مارسيل كولر المدير الفني للأهلي انفجر في وش إدارة الكابتن الخطيب وسلمهم للجماهير لما قال: “أنا مش سعيد بالصفقات لغاية دلوقتي .. والأمور مش ماشية زي ما أنا عايز”.. ومن وقتها وفيه قلق ورعب في القلعة الحمراء.
وعشان كدا الخطيب قرر يرجع صاحب الصفقات النارية عشان ينقذ الموسم ويرضي مدرب الأهلي.. لكن ليه كولر زعلان؟.. ومين الصفقات اللي عايزها ومجتش؟.. ومين هو الرجل القوي؟.. وأيه حكاية خناقة عدلي القيعي وكولر؟.. ده اللي هنعرفه مع بعض في “قشة لفة بلس”.
كل الصفقات اللي دخل فيها أمير توفيق مدير التعاقدات في النادي الأهلي فشلت ومقدرش يحسم غير صفقة واحدة وكمان بتدخل الكابتن محمود الخطيب شخصيا.. وعشان كدا قرر يغيره وده بعد كلام كولر اللي قال: “أنا مش سعيد بالصفقات لغاية دلوقتي.. ولازم الفريق يدعم بصورة أقوى من كده ونكون أحسن السنة الجاية بس أنا مش مدير التعاقدات ولا مسؤول عن الصفقات.. دي مسئولية الإدارة هما بيبلغوني بالمستجدات لكن الأمور حتى الآن مش ماشية زي ما أنا عاوز”.
مصادر قالت إن كولر بلغ الخطيب استياءه من عجز لجنة كرة القدم في النادي في إتمام صفقات قوية خصوصا بعد فشل التعاقد مع أسماء كبيرة مرضيتش تيجي الأهلي وراحت أندية تانية رغم أن عرض الأهلي أقوى من الناحية المادية.. وكمان مش عارف يسوق اللعيبة اللي مش محتاجها كولر.
وعشان كدا الخطيب قرر يرجع هيثم عرابي مدير التعاقدات من تاني عشان يقدر ينفذ طلبات كولر وينقذ موسم الصفقات اللي الأهلي محتاج لعيبة سوبر تعوض الراحلين وتقدر تضيف للفريق في الموسم الجاي خصوصا أنه هيشارك في بطولات قوية وكتيرة.
مصادر في النادي قالت: “هيثم عرابي اسم له باع طويل في الأهلي.. ومع كل ميركاتو بيتردد اسمه عشان يرجع.. لكن الفترة اللي فاتت الجماهير طالبت بعودة عشان بدل أمير توفيق اللي شايفيه فاشل في ملفه”.
وكمان انتشرت أنباء عن تهديد كولر لإدارة القلعة الحمراء بالرحيل بعد التعثر المستمر في تدعيم صفوف المارد الأحمر بالميركاتو الصيفي، والمصدر قال: كولر غاضب من تعثر عدة صفقات خاصة مع وعد لجنة التخطيط بأنه فيه اتفاق نهائي مع لاعبين سوبر زي يحيي عطية الله ومحمد علي بن رمضان ولكن فوجئ بأن إدارة الأحمر فشلت في إتمامهما.
هيثم عرابي رد على الرجوع للأهلي وقال: “بالتأكيد حلم العودة للنادي بيراودني، وأرغب في العودة من جديد، لكني مرتبط في الوقت الحالي بنادي موردن فيوتشر، وفيه تقدير كبير من جانب مالك النادي ليا، والنادي يعمل كمنظومة كاملة خلال الفترة الحالية”.
نجحت في إبرام أكثر من صفقة لنادي الأهلي أثناء تواجدي في المرة الأولي، ومن أفضل هذه الصفقات أحمد حجازي، وكمان ماليك إيفونا وعودة رامي ربيعة من نادي سبورتنج لشبونة».
المصدر قال إن أمير توفيق مش هيمشي من الأهلي لكن كل تركيزه هيكون في الملفات الخاصة داخل شركة كرة القدم..
ومصادر قالت: “فيه خلاف بين كولر وعدلي القيعي رئيس شركة الكرة على الصفقات.
والمسئولين رفضوا كلام كولر ومصدر قال: “فيه حالة من الضيق داخل الأهلي بسبب الحديث عن الأمر في الإعلام.. لكن إدارة الكرة بتسعي لحسم الصفقات التي طلبها المدرب”
“الأزمة مش مرتبطة بالمفاوضات لكن القصة ليها أمور تانية.. زي خروج اللاعبين الموجودين.. مثل علي معلول ورضا سليم وبيرسي تاو، وأخرجنا أليو ديانج للخلود السعودي ومحمد الضاوي كريستو للصفقاسي التونسي.. وبنسعى لإقناع تاو بالخروج”.
الأمر المهم وهو العملة الأجنبية.. النادي ملتزم شهريًا بدفع مليون و400 ألف دولار رواتب للمدربين واللاعبين الأجانب.. ومع ارتفاع قيمة الجنيه مقابل الدولار بندفع مبالغ تتخطي نصف مليار جنيه.. وهنحسم صفقة المهاجم ونعلنها بعد الدوري”.
