قال هسجل 10 أهداف في الموسم على الواقف.. ومفيش مواهب في الدوري المصري وأنا لسه معتزلتش.. وخدت إجازة 10 سنين بس وراجع.. وهبقي من هدافين الدوري.. وهلعب في فريق تاريخي بيفاوضني دلوقتي.
والموسم الجاي هتشوفوا ميدو.. دي التصريحات المعتادة من نجم الزمالك السابق أحمد حسام ميدو اللي ديما بيثير الجدل.. لو خدنا كلام ميدو على محمل الجد.. مين النادي اللي بيفاوض العالمي؟.. وأيه علاقته بالزمالك؟.. وهل يرجع القلعة البيضاء ويعود ثلاثي الرعب في الزمالك؟.. ده اللي هنعرفه مع بعض في “قشة لفة بلس”.
أحمد حسام ميدو ولقبه العالمي من أهم المحترفين في تاريخ مصر.. وعمل مشوار احترافي كبير في أندية أوروبا ولولا دماغه كان زمانه في مكان تاني خالص.. زي محمد صلاح دلوقتي
ميدو اعتزل كرة القدم وهو لسه شاب وكان عمره 30 سنة.. يعني كان يقدر يلعب على الأقل 5 أو 6 سنين خصوصا فيه لعيبة زي عبدالله السعيد عند 38 سنة ولسه بيلعب كرة.
العالمي طلع في تصريحات نارية واتكلم عن ندرة المواهب والمهاجمين في مصر وقال: “عندي رحلة غير متكلمة وبفكر ارجع.. أراهن أي حد لو رجعت هسجل على الأقل 10 أهداف في الموسم على الواقف.. مقارنة بالمهاجمين في الدوري المصري اللي مفيش مهاجم عليه العين فيهم.
“عندي 41 سنة .. ومستوى المهاجمين في الدوري مشجعني أرجع ألعب تاني.. لأن للأسف معندناش مهاجمين.. بنسبة كبيرة السنة الجاية هروح ألعب… فيه فرقة الفترة الجاية هدخل معاهم فترة إعداد.. وأنا حاليًا بتأهل وبجهز نفسي إني أرجع ألعب في الموسم الجديد”.
“أنا معتزلتش أصلاً أنا اخدت إجازة 10 سنين خدت فيهم خبرات في مجالات تانية وهرجع ألعب تاني.. حالياً بتمرن كورة مرتين أو تلاتة في الأسبوع وبجهز نفسي إني أرجع ألعب تاني، وبنزل تمرين مع فرقة 19 سنة في الزمالك عشان أخد إحساس الملعب وبشكر المسؤولين في الزمالك على الأمر ده”.
ميدو قال: “جاهز بنسبة 60% وبزود اللقياقة بتاعي قبل الموسم.. وهلعب مع فرقة كبيرة وتاريخية.. ولما سأله الإعلامي إبراهيم عبدالجواد سأله: “هتروح الإسماعيلي”.. رد وقاله: “فرقة كبيرة.. وبطالب كابتن حسام حسن يبصلي بنظرة عادلة.. هو دربني وعارفني قبل كدا.. وإحنا بنعرف نتعامل مع بعض”.
ميدو اتكلم عن بداياته في الكرة وقال: “أنا ابتديت ألعب وأنا عندي 17 سنة.. وفي مرة لعبت ماتش كويس جدا وبعد ما خلصت رحت “نايت كلوب”.. كان كل اللعيبة بتروح تسهر فيه، فلقيت البنات كلهم مزز.. وملك جمال بلجيكا كانت موجودة.. وبيقعدوا يعيدوا الأجوان بتاع اللاعيبة.
فقولت لازم أجيب أجوان عشان أعلق واحدة من البنات دول.. فالمهم لعبت كويس وجبت جول.. ورحت معلق ملكة جمال بلجيكا.. صاحبتها شوية وكان اسمها “لوكا فاندركايت” البنت دي كانت قمر.. ودلوقتي بقيت ممثلة مشهورة.
ميدو لما اتسأل عن محمد صلاح قال “هو أفضل لاعب مصري. كان عندنا لعيبة عظماء قدموا لمصر كتير لكن كرة القدم موجودة في أوروبا… وإذا كان فيه واحد قدر يلعب على المستوى ده لمدة 10 أو 12 سنة في أوروبا فده نعتبره أفضل لاعب في تاريخ مصر”.
محمد صلاح أفضل مني.. وأنا لعبت في دوريات وأندية كبيرة.. لكن صلاح وصل للى معرفتش أنا أوصل ليه.
ميدو بدأ مشواره في الكورة مع فريق الزمالك سنة 1999… وانتقل منه لنادي جنت في بلجيكا في سنة 2000 كأصغر محترف مصري وهناك فاز بجائزة حذاء الأبنوس.
ولعب مع منتخب مصر 51 ماتش سجل فيهم 20 جول.. عشان يكتب نهاية مشواره مع الكورة كلاعب في يونيو 2013 وهو عنده 30 سنة.
