5 لعيبة بس في الدوري المصري هما اللي عليهم الخناقة بين الأهلي والزمالك في الميركاتو الصيفي اللي بدأ يسخن.. وكل نادي بيجهز فلوسه ولعيبته عشان يحسم الصفقات المهمة.. مين هي اللعيبة دي؟.. ومين فيهم بديل أحمد سيد زيزو؟.. وخليفة إمام عاشور هيروح فين؟.. ده اللي هنعرفه مع بعض في “قشة لفة بلس”.
المسئولين في الزمالك بعد حل أزمة القيد عايزين يبنوا فريق قوي يقدر ينافس في البطولات المحلية والقارية اللي هيشارك فيها.. ويجاري النادي الأهلي في بطولات الدوري والكاس.
لكن المسئولين في الأهلي عايزين لعيبة سوبر تكون احتياطي ويقوا الفريق أكتر وأكتر عشان محدش يقدر يقف قدامهم وينافسوا كمان في البطولات القارية والعالمية اللي هيشارك فيها المارد الأحمر السنة الجاية زي كاس العالم للأندية وبطولة السوبر الأفريقي وكأس إنتركونتيننتال.
وفرق الكشافة في الأهلي والزمالك حددوا 5 لعيبة في دوري نايل هما اللي مطلوبين بالاسم في الناديين وعشان كدا الكابتن محمود الخطيب فك الكيس.. وبدأ يغري اللعيبة والأندية بالملايين والبطولات والإعلانات والبنود الكتيرة في العقود.
لكن الزمالك قال للأندية أنه هيديهم لعيبة كتير عشان يقنعهم ينضموا للفريق.. اللعيبة اللي عليها العين هما نجم زد عبدالرحمن البانوبي جناح زد المتألق في الدوري وبقي هدف للأهلي والزمالك ومطلوب بأعلى سعر في فترة الانتقالات الصيفية.
عبدالرحمن مطروح بقوة في ميركاتو الأهلي والزمالك عشان الناديين محتاجين لجناح أيسر بيجيد اللعب باليمين.. ومارسيل كولر طلب التعاقد مع اللاعب عشان يكون خليفة حسين الشحات خصوصا أن سنه 25 سنة.. وبيلعب في مركزي الجناح الأيمن والشمال وسجل 7 أهداف من وقت انتقاله لزد في ميركاتو الشتاء اللي فات.
وكمان الزمالك عايز يتعاقد مع البانوبي اللي بيدور على جناح هداف زي أحمد سيد زيزو، وتألق عبدالرحمن خلى المسئولين في الزمالك مهتمين.
نادي زد هيوافق على رحيل عبدالرحمن البانوبي لو خد مقابل مالي ضخم أو حصلت صفقة كبيرة وخدوا لعيبة من الأندية وده اللي عايزه الزمالك يقدمه لفريق زد.. إدارة زد عايزة تاخد مصطفى شلبي وناصر منسي.. أو ياخدوا 50 مليون جنيه علشان يتنازل عن نجمه عبدالرحمن البانوبي.
اللعيب الثاني اللي عليه صراع هو عمر الساعي نجم الإسماعيلي اللي مطلوب من القطبين ولفت نظر المدربين في الأهلي والزمالك.. لكن الإعلامي مهيب عبدالهادي قال إن نادي الزمالك، حصل على توقيع عمر الساعي لمدة 4 مواسم.. بعد الوصول لاتفاق مع اللاعب على كل الأمور المالية والتعاقدية.
المسئولين في الزمالك هيبدأوا التفاوض مع إدارة الإسماعيلي لضم اللاعب رسميا بعد ما نال عمر الساعي، إعجاب جوزيه جوميز المدير الفني للفريق.
وكمان مارسيل كولر متحمس لضم عمر الساعي.. والاسماعيلي عنده رغبة في البيع.. والمسئولين في الأهلي عرضوا على كولر ضم عمر الساعي وكان متحمس لفكرة التعاقد معه… لكن إدارة الإسماعيلي قالت: “الإدارة استقرت على منح الأولوية لبيع اللاعب خارج مصر خاصة أنه تلقى بالفعل اتصالات من مسؤولين في رد بول سالزبورج النمساوي.. وكمان الأهلي والزمالك طلبوه بس مفيش عروض رسمية”.
اللاعب التالت اللي عليه صراع بين القطبين هو يسري وحيد جناح طلائع الجيش اللي هيشتريه الطلائع من نادي الترسانة.. ومطلوب في الأهلي والزمالك خصوصا أنه ظهر بمستوى كويس مع الفريق العسكري.
وإدارة الزمالك عايزة تتعاقد مع اللاعب عشان عندها أزمة في الأجنحة ومحتاجين لعيبة تاني مع زيزو ومصطفى شلبي خصوصا أن إبراهيم نداي هيمشي من الفريق.
وكمان اللاعب عجب المدرب السويسري مارسل كولر اللي اتكلم معاه بعد المبارتين اللي لعبهم قدام الأهلي في الدوري وقاله أنه مقتنع بقدراته وعايزه معاه في الأهلي وشايف انه يقدر يلعب جناح يمين وشمال علشان بيلعب برجليه الاثنين.
مدافعين فريق زد مصطفى العش ومحمد إسماعيل اللي مطلوبين في القطبين عشان الفريقين بيعانوا من نقص في الخط الخلفي.
