الأهلي قدام فريق بيلعب في الدرجة التانية عاني كتير وقدم أداء باهت مش متعودين عليه من بطل أفريقيا.. ولولا القدر كان رحيم بالأهلاوية كانوا ممكن يخرجوا بفضيحة من فريق الألمونيوم خصوصا أن الفوز اتاخر للدقيقة 93 وبالصدفة الكرة دخلت جول.
لكن في الماتش ده حصلت لقطة الموسم.. وكمان مصطفى شوبير عمل مفاجأة.. أيه هي لقطة الموسم؟.. وإزي الدوري بيضيع من الأهلي؟.. ده اللي هنعرفه مع بعض في “قشة لفة بلس”.
لعيبة الأهلي في الشوط الأول مجاتش خالص.. ومحدش لاقي مبرر للحالة اللي كان فيها اللاعبين خصوصا في خط الهجوم.. ومفيش حاجة بتتعمل من الفريق.. ولا فيه لاعب فردي قادر يصنع الفارق.. جناحين الأهلي المحترفين بيرسي تاو ورضا سليم قدموا أسوأ أداء ممكن يلعبه محترف.
وكمان نجم الفريق محمود كهربا اللي لسه راجع من عقوبة يعني المفروض تركيزه ومجهوده يكونوا 100%.. بس كان تايه.. ونص ملعب الأهلي من غير إمام عاشور في حالة بائسة جدا.
وأنت بتتفرج على الماتش تحس إن اللعيبة تايهة ومش مركزة ودماغها مش في الكرة أصلا.. خصوصا اللعيبة الأجانب اللي مش عارفين نفسهم قاعد ولا مكملين.. ومعاهم كهربا اللي مشغول بالعروض ومش عارف مصيره أيه في الفريق هيكمل في الموسم الجديد ولا هيمشي.
وعشان كدا لازم الكابتن محمود الخطيب يتدخل ويحسم موقف اللعيبة دي عشان تركز خصوصا أن الفريق داخل على حسم بطولة الدوري في الماتشات وأهمها مباراة بيراميدز.. اللي لو الأداء كان بالشكل اللي حصل في ماتش الألمونيوم فأكيد النتيجة هتبقي صعبة.
لكن رغم اللي حصل في المباراة كان فيه مشهد نقدر نقول عليه لقطة الموسم واللي قال عليها الإعلامي سيف زاهر.. لما جاب صورة ولدين صغيرين في المدرجات مبطلوش تشجيع للفريق رغم أن مباريات الكاس من غير جماهير.
وده اللي انتقده مارسيل كولر المدير الفني للأهلي اللي قال مش عارف ليه الجماهير مش موجودة في الماتشات دي.. هي اللي بتحمس اللعيبة وإحنا محتاجينهم.
وبعد الماتش الحارس الشاب مصطفى شوبير راح لحارس مرمى فريق الألمونيوم وسلم عليه.. واتكلم معاه وشجعه على الأداء اللي قدمه والتصرفات دي مش بتيجي غير من لعيبة كبار.
ورغم أن كولر انتقد أداء اللعيبة في الملعب لكنه قال: “المهم المكسب والنوعية دي من ماتشات الكاس المهم انها تكسب وبس.. بطولة الكاس اللي فاتت في نفس الدور ده كسبنا بهدف في الدقيقة 97 وضيعنا ضربة جزاء.. فأنا هعتبر ده فال حسن
مش كل مباراة هنجيب 3 أو 4 أهداف.. المهم الفوز.. قلت للعيبة ميكونش فيه تعالي على الكورة.. بس مكنش فيه انسجام بسبب كثرة التعديلات في التشكيل،.. وكان لازم أريح لعيبة عشان ماتش بيراميدز في الدوري”.
إبراهيم سعيد لاعب الأهلي السابق انتقد أداء اللعيبة في الماتش خصوصا قبل مباراة بيراميدز وقال: «لعيبة الأهلي كانوا بعدين عن مستواهم الفني خلال مباراة الألومنيوم، وكان هناك بطء في اللعب خصوصا في وسط الملعب ومكنش فيه أي كرات عرضية وتركيز داخل منطقة الجزاء والتسديدة الوحيدة كانت لمحمد هاني، وجه منها الجول”
بيرسي كان مش حالته، وكهربا، تحس إنه مشتت وسرحان، دماغه مش معاه.. اللعيبة مشتتة بسبب مصيرها مع الأهلي سواء بالاستمرار أو الرحيل.. ومعجبنيش أداء لاعيبة الأهلي.
ولازم كولر يستغل الأخطاء دي ويعمل حوافز عند اللعيبة قبل باقي مباريات الدوري بشكل عام وبيراميدز بشكل خاص بدل ما الدوري يضيع من ايديهم.
