رمضان صبحي هيفضل هو اللاعب المثير للجدل سواء رجع الأهلي أو راح الزمالك.. والجماهير في كل ميركاتو بتكون مهتمة تعرف هيكمل في بيراميدز ولا هيروح فين.. لكن جماهير الأهلي عايزة اللاعب يرجع تاني وبدأوا يتعاطفوا معاه ونسيوا اللي حصل منه.
بس اللاعب خد قرار هيغير مستقبله خصوصا بعد دخول الوسطاء في مسألة عودته للأهلي.. رمضان هيعمل أيه؟.. وهيروح الأهلي ولا الزمالك؟.. وليه قال أنا معملتش حاجة.. والجماهير بتحبني؟.. وأيه علاقة إمام عاشور؟.. ده اللي هنعرفه مع بعض في “قشة لفة بلس”.
رمضان صبحي أحمد، كان أهم موهبة في مصر وقدر يثبت نفسه مع الأهلي والمسئولين كانوا بيجهزوه عشان يكون أهم كابتن في الفريق ويبقي أسطورة للنادي زي الكابتن محمود الخطيب وصالح سليم.
لكن اللاعب تمرد على الأهلي وصمم يروح يحترف في الدوري الإنجليزي بس مكملش هناك والفريق احتاجه ورجعه تاني ودفع فيه مبلغ كبير.. لكن اللاعب برضو نسي اللي عملته إدارة الكابتن محمود الخطيب عشانه وباع ناديه عشان الفلوس وراح اتعاقد مع بيراميدز.. وقعد معاهم 5 سنين مقدرش يحقق أي بطولة معاهم.
واسم اللاعب ارتبط بنادي الزمالك عشان ينضم ليه خصوصا أنه هيكون صفقة جماهيرية تقدر الإدارة تصالح الجماهير البيضاء بعد المشاكل الكبيرة اللي عملتها خصوصا الانسحاب من ماتش القمة والتعاقد مع إحدى شركات المقاطعة.
وكمان اسم اللاعب ارتبط بالعودة للأهلي من جديد وده اللي كشف الإعلامي هاني حتحوت اللي قال: “مع كل فترة انتقالات بيحاول وسطاء يقربوا وجهات النظر بين رمضان صبحي والكابتن محمود الخطيب، علشان اللاعب يرجع تاني.. لكن المفاجأة أن رمضان صبحي اسمه مش بيتردد بشكل رسمي داخل الأهلي، زي ما انتشرت بعض الأخبار على السوشيال ميديا”.
الوحيد المنوط بيه مناقشة الأمر ده أو حتى عرضه داخل لجنة التخطيط للكرة في الأهلي هو محمود الخطيب بصفته المشرف على الكرة.. والخطيب رافض بشكل نهائي رجوع اللاعب حتى بعد محاولات الوسطاء تقريب وجهات النظر.
مصادر قالت إن رمضان صبحي عايز يمشي من بيراميدز ويرجع للأهلي.. لكن إدارة القلعة الحمراء بتفكر في الأمر نهائيا ومش هيرجع رغم أن المدير الفني للفريق مارسيل كولر طلب رجوع اللاعب لما شافه وقال عليه لاعب مهم.
المصادر أكدت أن رمضان صبحي حاطط أولوية في مستقبله الرجوع للقلعة الحمراء في أقرب وقت لكنه مستنى الفرصة المناسبة خصوصا أنه مشي بطريقة مش كويسة.
بس رمضان صبحي في الفترة الأخيرة بدأ يستغل تعاطف الجماهير الحمراء معاه بعد أزمة المنشطات اللي تعرض ليها واللي جت في وقت أزمة وفاة نجم منتخب مصر ولاعب مودرن فيوتشر أحمد رفعت.
الجماهير قالت إن اللاعب ندمان على اللي عمله وعايز يرجع وهو كويس ليه منستفدش منه وأهم حاجة مصلحة اللاعب لكن جزء من الجماهير رافض مبدأ رجوعه من الأساس.
وعشان كدا رمضان صبحي مش عايز يخسر جماهير الأهلي المتعاطفة معاه ويروح الزمالك وراح حط العقدة في المنشار وطلب مبلغ خرافي من مجلس إدارة الكابتن حسين لبيب اللي عايز يتعاقد معاه في موسم الانتقالات الصيفية.
مصادر قالت: رمضان طلب ياخد أكتر من 90 مليون دولار عشان ينتقل للقلعة البيضاء وهو عارف إن الادارة مش هتوافق على المبلغ ده.. وحتى لو وافقوا فهو هياخد فلوس كتير تعوضه عن غضب جماهير الاهلي ويستغل دعم جمهور الزمالك وكدا يبقي ضرب عصفورين بحجر واحد.
وكمان مصادر مقربة من مجلس الزمالك قالوا إن المسئولين بيعتبروا رمضان صبحي هو أهم صفقة وهترضى الجماهير خصوصا أن اللاعب عنده إمكانيات عالية وبيقدم مردود كويس.
