قالوا عليها “صفقة القرن” وهي اللي هتعوض انتقال إمام عاشور للأهلي.. واللاعب محتاج ظهير جماهيري.. لكن الكلام ده كله طلع فنكوش الصفقة اتحولت فجأة من نادي الزمالك للأهلي.. واللاعب قال أنا أهلاوي ومش عايز أزعل الجماهير اللي بتحبني.. طبعا عرفتوا بنتكلم عن مين.
أيوه هو رمضان صبحي نجم الأهلي السابق ولاعب بيراميدز الحالي.. لكن ليه رمضان رفض يقابل ممدوح عباس؟.. وليه قبل السكة في وش أحمد سليمان عضو مجلس إدارة الزمالك؟.. وأيه الخطوة الوحيدة اللي هتفصله عن الرجوع للأهلي؟.. ده اللي هنعرفه مع بعض في “قشة لفة بلس”.
رمضان صبحي نجم منتخب مصر عقده قرب يخلص مع نادي بيراميدز.. لكن الكلام كل فترة يزيد عن رغبته في الرجوع للنادي الأهلي خصوصا أنه كان أهم لاعب في الناشئين.. وكمان الكلام بيتردد برضو على اتفاقه مع المسئولين في الزمالك على اللعب مع القلعة البيضاء.
وكلام نسيبه إكرامي الشحات نجم الأهلي السابق أثار الجدل لما قال: “رمضان محتاج ظهير جماهيري”.. والناس فسرت الكلام أنه هيروح نادي الزمالك.. خصوصا أن المسئولين في القلعة البيضاء شايفين اللاعب هيكون صفقة جماهيرية زي عبدالله السعيد وجمهور الزمالك هيرحب بيه.
ومصادر مقربة من مجلس إدارة حسين لبيب قالت: “الزمالك بيسعى بقوة لحسم التعاقد مع رمضان صبحي.. ورمضان استقبل رغبة الزمالك في التعاقد معه بمنتهى التقدير بعد العرض المادي الكبير الذي عرضوه عليه.. واللي هيكون بتمويل من رجل الأعمال ممدوح عباس”.
لكن مصادر مقربة من مجلس الأهلي قالت: “رمضان رفض يقابل ممدوح عباس.. وقفل بابه في وش نادي الزمالك.. خصوصا بعد الرسالة اللي جاتله من مقربين من محمود الخطيب رئيس الأهلي واللي بلغوه أن بدأ يكون فيه مرونة شوية في الكلام عن الرجوع للأهلي بسبب القبول الجماهيري الكبير للاعب.
وفيه جزء كبير من الجماهير مرحبة بعودة اللاعب وشايفين إن الخطيب متشدد في رأيه وواخده بشكل شخصي بعيد عن مصلحة النادي.. والأهلي محتاج اللاعب اللي اعتذر أكتر من مرة ومعملش زي اللي عمله إمام عاشور.. وهو ندمان على اللي حصل منه.
ومقربين من رمضان صبحي قالوا: “اللاعب موافق على تجديد العقد مع بيراميدز ومش هيروح الزمالك.. بس عنده شرط وهو ياخد كل الامتيازات المالية اللي موجودة في العقد القديم.. وقال هاخد مليون دولار في السنة زي ما هو والفلوس متقلش والتعامل هيكون بالدولار مش الجنيه.. والمسئولين في بيراميدز معندوش مانع ينفذوا شروط اللاعب.. والعقد كدا هيتمدد سنتين وبكدا هيقعد 3 سنين مع بيراميدز. ومش هيخسر جمهور الأهلي بسبب رفضه للزمالك”.
لكن رمضان صبحي لما اتسأل عن مستقبله قال: “مش كلام صحيح من اللي بيتردد عن مفاوضات نادي الزمالك معايا.. وكل اللي اتقال غير صحيح.. أتفاجأ بما يقال عني فيما يخص انتقالي إلى الزمالك.. لو طلعت ورديت عن اللي بيتقال عني بخصوص الأهلي والزمالك ما حدش هيبطل كلام وممكن يكذبوني أنا”.
“أنا مرتاح في بيراميدز علشان كدا ما بطلعش أرد ولا بشغل بالي.. عقدي مع بيراميدز متبقي به موسم ورحيلي صعب.. ملتزم بعقدي مع بيراميدز ومستحيل أنسى اللي عمله النادي معايا”.
مصادر قالت: “بيراميدز رصد 50 مليون جنيه في الموسم لتجديد عقد عشان يكون العقد الأغلى في تاريخ الكرة المصرية.. واللاعب سمع كلام نسيبه إكرامي الشحات.. وهيصالح الخطيب.. ومرضيش يروح الزمالك عشان ميخسرش جماهير الأهلي اللي لسه بتحبه”.
