مش هعرف أكمل في النادي.. ومش هتعاقب عشان إمام.. أنا تعبان نفسيا ومش عايز ابقي زي أحمد رفعت.. وقالولي هنبطلك كورة”.
ده الكلام اللي قاله ياسين حافظ أخو مرات إمام عاشور لاعب الأهلي عن اللي بيحصل معاه في نادي الزمالك.. لكن اللاعب فجر مفاجأة عن انتقاله للأهلي.. يا ترى أيه موقف إدارة القلعة الحمراء؟.. وأيه اللي بيحصل ليه في الزمالك؟.. ده اللي هنعرفه مع بعض في “عرب 22”.
ياسين حافظ لاعب الزمالك مواليد 2005 طلع خد لفة على القنوات بالليل واتكلم عن اللي بيحصل ليه في الزمالك.. لكن مصدر في نادي الزمالك اتكلم عن مشكلة اللاعب وقال: “والد اللاعب راح النادي وطلب من بدر حامد رئيس قطاع الناشئين منحه الاستغناء الخاص بيه”.
ورئيس القطاع رحب برحيل اللاعب لكنه طلب منه التقدم بطلب لرئيس مجلس الإدارة حسين لبيب.. وده الإجراء الطبيعي اللي بيحصل.
لكن اللاعب فجر مفاجأة وقال: “أنا متاخد بذنب إمام عاشور.. وطلبت الاستغناء للرحيل.. وموضوع دعمي لإمام عاشور لاعب الأهلي وزوج أختى.. انتهى ورجعت للتدريبات بشكل طبيعي.. وبعد أسبوع استبعدوني من التدريبات الجماعية.
مكنتش عايز اروح النادي عشان عارف اللي هيحصل ليا.. أول أسبوع المعاملة كانت حلوة.. وكانوا بيقولوا ليا أنت قائد الفريق.. وفي الأسبوع التاني رجعوني بتدرب مع اللعيبة الجديدة في الاختبارات.. ولعبوني في مركز المدافع رغم أني صانع ألعاب.
من 3 شهور لعبت مباراة مع الدرجة الأولى وجبت جول وجوزيه جوميز اتكلم عني بشكل كويس.. الكابتن عبدالواحد السيد طلب مني أنا وزميل ليا نوقع على عقد، الكلام ده كان يوم الخميس الماضي.. يوم السبت ذهبنا لكي نوقع على العقود واتصلنا بالكابتن عبدالواحد ومردش علينا”.
أنا مرتبي في الزمالك 600 جنيه في الشهر وزمايلي بياخدوا 40 ألف.. ومعاهم عقود وأنا كابتن الفريق ولسه معايا استمارة.
حسين السيد عضو مجلس الإدارة قال عليا ده لعيب عادي.. وأنا قلت للكابتن بدر حامد طالما أنا لاعب عادي ليه متمسكين بيا.. سبوني أمشي.. فرد عليا وقالي فكر كويس.. لو عايز مصمم تمشي اكتب طلب استغناء وقدمه للإدارة”.
ده الاتفاق اللي حصل.. وهكتب الطلب واقدمه للإدارة.. عندي عروض كتيرة في الإمارات ومصر.. ومحددتش موقفي بشكل نهائي.. أنا عمري ما كنت بتاع لقطة وبحب الزمالك.
مش عارف ليه بيحصل معايا ده.. وإمام عاشور ملوش علاقة.. ومش بقول اسمه في النادي.. ولو اسمه اتذكر قدامي بقولهم أنا بعيد عن إمام عاشور.. هو في الأهلي وأنا في الزمالك.. زي عبدالله جمعة كان لاعب في الزمالك وأخوه صالح كان في الأهلي.
ولما قولت إن إمام عاشور أفضل لاعب في إفريقيا.. الوحيد اللي علق حسين السيد وقال ده أمر عادي، عشان ده زوج أخته.. ومش بقابل إمام الأيام دي.. وأنا بحترم جمهور الزمالك وبعتذر ليهم مش هقدر أكمل في النادي وأنا تعبان نفسيا.
ياسين حافظ اتكلم عن المفاوضات مع الأهلي هيروح ولا لأ.. قال: “إمام عاشور مقالش أنه هيضمني للأهلي.. لكن مصدر في نادي الزمالك أكد أن فيه مفاوضات غير رسمية بين اللاعب ومسئولين في قطاع الناشئين بالأهلي.. والمسئولين في القلعة الحمراء متدخلوش في الأزمة.. ومنتظر اللاعب يخلص نفسه ولو كويس هياخدوه.
ياسين حافظ ناشئ الزمالك من مواليد سنة 2005.. يعني عنده 18 سنة.. ومن أبرز الأسماء في ميت عقبة في فريق الشباب.. وبيلعب في خط الهجوم.
