ممدوح عيد المدير التنفيذي لنادي بيراميدز نشف دماغه ورافض يرجع في كلامه وقال للمسئولين في اتحاد الكرة أنتوا خايفين من الأهلي.. والأهلي خايف من إبراهيم عادل.. ليه كل ماتش لينا مع الأهلي يتأجل.. لكن المسئولين في الأهلي هددوا اتحاد الكرة قبل ماتش بيراميدز في الدوري.. ليه المسئولين في الاتحاد متورطين وخايفين من الأهلي؟.. والمارد الأحمر هيقدر يمشي كلامه ولا لأ؟.. وأيه المفاجأة اللي جهزها بيراميدز لكولر؟.. ده اللي هنعرف مع بعض في “قشة لفة بلس”.
قبل بداية معسكر المنتخب الأولميبي اللي بيستعد للمشاركة في أولمبياد باريس 2024.. الأهلي وبيراميدز كانوا مش عايزين يبعتوا لعيبتهم للمنتخب.. والمارد الأحمر رفض بشكل قاطع يسيب إمام عاشور ومحمد عبدالمنعم للمنتخب وبيراميدز مرضيش يسيب مصطفى فتحي.
لكن حصل اتفاق عشان اللعيبة الشباب والأهلي ساب 3 لعيبة شباب هما كريم الدبيس وأحمد نبيل كوكا والحارس حمزة علاء.. وكمان بيراميدز ساب إبراهيم عادل نجم الفريق للمنتخب لكن حصل اتفاق بين المسئولين عن بيراميدز والمسئولين في اتحاد الكرة ورابطة الأندية.
الاتفاق ده حصل لغط كبير عليه خصوصا بعد انضمام إبراهيم عادل للمعسكر.. لكن الإعلامي سيف زاهر قال حصل جلسة مع المسئولين في بيراميدز وإبراهيم عادل هيلعب مباراة الأهلي.. وهيطلع من معسكر المنتخب يوم الخميس عشان يشارك في المباراة يوم الجمعة”.
المنتخب الأولمبي هيسافر يوم الأربعاء لفرنسا.. وإبراهيم عادل هيلحق بالبعثة بعد المباراة.. والنادي الأهلي مش جزء من الاتفاق.. ومحمود الخطيب، متدخلش في الموضوع.. وبعدين حصل حوار جانبي بين جمال علام ومسؤول أهلاوي.. وأكد ليه أنه مفيش تفكير في خروج إبراهيم عادل من المعسكر.
جمال علام، قال لمسؤول الأهلي (لو بيراميدز، طلب الحصول على إبراهيم عادل، والجهاز الفني وافق، طلع لاعيبة الأهلي.. رد مسؤول الاهلي في صيغة تهديد وقال (أنا مش عايز حد أنا التزام بالقواعد ولو القواعد اتكسرت أنا مش هعمل موقف بسحب اللاعبين ولكن هيكون فيه موقف آخر)
مصادر قالت لموقع فيتو أن فيه مكالمة جمعت مسؤول كبير عن الكرة في مصر وسالم الشامسي مالك بيراميدز وممدوح عيد المدير التنفيذي واتفقوا على خروج إبراهيم عادل من معسكر المنتخب عشان يلعب المباراة الأولى قدام الأهلي يوم 12 يوليو والمباراة الثانية يوم ٢٢ يوليو وبعدها هتاخده طيارة خاصة عشان ينضم لبعثة المنتخب الأولمبي في باريس.. خصوصا أن المنتخب هيسافر يوم 13 يوليو.
الناقد الرياضي عبدالحكيم أبو علم قال: “مستحيل إبراهيم عادل يطلع من المعسكر عشان يلعب مباراة الأهلي.. أحمد دياب رئيس رابطة الأندية خد الشو وطلع قال أنه حل المشكلة.. والحقيقة أنه محصلش أي حل للأزمة.. والمشكلة لسه موجودة”.
مصادر في الأهلي قالت إن المسئولين وجهوا تحذيرات شديدة اللهجة لاتحاد الكرة لو خرج أي لاعب من المعسكر.. ونفى موافقته على خطوة وجود إبراهيم عادل مع بيراميدز، وهدد مجلس الأحمر بخطوات تصعيدية في الفترة المقبلة لو اتحاد الكرة والمنتخب الأوليمبي خالفوا الاتفاقات.. والأهلي جهز إجراءاته عشان ينفذ تهديداته فعليا.
لكن المسئولين في بيراميدز مصممين على الاتفاق ومجهزين مفاجأة للأهلي على المستوى الفني خصوصا بعد ما قرر الكرواتى كورنسلاف جوريتش المدير الفني للفريق تجهيز نجم الفريق المتألق محمد الشيبي اللي تصدر ترتيب قائمة الأكثر صناعة للأهداف في الدوري وعنده 𝟖 تمريرات حاسمة.. عشان تبقي المواجهة الأولى مع حسين الشحات بعد الخناقة الشهيرة اللي حصلت بينهم في الملعب واللي طلع قرار بعقوبة ضد نجم الأهلي.
