حاسس بالظلم والقهر.. اللي بتعملوه النهاردة هيتردلك بكرا.. شكوتي لربنا سبحانه وتعالى مش لحد من البشر.. ومليش كلمة غير حسبي الله ونعم الوكيل.. ده اللي قاله عمار حمدي نجم النادي الأهلي المعار لفريق المقاولين العرب.. لكن ليه عمار قال كدا؟.. ومين اللي ظلمه؟.. وأيه علاقة المسئولين في الأهلي؟.. وهل اللاعب هيروح الزمالك في الميركاتو الصيفي ولا لأ؟.. وأيه موقف مارسيل كولر من رجوع ابن النادي؟.. ده اللي هنعرفه مع بعض في “عرب 22”.
في بداية موسم 2023- 2024 المسئولين في الأهلي اضطروا يوافقوا على رغبة عمار حمدي لاعب الفريق في الانتقال لنادي المقاولون العرب لمدة موسم على سبيل الإعارة.
عمار حمدي فسخ عقده مع نادي سراميكا كيلوباترا اللي كام عايز اللاعب يكمل معاه لكن هو مرضيش.. لكن قبل نهاية الموسم نجم الأهلي فاجئ الجميع برسالة مثيرة
وكتب بيان على ستوري إنستجرام بيشتكي فيه من الظلم وقال: “أصعب حاجة لما الدنيا تفرض عليك حاجة وأنت مش حاببها.. والأصعب لما تكون وسط ناس بيحاولوا يكسروا طموحك وأنت بتعافر عشان تنجح وتحقق اللي انت عايزه”.
إحساس صعب جداً لما تحس بالظلم والقهر من ناس أنت سيبت ناس أحسن منهم وعائد مادي أكبر بكثير عشان تروحلهم وفي الآخر ما يقدروش دا، لا وكمان عاوزين يقعدوك ويكسروا طموحك وهما عارفين قيمتك كويس أوي بس مفيش في إيدك حاجة تعملها
والحمد لله اللي بيريح الواحد إن ربنا شايف كل دا.. واللي بتعمله النهاردة هيتردلك بكرا.. شكوتي لربنا سبحانه وتعالى مش لحد من البشر، ومليش كلمة غير “حسبي الله ونعم الوكيل”.
لحد هنا خلصت رسالة عمار حمدي من غير ما يوضح هو بيشتكي مين ولا أيه السبب عشان يعمل جدل بين جماهير الأهلي والزمالك.. لكن مصادر ورواد السوشيال ميديا اتكلموا عن اللي حصل للاعب وقال أحدهم: “يا عمار أنت اللي عملت كده في نفسك وأصريت إنك تفسخ الاعارة مع سراميكا كيلوباترا.. وتروح المقاولين عشان شوقي غريب.. وقولت عشان بحب المدرب ده.. وطبعا كان مفيش أي احترام لإدارة النادي اللي كان عايزك من الأول واديته كلمة”.
لكن الصحفي الأهلاوي علي راضي كتب على صفحته: “للآسف، عمار مسمعش كلام مسئولي الأهلي في بداية الموسم.. وأصر على الانتقال للمقاولون بسبب شوقي غريب اللي رحل من منصبه.. الحمد لله إنك اعارة وراجع الأهلي الموسم الجاي.. وإلا نفسيتك كانت اتدمرت في المقاولون لما يهبطوا درجة ثانية بنسبة كبيرة السنة دي.
الأهلي كان عايز عمار يلعب ويستفيد ماديا وفنيا.. وشوقي غريب أثر عليه واقنعه يروح المقاولون وضيع سنة من عمره.
ومصادر برأت النادي الأهلي من اللي بيشتكي منه اللاعب.. وقالوا إن المعاملة في المقاولون مش أحسن حاجة.
لكن المصادر قالت إن عمار حمدي برة حسابات الجهاز الفنى للأهلي بقيادة السويسرى مارسيل كولر.. اللي أكد في حديث مع مجلس إدارة القلعة الحمراء عدم الحاجة لخدمات عمار حمدى المعار لصفوف نادى المقاولون العرب.
وحسب تقارير صحفية فـ “عمار” جاله عرض من المسؤولين في الزمالك.. وهو موافق بصفة مبدئية على الانتقال للقلعة البيضاء في الميركاتو الصيفي ومعندوش أي مانع أنه يلعب مع الزمالك خصوصا لو فسخ عقده مع الأهلي بشكل رسمي.
نجم الأهلي اتكلم عن الرحيل وقال: “في بداية الموسم عانيت من إصابة في أنكل القدم، وتحاملت على نفسي وده اللي خلى الإصابة تتجدد وتتفاقم”.
حسيت أن النادي الأهلي مش عاوزني بداية الموسم.. بعد حديث أمير توفيق مدير التعاقدات معايا، علشان كده قررت الرحيل للمقاولون العرب بعد تواصل المدير الفني شوقي غريب معايا.
