي بس الأهلي مش هيخسر الدوري.. ولو بيراميدز خد البطولة السنة دي هحلق شعري على الهواء”.. دي جزء من تصريحات لاعب البنك الأهلي السابق أحمد ياسر.. اللي محدش عارفه بيهجص وهيبقي رضا عبدالعال الجديد ولا بيتكلم جد.
لكن كل مرة بيطلع فيها بيقول تصريحات تقلب الدنيا وتثير الجدل على السوشيال ميديا بين الجماهير.. خصوصا لو علق على زمايله في لعيبة الكرة في الدوري المصري.
ليه أحمد ياسر هيحلق شعره على الهواء؟.. وليه قال أنه مينفعش يتقارن بشيكابالا وعبدالله السعيد؟.. وقال أيه على محمد صلاح؟.. ده اللي هنعرفه مع بعض في “عرب 22″.
أحمد ياسر مهاجم البنك الأهلي السابق وفريق التحدي الليبي كان ضيف الإعلامي مهيب عبدالهادي وطلع اتكلم عن الدوري واللي بيحصل فيه ومين الفريق اللي هياخد البطل في آخر الموسم وقال.. أنا مش أهلاوي.. لو سألتني مين بطل الدوري هقولك الأهلي”.
بتكلم بمصداقية.. الناس اللي بتنافس على الدوري هم بيراميدز والأهلي.. ورغم أن بيراميدز هو متصدر ترتيب جدول الدوري المصري بس مش هياخد الدوري”.
مهيب عبدالهادي سأله وقاله لو بيراميدز خد الدوري هتعمل أيه.. رد عليه وقاله هعمل اللي أنت عايزه يا مهيب.. فرقة بيراميدز مش مؤهلة أنها تاخد بطولة.. بيراميدز لو خد الدوري هاجي الاستديو والحق شعري على الهواء.. الأهلي هياخد الدوري الموسم ده.
بيراميدز من أبرز المرشحين للدوري الموسم ده.. وبيحتل صدارة جدول ترتيب الدوري برصيد 65 نقطة من 26 مباراة بفارق 14 نقطة عن الأهلي صاحب المركز الثاني اللي عنده في رصيده 51 نقطة من 21 مباراة.. يعني 5 مباريات أقل.. لو الأهلي فاز في كل الماتشات اللي متأخر فيها هيكون أكتر من بيراميدز بنقطة واحدة.
أحمد ياسر اتكلم عن منافسته مع اللعيبة في الدوري المصري.. وقال أحمد ياسر: “أنا أفضل من حسين الشحات ومحمود كهربا.. الفرق بيني وبينهم هما لعبوا في الأهلي والزمالك علشان ده نصيبهم ورزقهم.. وأنا لأ.. لكن أنا أحسن منهم.
نجم البنك الأهلي اتكلم عن مقارنته بإمام عاشور وقال إن لاعب الأهلي أفضل منه.. وكمان محمود حسن تريزيجية وعمر مرموش أحس منه بكتير.. ومينفعش حد يقارن لعيب في الدوري المصري مع لاعب في الدوري الإنجليزي أو الألماني.
لكن أحمد ياسر رفض مقارنته بعبدالله السعيد ومحمود عبدالرازق «شيكابالا»، نجوم نادي الزمالك.. وقال مينفعش اتقارن بينهم.. دول أساطير وليهم اسمهم أجي أيه جنبهم أنا.
ورفض كمان يتقارن بمحمد صلاح كابتن منتخب مصر ونجم فريق ليفربول الإنجليزي وقال: “مينفعش اتقارن بصلاح ده أحسن لاعب في تاريخ مصر ولازم يتعمله تمثال في مصر.. إحنا مجبناش لاعب زي محمد صلاح”.
أحمد ياسر قال: “صفقات الزمالك في الشتاء اللي فات فوقت الفرقة شوية.. وأحسن صفقة فيهم هو ناصر ماهر.. بس أنا بحب عبدالله السعيد في الملعب لكن هو كبير في السن ومش قادر يلعب زي زمان.
لو أنا مكانه.. الموسم ده هيكون الأخير ليا.. المكنة خلصت الكيلوات بتاعتها وتعبت.. ومعاه شيكابالا اللي يعتبر أسطورة نادي الزمالك بحق وحقيقي لكنه كبر في السن ومش هيقدر يقدم أكتر من اللي قدمه.
والمفروض يعتزلوا آخر الموسم ده.. شيكابالا كبر ودي سنة الحياة.. وأنا مش مقتنع بأني قائد في أوضة اللبس وبكلف الناس ملايين.
جماهير النادي الأهلي هاجمت أحمد ياسر لاعب البنك وقالت عليه ده هجاص زي رضا عبدالعال ومش بيحب زمايله في الملعب وهو لعيب فاضي.. ومعندوش حاجة يقدمها غير التصريحات اللي بيطلع يقولها على التلفزيون.
