إبراهيم عادل هو محمد صلاح الجديد وأفضل موهبة في مصر دلوقتي.. والأندية بتتخانق عليه خصوصا بعد المستوى اللي ظهر بيه في أولمبياد باريس.. وجماهير الأهلي عايزة اللاعب ينضم ليهم.. وبدأ الكلام على وصول عرض من فريق ميتلاند الدنماركي وهنا يقصدوا أنه هيطلع كوبري ويرجع على الأهلي تاني
لكن المفاجأة في العروض المقدمة ليه وموافقة بيراميدز على بيعه.. هيروح فين؟.. وإزي إدارة بيراميدز حطت بند مثير يمنع لعبه للأهلي.. ولو رجع على القلعة الحمراء هيستفادوا منه إزي؟.. وأيه حكاية عرض برشلونة؟.. وهيروح أي نادي؟.. ده اللي هنعرفه مع بعض في “قشة لفة بلس”.
إبراهيم عادل أكتشفوه بالصدفة وده لما شافه عامل في نادي المريخ البورسعيدي اسمه “عم عزب” بيتمشي على البحر وكان بينطط علبة بسكوت.. قال لأبوه هاته يعمل اختبارات ده هيبقي لعيب كرة كبيرة وخد مكافأة 50 جنيه.
ومن بعدها بقي إبراهيم واحد من أهم لعيبة المنتخب الأولمبي اللي تألقت في أولمبياد باريس.. وعشان كدا بقي مطلوب في أوروبا والكل بيتكلم على احترافه.
وفي الفترة اللي فاتت اتقال وصل ليه عرض من ميتلاند الدنماركي وده النادي اللي رجع منه إمام عاشور لاعب الزمالك على الأهلي واتقال إن المسئولين في القلعة الحمراء عملوا كوبري ليه عشان ياخدوا أهم لاعب في الغريم التقليدي.
لكن المسئولين في نادي بيراميدز قالوا مفيش أي عرض حاليا من ميتيلاند الدنماركي لضم إبراهيم عادل.. والكلام ده كان من سنة ورفضناه عشان ضعيف ماديا.
اللاعب عنده عروض من أندية النخبة في أوروبا، ومن قبل مشاركته في دورة الألعاب الأولمبية باريس 2024.. ومن بين العروض عرض من ناد إسباني.. بندرس العرض بأفضل صورة خصوصا أنه مميز من الناحية المادية.
المصدر أكد أن المسئولين في بيراميدز هيحطوا بند في عقد اللاعب يمنعه من الرجوع لمصر قبل مدة محدد إلا لنادي بيراميدز.. وكمان بعدها هيكون فيه نسبة إعادة البيع عالية عشان نستفيد من اللاعب لو اتباع لأي نادي في مصر خصوصا الأهلي.
لكن الإعلامي محمد المحمودي اتكلم عن العروض اللي عند لاعب بيراميدز وقال: “في مباراة مصر وباراجواي كان فيها كشافين من نادي برشلونة.. أبدوا إعجابهم بإبراهيم عادل وسألوا عن اللاعب وهل هو محترف ولا لا.. وتفاجأ المسؤول بإنه لسه موجود في الدوري المصري.
وتم التواصل مع بيراميدز وقالوا: اللاعب هيرحل بشكل طبيعي لكن في حالة وجود عرض أوروبي قوي.. وبجانب برشلونة فيه شركة تسويق أوروبية كبيرة جدا بتابع إبراهيم عادل وقالو إن ده لاعب كبير جدا.. وهيكون محمد صلاح الجديد.. وقدامه مستقبل كبير.
بيراميدز أعلن في مايو 2024 تجديد عقد إبراهيم عادل اللي بيبلغ من العمر 23 عامًا، عشان يكمل في الفريق بعد انضمامه للفريق السماوي في 2018 قادمًا من نادي المريخ البورسعيدي.. وقدر يثبت نفسه ويبقي من أهم أعمدة الفريق.
إبراهيم عادل قدر يسجل 3 أهداف مع منتخب مصر الأولمبي في أولمبياد باريس 2024.. سجل هدفين في مرمى إسبانيا.. وهدف في باراجوي عشان يساهم في تأهل مصر لنصف النهائي.
إبراهيم عادل لعب بقميص بيراميدز 132 مباراة وسجل فيهم 33 هدف وقدم 11 تمريرة حاسمة وانضم لمنتخب مصر الأول سنة 2021.
وتألق في بطولة كأس أمم أفريقيا تحت 23 سنة اللي اتلعبت في المغرب 2023.. وخد لقب أفضل لاعب بعد نجح في قيادة الفراعنة للوصافة بعد الخسارة من المغرب في النهائي.. وارتبط اسمه بمفاوضات مع عمالقة الدوري الإنجليزي وعلى رأسهم ليفربول وآرسنال.. وجاله عرض من نادي نورشيلاند الدنماركي لكن بيراميدز رفض عشان ميبقاش كوبري يرجع منه على الأهلي.
المسئولين في الأهلي اتفاوضوا مع إبراهيم عادل في سنة 2022 لكن بيراميدز رفضوا.. بس اللاعب هدف للأهلي والزمالك وكل نادي عايز يخطفه قبل التاني.
