باع الزمالك في أوقات كتيرة والمسئولين منتظرين عقده ينتهي عشان يخلصوا منه.. خصوصا أن اسمه ارتبط بالأهلي في أكتر من مرة.. ده غير أنه سرب أخبار للصحفيين حبايبه عن مفاوضات من أندية خليجية عايزة تتعاقد معاه.. مين هو اللاعب اللي عامل أزمة في الزمالك؟.. وليه حسين لبيب صدمه قبل تجديد عقده؟.. وأيه موقف محمود الخطيب من ضمه للأهلي؟.. ده اللي هنعرفه مع بعض في “قشة لفة بلس”.
الكابتن حسين لبيب رئيس مجلس إدارة الزمالك بيعيد ترتيب أوراق فريق الكرة خصوصا بعد ما خلص المديونيات اللي على النادي وحل أزمات القيد.. وبدأ يتخلص من اللعيبة اللي عاملة مشاكل أو عقودها كبيرة أو مش بيفيدوا الفريق زي ما حصل مع محمود علاء وياسر حمد.
دلوقتي الدور على حارس المرمى محمد عواد اللي تعاقد هيخلص مع الزمالك بنهاية الموسم الجاري.. ولحد دلوقتي الاتجاه الأقرب في مجلس الإدارة هو عدم تجديد عقد اللاعب عشان ارتفاع قيمة عقده واهتزاز مستواه في مشاركاته الأخيرة.
أحمد حسام ميدو نجم الزمالك السابق، انتقد محمد عواد وشايف أنه تقاعس عن أداء مهامه على أفضل وجه تجاه الزمالك وجماهيره.. وفي أوقات صعبة اتخلى عن الزمالك واتنفذت عليه اللايحة 17 مرة وده كتير عليه.
ميدو هاجم عواد في تصريحات تلفزيونية وقال: “أنا بحب عواد ودربته في أكتر من فريق زي الوحدة السعودي والإسماعيلي بس بعد اللي عمله لازم يمشي.. لأنه عمل أكثر من موقف سلبي، وأكتر من مرة ادعى الإصابة عشان ميلعبش.
وكان بيتأخر كتير على مواعيد التمارين.. ورفض المشاركة في التدريبات كتير.. .. عواد تخلى عن الزمالك في أكتر وقت كان محتاج ليه الفريق.. ويجب على إدارة النادي أن تتعاقد مع حارس مرمى جديد لدعم المركز ده مع صبحي.
أتمنى يكون ثلاثي حراس الزمالك الموسم القادم هما محمد صبحي ومحمود جنش وأحمد نادر السيد.. والزمالك خد كل حاجة من عواد وهو مش هيقدم حاجة جديدة للزمالك
مش عايز عواد يخش الزمالك تاني من وقت مباراة الأهلي اللي خسر فيها الزمالك 4-1، والجهاز الفني طلب من محمد عواد ينزل في شوط اللقاء الثاني لكنه رفض وقال سيبوا محمد صبحي يلعب.
محمد عواد دلوقتي خارج حسابات المدير الفني البرتغالي جوزيه جوميز اللي بيلعب محمد صبحي بدل منه في معظم الماتشات عشان مستوى نجم الزمالك اللي في النازل الفترة الأخيرة وبيقدم أداء سيئ جدا.. ودخل في مرماه أهداف عجيبة.
حارس الزمالك سرب أخبار للصحفيين أنه جايله عرض مغري من نادي خليجي وعايز يمشي في الصيف عشان يضغط على إدارة الزمالك تجدد عقده بالمبلغ اللي عايزه.
وارتبط اسم محمد عواد بالانتقال للنادي الأهلي في الميركاتو الصيفي خصوصا بعد أنباء رحيل محمد الشناوي الحارس الأساسي للسعودية لكن مصدر في الأهلي نفى فكرة التفاوض مع اللاعب وقال إحنا عندنا مصطفى شوبير والشناوي وحمزة علاء.
مصدر في إدارة الزمالك اتكلم عن تدعيم مركز حراسة المرمى في الميركاتو الصيفي وقال: أحمد نادر السيد حارس الزمالك السابق وباوك اليوناني الحالي، بات قريبًا من العودة مجددًا لصفوف القلعة البيضاء في الصيف الجاري عشان يعوض الرحيل المحتمل لعواد.
المصدر قال: “الاستقرار على عودة أحمد نادر، جه بعد طرح الفكرة على البرتغالي جوميز.. واللاعب نال إعجابه وأعطى الضوء الأخضر لرجوعه.. بعد خوضه تجربة احتراف قصيرة في القارة الأوروبية.
الحارس الشاب عنده 21 سنة وبيمتلك الخبرات اللازمة بعد فترة احترافه الأخيرة وهيجون تدعيم جيد لمركز حراسة المرمى.
