العلاقة بين بيراميدز والأهلي عاملة زي القط والفار.. كل شوية يشاكسوا في بعض.. لكن إدارة بيراميدز كل ما تعمل حاجة ترد إدارة الأهلي بحركة أصيع وتعلم عليها.. وده اللي حصل في دوري 2024- 2025 لما بيراميدز اتغلب من الأهلي في الدور الأول.. وقبل المباراة التانية بيراميدز راح عمل حرب نفسية على الأهلي وحب يضايق الإدارة الجماهير مرة واحدة.
لكن الملعوب اللي عملوه رده عليهم الكابتن محمود الخطيب وخلى شكلهم وحش.. أيه اللي حصل قبل مباراة الأهلي وبيراميدز؟.. وإزي الأهلي كسب بيراميدز من قبل ما يلعب؟.. وإزي ممدوح عيد حب يرخم على الخطيب في الصفقات؟.. ده اللي هنعرفه مع بعض في “عرب 22”.
الزمالك طلع نفسه برة المنافسة على الدوري من بدري.. وساب الساحة للأهلي وبيراميدز اللي بيصارعوا على درع الدوري.. وكل إدارة بتجهز أسلحتها ونقط القوة عشان تكسب برة وجوة والملعب.. والمرة دي إدارة بيراميدز رفعت أسعار التذاكر على الجماهير.
وخلوا تذكرة الغلابة ومشجعين الدرجة التالتة أم 50 جنيه بـ200 جنيه مرة واحدة.. والدرجة الأولى بقيت بـ2000 جنيه.. والمقصورة الرئيسية بـ5000 جنيه مرة واحدة.. وده اللي أغضب جماهير الأهلي.
لكن المسئولين في بيراميدز حبوا يلعبوا “جيم نفسي” مع النادي الأهلي.. عشان هو المنافس بتاعهم فحب يضايقه وعمل حاجتين في حاجة واحدة.. الأول هو حرمان جماهير الأهلي من الحضور في ماتش مهم وممكن يكون حاسم للدوري خصوصا أن الجماهير بتعمل ضغط كبير على اللعيبة وتعتبر من أسباب الفوز في الماتش.. وعشان بيراميدز عايز يكسب فحب يقلل الجماهير دي.
والحاجة التانية هي جمع أكبر مبلغ من الفلوس لو جماهير الأهلي أصرت تحضر الماتش.. لكن المسئولين في الأهلي كانوا واعيين وردوا عليهم بحركة ذكية.. والنادي أعلن أنه هيشتري كل التذاكر بـ200 جنيه ويبيعها لجماهيره بـ50 جنيه بس وكدا كسب ثقة جماهيره واللي عجبها قرار الإدارة.. وظهر أن الخطيب كسب بيراميدز برة الملعب. في الجيم النفسي.. وحول الضغوط على لعيبته.
بيراميدز استفز جماهير الأهلي كمان قبل الماتش وراح نشر فيديو على صفحته لجماهير بتشجع الفريق وكتب عليهم رقم 1.. وهنا جماهير الأهلي دخلت هاجمت النادي وقالت ليهم أنتوا معندكش جماهير.. وبتشتروا الجماهير بالفلوس والوجبات.
ممدوح عيد المدير التنفيذي لبيراميدز مسكتش على كدا.. وكمل مضايقته لإدارة الأهلي برة الملعب وخصوصا في ملف الصفقات الجديدة اللي بدأ يدخل فيها ويزايد عليها.
وده اللي اتكلمت عنه تقارير صحفية قالت إن بيراميدز دخل في مفاوضات مع يحيى عطية الله الظهير الأيسر المغربي لفريق سوتشي الروسي.. واللي بيحاول النادي الأهلي يضمه في الميركاتوا الصيفي.. ويعتبر هدف أساسي لكولر ومن أهم الصفقات اللي طالبها المدير الفني السويسري.
وكمان فيه تحركات من فريق بيراميدز عشان يعملوا كوبري لنجم النادي الأهلي الجزائري أحمد القندوسي اللي خرج من حسابات القلعة الحمراء وعايزين يرجعوا السنة الجاية بعد ما يطلع بيع نهائي من الأهلي.
ومعاهم نجم الأهلي السوبر عمرو السولية اللي المسئولين في بيراميدز استغلوا الأزمة اللي حصلت بين اللاعب والنادي الأهلي بعد فشل مفاوضات تجديد عقد اللاعب.. وعرض عليه عمرو بسيوني مدير إدارة التعاقدات في النادي السماوي التوقيع لمدة 3 مواسم مقابل حصوله على 60 مليون جنيه يعني في الموسم الواحد هياخد 20 مليون جنيه.
ممدوح عيد استغل أزمة رمضان صبحي وفي الفترة اللي فاتت ظهرت تلميحات قوية عن تورط النادي الأهلي في ملف إيقاف رمضان صبحي في أزمة المنشطات.
