محمد صلاح المطلوب رقم 1 في السعودية.. من بعد كريستيانو رونالدو والأندية في الدوري السعودي عينهم على كابتن منتخب مصر التاريخي.. لكن قبل الميركاتو الصيفي السعوديين صدموا “مو”.
مش بس كدا كمان مدرب ليفربول الجديد آرني سلوت.. عمل معاه زي اللي عمله حسام حسن.. أيه اللي بيحصل مع نجم منتخب مصر؟.. وإزي الأندية السعودية صدمت مو؟.. ومين هو بديل مو في الريدز؟.. ده اللي هنعرفه مع بعض في “عرب 22”.
اللي بيعمله حسام حسن مع محمد صلاح في منتخب مصر بيطبقه دلوقتي مدرب ليفربول الجديد آرني سلوت مع الفريق اللي اتكلم على محمد صلاح وقال إن لاعب قوي وحالته البدنية لائقة.. وأعتقد أن ده اللي عليه ديما.. وده اللي عايزينه من اللاعبين الكبار اللي بيعتبروهم قدوة للشباب.. وده بيحافظ عليه صلاح خصوصا لياقته البدنية.
ليفربول لعب أول ماتش ودي “بريستون نورث إيند” تحت قيادة مدربه الجديد آرني سلوت استعدادا للموسم الجديد.. ومحمد صلاح شارك في المباراة وكان لابس شارة كابتن الفريق خصوصا بسبب غياب فيرجيل فان دايك اللي شارك مع منتخب هولندا في يورو 2024.
المباراة اتلعبت بعيد عن الإعلام ومش مذاعة على أي منصة، لكن المفاجأة كشفتها صحيفة “ديلي ميل” اللي قالت إن المدرب الجديد غير مركز محمد صلاح في الماتش الجديد.
الصحيفة قالت: “صلاح لعب المباراة في مركز رقم 9 أو المهاجم الصريح عكس اعتياده في وقت سابق بتوظيفه في مركز الجناح الأيمن.. لكن الصحيفة أكدت أن محمد صلاح ممكن يشارك في المركز ده لأنه مفيش مهاجمين خصوصا بعد غياب داروين نونيز اللي كان بيلعب مع أوروجواي في كوبا أمريكا 2024”.
وكمان محمد صلاح ضيع فرصة محققة في الشوط الأول بتسديدة قوية عشان تخلص المباراة بخسارة ليفربول بهدف دون رد.. وده نفس اللي عمله حسام حسن مدرب منتخب مصر مع صلاح في مباريات الفراعنة الأخيرة.
ورغم أن كابتن منتخب مصر كان أهم واحد مطلوب في السعودية وارتبط اسمه بفريق اتحاد جدة في المواسم اللي فاتت وفشل في ضمه.. لكن صندوق الاستثمار السعودي اللي بيشرف عليه المستشار تركي آل الشيخ رئيس هيئة الترفيه قرر التراجع عن الصفقة.
وده اللي كشفته صحيفة “ذا أتلتيك” اللي قالت إن رابطة دوري روشن عايز تخفض معدل أعمار اللاعبين من 29 لـ27 سنة.. وبكدا بقي خطة التعاقد مع محمد صلاح مع أي نادي في الدوري السعودي صعب خصوصا أن كابتن منتخب مصر عنده 32 سنة.
ورغم أن ليفربول مش مستعد يبيع محمد صلاح واللاعب مكمل مع الفريق، لكنه بيستعد للتعاقد مع صفقة كبيرة في الميركاتو الصيفي بالتعاقد مع الياباني تاكيفوسا كوبو لاعب وجناح فريق ريال سوسيداد.
شبكة “One football” قالت إن ليفربول مستعد يقدم عرض بقيمة 55 مليون جنيه إسترليني وده يعتبر رقم قياسي جديد للاعب.
ونشرت الشبكة تقرير قالت فيه إن ليفربول هيعرض على كوبو راتب يزيد على 12.5 مليون جنيه إسترليني في السنة.. وده اللي يساوي 240 ألف جنيه إسترليني في الأسبوع.. ويعتبر ده من أعلى مرتبات في أنفيلد.
نجم منتخب مصر بدأ مسيرته ضمن ناشئي نادي المقاولون العرب وصعد للفريق الأول في صيف 2010، وانتقل بعدها لنادي بازل السوسري في صيف 2012 وقضى سنة ونص بالنادي وبعدها راح إعارة لنادي تشيلسي الإنجليزي في شتاء 2014.
وبعدها طلع إعارة لنادي فيورنتينا في شتاء 2015، ورجع لتشيلسي في الصيف اللي بعده قبل الانضمام لنادي روما معارًا في نفس الفترة لمدة سنة.. وبعدها انتقل بشكل نهائي لصفوف الفريق الإيطالي.. ولعب موسم وبعدها انضم لنادي ليفربول في صيف 2017.
