“قفلت من النادي.. وبعتذر لجماهير الزمالك..كلكم على دماغي.. مش عايز يحصلي زي اللي بيحصل للعيبة الكرة دلوقتي.. أنا مش هقدر اكمل.. تعبان نفسيا ومش مرتاح.. وعندي عروض كتيرة”.. ده اللي قاله ابن نادي الزمالك للجماهير بعد ما طلب من المسئولين في القلعة البيضاء الرحيل بشكل رسمي.. أيه اللي بيحصل لنجم الزمالك الشاب؟.. وليه طلب الرحيل عن الأهلي؟.. ده اللي هنعرفه مع بعض في “قشة لفة بلس”.
موسم الانتقالات الصيفية بدأ واللعيبة بتدور على الأندية اللي ممكن تشارك فيها.. ومنهم نجوم في الأهلي والزمالك.. لكن المفاجأة أن نجم القلعة البيضاء طلب بشكل رسمي الاستغناء الخاص بيه من الزمالك عشان يروح للنادي الأهلي.
وده اللي اتاكد منه المسئولين في الزمالك اللي عرفوا أن فيه مفاوضات بين اللاعب ومسئولين في الأهلي.. وعشان كدا بيكدروه شوية قبل ما يستغنوا عنه.. اللاعب اللي بتكلم عنه هو ياسين حافظ كابتن فريق الزمالك مواليد 2005 وأخو مرات إمام عاشور لاعب النادي الأهلي والزمالك السابق.
ياسين حافظ اشتكى من المعاملة في الزمالك بعد الأزمة اللي حصلت ليه وتهنئه لنجم القلعة الحمراء إمام عاشور بعد فوزه مع فريقه ببطولة دوري أبطال أفريقيا للمرة الـ12 على التوالي وقال عليه أحسن لاعب في أفريقيا.. وده اللي أغضب جماهير الزمالك.
لاعب الزمالك خد أبوه وراح نادي الزمالك عشان يقابل رئيس قطاع الناشئين بدر حامد وطلبوا منه الاستغناء الخاص بيه عشان يمشي من الفريق.
لكن الكابتن بدر حامد قعد مع اللاعب وقاله لو عايز تمشي اكتب طلب الاستغناء لرئيس مجلس الإدارة حسين لبيب.. فقولت ليه: “حسين السيد عضو مجلس الإدارة.. قال ياسين حافظ ده لعيب عادي.. وطالما أنا لاعب عادي ليه متمسكين بيا.. سبوني أمشي.. فرد عليا وقالي فكر كويس.. لو عايز مصمم تمشي اكتب طلب استغناء وقدمه للإدارة”.
وده الاتفاق اللي حصل يوم الإتنين 15 يوليو 2024.. واللاعب قال إنه هيكتب الطلب ويقدمه للإدارة.. وعندي عروض كتيرة في الإمارات وفي مصر.. ولسه محددتش موقفي بشكل نهائي هلعب فين.. وأنا عمري ما كنت بتاع لقطة وبحب الزمالك.
لكن مصدر مسئول في الزمالك قال إن رئيس القطاع رحب برحيل اللاعب ومعندوش مشكلة والقرار بتاع مجلس الإدارة.. وده الإجراء الطبيعي اللي بيحصل مع كل لاعب.
ياسين حافظ اتكلم عن المفاوضات مع الأهلي.. قال: “إمام عاشور مقالش أنه هيضمني للأهلي”.. لكن المصادر أكدت أن فيه مفاوضات بين اللاعب والمسئولين في قطاع الناشئين بالنادي الأهلي.. وإدارة الزمالك معندهاش مشكلة في رحيل اللاعب.
إدارة النادي الأهلي برئاسة الكابتن محمود الخطيب رفضوا التدخل في الأزمة بين اللاعب والزمالك.. ومنتظرين ياسين حافظ يخلص نفسه من الزمالك.. وهيعرضوا أمره على إدارة الاسكاوتينج والمسئولين عن قطاع الناشئين ولو لقيوا اللاعب كويس.. هيضموه خصوصا بعد توصية إمام عاشور اللي طالب الإدارة بضم نسيبه.
